Read efik 2 NDIDEM 8 Bible Online

2 NDIDEM 8 - efik bible

2 NDIDEM 8

¹NDIEN Elisha ama ɔkɔdɔhɔ ŋwan oro enye akanamde eyen esie eset, ete, Daha ke enyɔŋ, afo, ye ufɔk fo, nyuŋ ka koduŋ ke ebiet eke afo edikemede ndiduŋ: koro Jehovah okotde akaŋ edi; ndien ŋko akaŋ eyedu ke edem emi ke isua itiaba.

²Ndien ŋwan oro adaha ke enyɔŋ, anam ke uyo owo Abasi: ndien enye ye ufɔk esie eka ekeduŋ ke idut mme Philistine ke isua itiaba.

³Edikem ke utit isua itiaba, ŋwan oro oto ke idut mme Philistine afiak: onyuŋ aka ekeseme ɔnɔ edidem abaŋa ufɔk esie, ye iŋwaŋ esie.

⁴Ndien edidem osioŋo nneme ye Gehazi asaŋutom owo Abasi, ete, Mbɔk, buk kpukpru ikpɔ ŋkpɔ emi Elisha akanamde, nɔ mi.

⁵Edikem ke enye osuk obobuk nte enye (Elisha) akanamde akpa-mkpa eset, ɔnɔ edidem, sese, ŋwan oro enye akanamde eyen esie eset, ke eseseme ɔnɔ edidem abaŋa ufɔk esie ye iŋwan esie. Ndien Gehazi ɔdɔhɔ, ete, Ɔbɔŋ mi edidem, emi edi ŋwan oro, emi onyuŋ edi eyen esie, emi Elisha akanamde eset.

⁶Ndien ke adaŋemi edidem obupde ŋwan oro, ŋwan obuk ɔnɔ enye. Ndien edidem onim adidaha owo kiet ɔnɔ ŋwan oro, ete ɔnɔ enye kpukpru se ikenyenede enye, ye kpukpru mbuŋwum iŋwaŋ esie, ɔtɔŋɔde ke usen oro enye ɔkɔkpɔŋde edem oro, tutu osim ini emi.

⁷Ekem Elisha aka Damascus, ndien Ben-hadad edidem Syria ke ɔdɔŋɔ; ndien etiŋ enɔ enye, ete, Owo Abasi oro emedi ken.

⁸Ndien edidem ɔdɔhɔ Hazael, ete, Da enɔ ke ubɔk fo, ka kosobo ye owo Abasi oro, nyun da enye bup Jehovah, ete, Nte udɔŋɔ emi edikure mi?

⁹Ndien Hazael aka okosobo ye enye, onyuŋ ada enɔ akama ke ubɔk esie, kpa kpukpru nti ŋkpɔ Damascus, emi camel aba ebiomde, ndien aka akada enye ke iso, onyuŋ ɔdɔhɔ ete, Eyen fo Ben-hadad, edidem Syria, ɔdɔŋ mi ntiene fi, ete, Mme udɔŋɔ emi eyekure mi?

¹⁰Ndien Elisha ɔdɔhɔ enye, ete, Ka kɔdɔhɔ ete, “Idikureke kure”. Jehovah omonyuŋ asian mi, ete ke enye iditreke ndikpa.

¹¹Ndien enye owuk iso ese tutu but anam enye: owo Abasi onyuŋ atua eyet.

¹²Ndien Hazael obup ete, Ɔbɔŋ mi atua nso? Ndien enye ete, Koro mfiɔkde mme idiɔk-ŋkpɔ emi afo edinamde nditɔ Israel; afo eyekim ikaŋ ke mkpɔsɔŋ ebiet mmɔ, onyuŋ owot mkparawa mmɔ ke ofut, onyuŋ oyibi nditɔwɔŋ mmɔ, onyuŋ asiak iban mmɔ eke eyomode idibi.

¹³Ndien Hazael ɔdɔhɔ, ete, Owo fo edi nso naŋa? ebua? emi enye edinamde oruk akamba ŋkpɔ emi? Ndien Elisha ɔdɔhɔ ete, Jehovah amasian mi, ete ke afo edidi edidem Syria.

¹⁴Ndien enye ɔkpɔŋ Elisha aka ke ɔtɔ ete esie. Ndien enye (ete) obup enye, ete, Elisha ɔkɔdɔhɔ fi didie? Ndien enye ete, Enye ɔdɔhɔ mi, ete, “Udɔŋɔ eyekure fi.”

¹⁵Edikem mkpɔŋ enye ada edidobi ufuhɔ-ŋkpɔ, edebi ke mmɔŋ, ofuk enye iso, owot; ndien Hazael ada ubɔŋ ke itie esie.

¹⁶Ekem ke ɔyɔhɔ isua Joram eyen Ahab edidem Israel, ition, ke ini Jehoshaphat edide edidem Judah, Jehoram eyen Jeoshaphat edidem Judah ada ubɔŋ.

¹⁷Enye edi isua edip ye duopeba ke ini enye adade ubɔŋ, onyuŋ edi edidem ke Jerusalem ke isua itiaita.

¹⁸Ndien enye asaŋa ke usuŋ ndidem Israel, kpa nte ufɔk Ahab enamde: koro eyen Ahab edide ŋwan esie: enye onyuŋ anam idiɔk ke iso Jehovah.

¹⁹Edi Jehovah inyimeke ndibiat Judah, mbaŋa David owo esie, kpa nte enye ɔkɔŋwɔŋɔde ɔnɔ enye, ete iyeda utuenikaŋ inɔ enye, kpa nditɔ esie, ke nsinsi.

²⁰Ke eyo esie Edom esɔŋ ibuot ye Judah, enyuŋ enim owo ke edidem mmɔ,

²¹Ndien Joram ebe aka Zair, kpukpru mme chariot enyuŋ esaŋa ye enye: ndien enye adaha ke enyɔŋ ke okoneyo, aka akasuan mme Edomite emi ekande enye ekuk, ye mme etubom mme chariot: ndien kpukpru owo efeŋe eka ke mme tent mmɔ.

²²Edi Edom esɔŋ ibuot ye Judah tutu osim mfin emi. Libnah onyuŋ ɔsɔŋ ibuot ke ini oro.

²³Ndien ama edi ikɔ Joram emi esuhɔde, ye kpukppru se enye akanamde, nte iwetke mmɔ isin ke ŋwed ikɔ eyo ndidem Judah?

²⁴Ekem Joram ɔsuhɔre ana ye mme ete esie ede, onyuŋ ɔbuhɔ ke obio David ye mme ete esie: ndien Ahaziah eyen esie ada ubɔŋ ke itie esie.

²⁵Ke ɔyɔhɔ isua Joram eyen Ahab edidem Israel duopeba, Ahaziah eyen Jehoram edidem Judah ada ubɔŋ.

²⁶Ahaziah edi edidem ke Jerusalem isua kiet. Ndien enyiŋ eka esie ekere Athaliah, eyen Omri edidem Israel.

²⁷Enye onyuŋ asaŋa ke usuŋ ufɔk Ahab, onyuŋ anam idiɔk ke iso Jehovah, kpa nte ufɔk Ahab: koro enye okorode ukot ye ufɔk Ahab.

²⁸Ekem enye etiene Joram eyen Ahab, aka akaŋwana ekɔŋ ye Hazael edidem Syria ke Ramoth-gilead: ndien mme Syrian enɔ Joram unan.

²⁹Ndien edidem Joram afiak ke Jezreel, ete ikɔkɔk unan oro mme Syrian ekenɔde enye ke Ramah, ke ini enye akaŋwanade ekɔŋ ye Hazael edidem Syria. Ahaziah eyen Jehoram edidem Judah onyuŋ ɔsuhɔre aka ndise Joram eyen Ahab ke Jezreel, koro enye ɔdɔŋɔde.