Read efik 1 CHRONICLES 14 Bible Online

1 CHRONICLES 14 - efik bible

1 CHRONICLES 14

¹EKEM Hiram edidem Tyre ɔdɔŋ mme isuŋ utom ke ɔtɔ David, ye eto cedar, ye mbon-unam-ibibene, ye carpenter, ete ekebɔp ufɔk enɔ enye.

²Ndien David ɔfiɔk ete ke Jehovah otim onim imɔ ke edidem Israel; koro ubɔŋ esie emenerede ke enyɔŋ abaŋa ikɔt esie Israel.

³Ekem David ɔdɔdiɔŋ ɔdɔ iban efen ke Jerusalem: David onyuŋ obon nditɔ-iren ye nditɔ-iba efen.

⁴Ndien mme mmɔ emi edi enyiŋ nditɔ oro enye obonde ke Jerusalem; Shammua, ye Shobab, ye Nathan, ye Solomon; ye Ibhar,

⁵ye Elishua, ye Elpelet, ye Nogah,

⁶ye Nepheg; ye Japhia,

⁷ye Elishama, ye Beeliada, ye Eliphelet.

⁸Ekem adaŋemi mme Philistine ekopde, ete ke ema ekeyet David aran enim ke edidem ofuri Israel, kpukpru mme Philistine edɔk eka ndiyom David. Ndien adaŋemi David okopde, enye ɔwɔrɔ aka ɔkɔbiɔŋɔ mmɔ.

⁹Mme Philistine enyuŋ edi edifuk itihere mme Rephaim.

¹⁰Ndien David obup Abasi, ete, Nte ndɔk ŋkaŋwana ekɔŋ ye mme Philistine? Nte afo edinyuŋ ada mmɔ esin mi ke ubɔk? Ndien Jehovah ɔdɔhɔ enye, ete, Dɔk, ndien nyeda mmɔ nsin fi ke ubɔk.

¹¹Ndien mmɔ edɔk eka ke Baal-perazim; ndien David asuan mmɔ do. Ndien David ɔdɔhɔ ete, Abasi amada ubɔk mi obuŋ mme asua mi, kpa nte mmɔŋ ɔbuŋɔde ɔwɔrɔ: mmɔdo esiode ɔtɔ oro enyiŋ Baal-perazim.

¹²Mmɔ enyuŋ ekpɔŋ mme abasi mmɔ do, ndien David ɔdɔhɔ ete efɔp mmɔ ke ikaŋ.

¹³Ekem mme Philistine etɔŋɔ ntak efuk ebedeŋ oro.

¹⁴Ndien David ɔtɔŋɔ ntak obup Abasi; ndien Abasi ɔdɔhɔ enye, ete, Kubine mmɔ: wɔŋɔre kpɔŋ mmɔ, nyuŋ ka kabuat mmɔ ke edem eto mulberry oko.

¹⁵Ama ekem ke ini afo okopde uyom ntim-ikpat ke nsom mme mulberry, wɔrɔ ka ekɔŋ: koro Abasi ebemde fi iso ɔwɔrɔ ndisuan nna-ekɔŋ mme Philistine.

¹⁶Ndien David anam kpa nte emi Abasi eketemede enye: ndien mmɔ esuan nna-ekɔŋ mme Philistine, ɔtɔŋɔde ke Gibeon tutu osim ke Gezer.

¹⁷Ndien enyiŋ David asuana ke kpukpru mme idut: Jehovah onyuŋ anam kpukpru mme idut ebak enye.