Read efik 1 CHRONICLES 16 Bible Online

1 CHRONICLES 16 - efik bible

1 CHRONICLES 16

¹NTRE ke mmɔ eda ekebe Abasi eduk ekediɔk ke esit tent oro David okowukde ɔnɔ enye: mmɔ enyuŋ ewa edifɔp uwa ye uwa emem ke iso Abasi.

²Ndien adaŋemi David etrede ndifɔp edifɔp uwa ye uwa emem, enye ada enyiŋ Jehovah ɔdiɔŋ kpukpru owo.

³Onyuŋ ada ubak uyo, ye ŋwa unam, ye ebok edisat grape, edeme ɔnɔ kpukpru owo Israel kiet kiet, ke eren ye ŋwan.

⁴Enye onyuŋ ada ndusuk mme Levite emi enamde utom, onim ke iso ekebe ediomi Jehovah, ete etoro, enyuŋ ekɔm, enyuŋ ekwɔ enɔ Jehovah Abasi Israel;

⁵Asaph etubom, ye Zechariah adiana enye, ye Jeiel, ye Shemiramoth, ye Jeiel, ye Mattithiah, ye Eliab, ye Benaiah, ye Obed-edom, ye Jeiel, ekama ŋkpɔ nte psaltery ye harp; edi Asaph akama cymbal, man ebre ɔkpɔsɔŋ;

⁶Benaiah ŋko, ye Jahaziel mme oku, ekama ukorowo kpukpru ini ke iso ekebe ediomi Abasi.

⁷Ekem ke usen oro, ndien David onim (mmɔ) ke mme etubom, ete ekɔm Jehovah, ke ubɔk Asaph ye nditɔ ete esie.

⁸Mbufo ekɔm Jehovah; eseme ekot enyiŋ esie; emen se enye anamde etaŋa enɔ kpukpru owo.

⁹Ekwɔ enɔ enye; ekwɔ ikwɔ enɔ enye; ekere kpukpru mme utibe ŋkpɔ esie.

¹⁰Ebure ke edisana enyiŋ esie: yak esit adat mmɔ eke eyomde Jehovah.

¹¹Mbufo ebine Jehovah ye odudu esie; eyom iso esie kpukpru ini.

¹²Eti mme utibe ŋkpɔ esie emi enye akanamde, ŋkpɔ ndyɔ esie, ye mme item inua esie,

¹³mbufo ubon Israel owo esie, mbufo nditɔ Jacob emi enye emekde.

¹⁴Enye edi Jehovah Abasi nnyin; mme ikpe esie edu ke ofuri ererimbot.

¹⁵Mbufo eti ediomi esie ke nsinsi, ikɔ oro enye okowukde ɔnɔ tɔsin emana:

¹⁶emi enye okodiomide ye Abraham, ye uŋwɔŋɔ oro enye ɔkɔŋwɔŋɔde ɔnɔ Isaac;

¹⁷onyuŋ anam enye ɔsɔŋ ada ɔnɔ Jacob ke ewuhɔ, ɔnɔ Israel ke nsinsi ediomi, Ete,

¹⁸“Nyenɔ fi isɔŋ Canaan, ke uruk udeme mbufo;”

¹⁹ke ini mbufo miwakke, ekpride, enyuŋ edi isen owo ke esit.

²⁰Ndien ke ini mmɔ esaŋade ekpɔŋ idut kiet eka obio efen;

²¹enye iyakke owo otuk mmɔ edi ɔnɔ ndidem ufen abaŋa mmɔ ete,

²²Mbufo ekutuk enye emi nyetde aran nnim ke edidem mi, ekunyuŋ enam mme prophet mi idiɔk-ŋkpɔ.

²³Mbufo, ofuri ererimbot, ekwɔ enɔ Jehovah; ekwɔrɔ erinyaŋa esie kpukpru usen.

²⁴Etiŋ ubɔŋ esie ke otu mme idut; etiŋ mme utibe-ŋkpɔ esie ke kpukpru obio.

²⁵Koro Jehovah omokpon, onyuŋ ɔfɔn nte etorode enye eti-eti: onyuŋ ɔfɔn nte ebakde enye ekan kpukpru abasi.

²⁶Koro kpukpru abasi mme idut edi mbiet ŋkpɔ: edi Jehovah akanam enyɔŋ.

²⁷Ubɔŋ ye ukpono edu enye ke iso; odudu ye idaresit edu ke ebiet esie.

²⁸Mbufo, ubon ererimbot, enɔ Jehovah, enɔ Jehovah ukpono ye odudu.

²⁹Mbufo enɔ Jehovah ubɔŋ enyiŋ esie: emen uwa edi enye ke iso: etuak ibuot enɔ Jehovah ke uyai edisana ido.

³⁰Mbufo, ofuri ekondo, enyek idem ke iso esie: ererimbot eyesɔŋ ada, idi nyuŋ isehekede.

³¹Yak enyɔŋ edat esit, yak isɔŋ onyuŋ enem esit: yak esian mme idut, ete ke Jehovah edi edidem.

³²Yak inyaŋ okpot, ye se iyɔhɔde enye ke esit: yak obot adara, ye kpukpru se idude ke esit.

³³Ndien mme eto akai eyefiori Jehovah ke iso, koro enye edide ndikpe ikpe ekondo.

³⁴Mbufo ekɔm Jehovah; koro enye ɔfɔnde; koro ufɔn esie onyuŋ ebigide ke nsinsi.

³⁵Mbufo enyuŋ edɔhɔ, ete, Nyaŋa nnyin, O Abasi emi anyaŋade nnyin, nyuŋ sio nnyin ke mme idut, taŋ bon ɔtɔ kiet, man nnyin ikɔm edisana enyiŋ fo, inyuŋ ibure ke itoro fo.

³⁶Mbufo ekɔm Jehovah Abasi Israel ke nsinsi nsinsi. Ndien kpukpru owo ebɔ, ete, Amen, enyuŋ etoro Jehovah.

³⁷Ntre ke enye ɔkpɔŋ Asaph ye nditɔ-ete esie do ke iso ekebe ediomi Jehovah, ete enam ŋkpɔ ke iso ekebe kpukpru ini, nte ekemde kpukpru usen:

³⁸ye Obed-edom ye nditɔ-ete esie, owo ata ye itiaita; ye Obed-edom eyen Jeduthun, ye Hosah, ke mme etie-usuŋ:

³⁹ye Zadok oku, ye nditɔ ete esie, mme oku ke iso ebiet-iduŋ Jehovah, ke edikɔŋ ebiet emi odude ke Gibeon,

⁴⁰ete enye awa edifɔp uwa ɔnɔ Jehovah ke itie edifɔp uwa kpukpru ini ke usenubɔk, ye ke mbubreyo, onyuŋ anam kpukpru se ewetde ke ŋwed mbet Jehovah emi enye eketemede Israel;

⁴¹Heman, ye Jeduthun ŋko ye mmɔ, ye mbio eken emi ekemekde, emi ekewetde mmɔ enyiŋ, ete ekɔm Jehovah, koro ufɔn esie ebigide ke nsinsi;

⁴²Heman, ye Jeduthun ŋko ye mmɔ, ete enam uyom ke ukorowo, ye ke cymbal, ye ke ikwɔ, eno Abasi. Nditɔ-iren Jeduthun ŋko enyuŋ etie ke usuŋ.

⁴³Ekem kpukpru owo enyɔŋɔ ufɔk mmɔ: David onyuŋ akabare aka ndidiɔŋ ufɔk esiemɔ.