Read efik 1 CHRONICLES 17 Bible Online

1 CHRONICLES 17 - efik bible

1 CHRONICLES 17

¹EDIKEM adaŋemi David etiede ke ufɔk esiemɔ, David ɔdɔhɔ Nathan prophet, ete, Sese, ami ntie ke ufɔk cedar, ndien ekebe ediomi Jehovah etie ke idak ikpehe.

²Ndien Nathan ɔdɔhɔ David, ete, Nam kpukpru se idude fi ke esit; koro Abasi odude ye afo.

³Edikem ke okoneyo oro, uyo Abasi osim Nathan, ete,

⁴Ka kɔdɔhɔ David owo mi, ete, Ntem ke Jehovah ɔdɔhɔ ete, Idige afo edibɔp ufɔk eke nduŋde, ɔnɔ mi:

⁵koro mmenduŋke ufɔk toto ke usen oro ŋkadade Israel ndɔk, tutu osim mfin emi; edi mma ndu ke efe-efe, ye ke ataya-ataya.

⁶Ke ebiet ekededi eke ŋkasaŋade ye ofuri Israel, nte ŋkɔdɔhɔ ikɔ ye mbierikpe Israel ekededi, eke ŋketemede mmɔ nte ebɔk ikɔt mi, nte, Nsinam mbufo mibɔpke ufɔk cedar inɔ mi?

⁷Kam ndien dɔhɔ ntem ye David owo mi, ete, Ntem ke Jehovah mme udim ɔdɔhɔ, ete, Ami ŋkada fi ke ebiet ufene, ke eritiene ufene, mfep, man afo edi ɔbɔŋ ikɔt mi Israel;

⁸mma nnyuŋ ndu ye afo ke kpukpru ebiet emi afo asaŋade do, mma nnyuŋ ŋkpok kpukpru mme asua fo ke iso fo mfep, mma nnyuŋ nnam enyiŋ nnɔ fi, kpa nte enyiŋ ikpɔ owo emi edude ke ererimbot.

⁹Nnyuŋ nnam ebiet nnɔ ikɔt mi Israel, nnyuŋ ntɔ mmɔ, ndien mmɔ eyeduŋ ke esit; idinyuŋ isehekede aba; nditɔ ibak idinyuŋ itɔŋɔke aba ntak isobo mmɔ nte akpa,

¹⁰ye tutu osim ke ini oro ŋkonimde mme ebierikpe, nte ekara ikɔt mi Israel. Ndien ŋko nyesuan kpukpru mme asua fo. Ndien ŋko ndɔhɔ fi, nte ke Jehovah edinam ufɔk ɔnɔ fi.

¹¹Ama ekem ke osimde usen emi afo editienede mme usɔ, nyenam ubon fo emi editode ke nditɔ-iren fo, etiene fi edem adaha da; nyenyuŋ nnam ubɔŋ esie ɔsɔŋ ada.

¹²Enye eyebɔp ufɔk ɔnɔ mi; ndien nyenam ebekpo esie ɔsɔŋ ada ke nsinsi.

¹³Ami nyedi ete esie, ndien enye eyedi eyen mi: ndinyuŋ mbɔhɔ enye ima mi,nte emi ŋkɔbɔde enye emi ekebemde fi iso:

¹⁴edi nyenam enye etie ke ufɔk mi, ye ke obio mi ke nsinsi; ebekpo esie eyenyuŋ ɔsɔŋ ada tutu amama.

¹⁵Kpa nte kpukpru ikɔ emi ye ofuri ŋkukut emi esaŋade, kpa ntre ke Nathan ɔdɔhɔ David.

¹⁶Ndien edidem David aka eketie ke iso Jehovah, onyuŋ ɔdɔhɔ ete, Ami ndi anie, O Jehovah Abasi, ndien mme anie edi ufɔk mi, eke esinde fi ada mi osim emi?

¹⁷Ndien, O Abasi, afo ese emi ke ekpri ŋkpɔ; afo onyuŋ etiŋ abaŋa ufɔk owo fo tutu osim anyan ini onyuŋ ese mi nte udim owo eke esaŋade edɔk, O Jehovah Abasi.

¹⁸Nso ŋkpɔ efen ke David edidɔhɔ fi ndikpono owo fo, sia afo ɔfiɔkde owo fo?

¹⁹O Jehovah, afo anam ofuri ubom emi, onyuŋ ayarare ofuri ubom emi abaŋa owo fo, ye nte ekemde ima esit fo?

²⁰O Jehovah, baba kiet ibietke fi, baba Abasi kiet iduhe ke mibɔhɔke afo, kpa nte kpukpru se nnyin ikopde ke utɔŋ nnyin, etiede.

²¹Ndien anie ebiet ikɔt fo Israel, idut kiet ke ererimbot, emi Abasi akade akafak, ada ke ikɔt esiemɔ, man anam enyiŋ eke okponde, onyuŋ enyenede ndik ɔnɔ idem fo, ke eribin idut mfep ke iso ikɔt fo, emi afo akafakde ke Egypt osio?

²²Afo okonyuŋ ada ikɔt fo Israel onim ke ikɔt fo ke nsinsi; afo, O Jehovah, onyuŋ akabare edi Abasi mmɔ.

²³O Jehovah, yak ikɔ emi afo ɔdɔhɔde abaŋa owo fo, ye ufɔk esie, akam ɔsɔŋ ada ke nsinsi; nam ŋko kpa nte afo ɔkɔdɔhɔde.

²⁴Yak ɔsɔŋ ada, yak enyiŋ fo onyuŋ okpon ke nsinsi (yak enyuŋ edɔhɔ), ete, Jehovah mme udim edi Abasi Israel, kpa Abasi Israel: ndien yak ufɔk owo fo David ada ke iso fo.

²⁵Koro afo, O Abasi mi, amayarare ɔnɔ owo fo, ete ke afo edibɔp ufɔk ɔnɔ enye: mmɔdo owo fo okutde usuŋ nte ekpede fi ubɔk.

²⁶Ndien, O Jehovah, edi afo edi Abasi, afo ama onyuŋ ɔdɔhɔ ufɔn emi abaŋa owo fo:

²⁷ndien Ke emi yak enem fi ndidiɔŋ ufɔk owo fo, man enye odu fi ke iso ke nsinsi; koro afo, Jehovah, ɔdiɔŋde, ndien enye eyedi edidiɔŋ ke nsinsi.