Read efik 2 NDIDEM 7 Bible Online

2 NDIDEM 7 - efik bible

2 NDIDEM 7

¹NDIEN Elisha ɔdɔhɔ ete, Mbufo ekop uyo Jehovah; ntem ke Jehovah ɔdɔhɔ ete, Ke adaŋa ini ntem mkpɔŋ, udomo eti ndom-uyo eyekpa shekel kiet, udomo barley iba eyenyuŋ ekpa shekel kiet ke inua-otop Samaria.

²Ndien adidaha owo oro edidem eberede enye ke ubɔk, ɔbɔrɔ owo Abasi, ete, Sese, Jehovah ɔmɔŋ anam window ke ikpa-enyɔŋ! nte ŋkpɔ emi eyesu? Ndien enye ɔdɔhɔ ete, Sese, afo eyekut ke enyin fo, edi ududiaha ke esit.

³Ekem owo inaŋ emi edɔŋɔde akpa-mfia edu ke inua-otop obio: ndien kiet ɔdɔhɔ kiet ete, Nnyin inam didie itie mi tutu ikpa?

⁴Idɔhɔ ite iduk ke obio, akaŋ odu ke obio, ndien nnyin iyekpa do: ima inyuŋ itie mi, iyekpa ŋko. Eyak nnyin ika, ndien, ikoduk ke nna-ekɔŋ mme Syrian: ema enim nnyin uwem, nnyin iyedu uwem; ndien ema ewot nnyin, iyekpa.

⁵Ndien mmɔ edaha ke enyɔŋ ke mfuŋ-mfuŋ mbubreyo, eka ke nna-ekɔŋ Syria: ndien adaŋemi mmɔ esimde utit nna Syria, sese, baba owo kiet iduhe do.

⁶Koro ɔbɔŋ akanamde nna-ekɔŋ Syria ekop uyom chariot, ye uyom horse, uyom akamba udim-ekɔŋ: ndien kiet ɔdɔhɔ kiet, ete, Sese, edidem Israel ama ada inyene ɔnɔ ndidem mme Hittite, ye ndidem Egypt, abaŋa nnyin, ete edi ediŋwana ye nnyin.

⁷Ndien mmɔ edaha ke enyɔŋ efeŋe ke mfuŋ-mfuŋ mbubreyo, enyuŋ ekpɔŋ mme tent mmɔ, ye mme horse mmɔ, ye mme ass mmɔ, ye nna-ekɔŋ nte etiede, enyuŋ efeŋe ke uwem mmɔ.

⁸Ekem adaŋemi mbon-akpa oro ekesimde utit nna, mmɔ eduk ke tent kiet, ekedia ŋkpɔ, enyuŋ eŋwɔŋ, ndien eda silver, ye gold, ye edisine-ŋkpɔ do, ebiom eka ekedip; ndien mmɔ efiak ekeduk ke tent efen, enyuŋ etaŋ ŋkpɔ do eka ekedip.

⁹Ekem kiet ɔdɔhɔ kiet, ete, Nnyin inamke se inende: mfin emi edi usen ikɔ idaresit, ndien nnyin idop uyo: ima ibet usiere, nnyin iyekut ufen; eyak nnyin ikam ika ndien, iketiŋ inɔ ufɔk edidem.

¹⁰Ndien mmɔ eka ekefiori ekot mme etie-usuŋ obio; enyuŋ edɔhɔ mmɔ, ete, Nnyin ima isim nna-ekɔŋ Syria, ndien, sese, baba owo kiet iduhe, ke mibɔhɔke mme horse emi etebede, ye mme ass emi etebede, ye mme tent nte etiede.

¹¹Ndien owo okot mme etie-usuŋ, mmɔ enyuŋ etiŋ ke ufɔk edidem.

¹²Ekem edidem adaha ke enyɔŋ ke okoneyo, onyuŋ ɔdɔhɔ ikɔt esie, ete, Nyesian mbufo, ndien, se mme Syrian ke enenam ye nnyin. Mmɔ efiɔk nte biɔŋ ɔdɔŋde nnyin; ndien ewɔŋɔ ke nna mmɔ, eka ekedibe ke ikɔt, ete, Mmɔ eyeto ke obio ewɔŋɔ, ndien nnyin iyemum mmɔ ye uwem, inyuŋ iduk ke obio.

¹³Ndien owo ikɔt esie kiet ɔbɔrɔ ete, Mbɔk, yak eda horse ition ke mme horse emi esuhɔde ke obio: (sese mmɔ etie nte ofuri udim Israel emi esobode ema:) ndien yak nnyin idɔŋ ekese.

¹⁴Ndien mmɔ eda chariot horse iba: edidem onyuŋ ɔdɔŋ ekebine mbon-ekɔŋ Syria, ete eka ekese.

¹⁵Ndien mmɔ ebine mmɔ tutu esim ke Jordan: ndien, sese, edisine-ŋkpɔ ye mkpoduoho emi Syria ekeduɔŋɔde ke itɔk mmɔ, eyɔhɔ ke ofuri ɔkpɔ-usuŋ. Ndien mme isuŋ oro enyɔŋɔ, eketiŋ enɔ edidem.

¹⁶Ndien mbio-obio ewɔŋɔ eka ekebume mme tent Syria. Ntre ke udomo eti ndom-uyo akpa shekel kiet, udomo barley iba enyuŋ ekpa shekel kiet, nte uyo Jehovah ekedide.

¹⁷Ndien edidem ada adidaha owo oro enye ekeberede enye ke ubɔk, onim nte ekpeme inua-otop obio: ndien mbio-obio edigi enye ke inua-otop ewot, kpa nte owo Abasi ɔkɔdɔhɔde, eke enye ɔkɔdɔhɔde ke ini edidem ɔsuhɔrede aka ke ebiet esie.

¹⁸Edikem ke ini owo Abasi ɔdɔhɔde ye edidem, ete, Udomo barley iba eyekpa ke shekel kiet, udomo ndom-uyo eyenyuŋ akpa shekel kiet, ke adaŋa ini ntem mkpɔŋ ke inua-otop Samaria:

¹⁹ndien adidaha owo oro ɔbɔrɔ owo Abasi, ete, Sese, Jehovah ɔmɔŋ anam window ke ikpa-enyɔŋ! Nte oruk ŋkpɔ eke etiede ntem edisu? Ndien enye ɔdɔhɔ ete, Sese, afo eyekut ke enyin, edi ududiaha ke esit.

²⁰Ntre ke okosu ye enye: koro mmɔ edigide enye ke enyin-usuŋ ewot.