Read efik 1 CHRONICLES 18 Bible Online

1 CHRONICLES 18 - efik bible

1 CHRONICLES 18

¹EDIKEM ke ŋkpɔ emi ema ekebe, David asuan mme Philistine, onyuŋ anam mmɔ esuhɔ, onyuŋ osio Gath ye mme obio-iŋwaŋ esie ke ubɔk mme Philistine ɔbɔ.

²Enye onyuŋ asuan Moab; ndien mme Moabite ekabare edi ikɔt David, enyuŋ etomo utomo.

³David onyuŋ asuan Hadarezer edidem Zobah, tutu osim ke Hamath, ke ini enye akade ndisɔŋɔ ubɔŋ esie ke edem akpa Euphrates.

⁴Ndien David ɔbɔ enye tɔsin chariot, ye tɔsin mbio horse itiaba, ye tɔsin mbon-ekɔŋ edip eke esaŋade ke ikpat; David onyuŋ okpok kpukpru ufene chariot akpan osip, edi osio chariot ikie ke esit onim.

⁵Ndien adaŋemi Syrian Damascus akade ndinyaŋa Hadarezer edidem Zobah, David owot mme Syrian tɔsin owo edip ye iba.

⁶David onyuŋ onim mbon-ukpeme ke Syria-Damascus; ndien Syria ekabare edi ikɔt David, enyuŋ etomo utomo. Ntre ke Jehovah anyaŋa David ke kprukpru ebiet eke enye akade.

⁷David onyuŋ ada mme otu-ekɔŋ o gold, emi ikɔt Hadarezer ekamade, emen mmɔ edi ke Jerusalem.

⁸David onyuŋ ada ata ediwak okpoho eti-eti ke Tibhath, ye ke Cun, obio Hadarezer, edi; Solomon ada enye anam mkpɔdiɔhɔ-mmɔŋ okpoho, ye mme adaha, ye mkpoduoho okpoho.

⁹Ekem Tou, edidem Hamath, okop ete ke David ama asuan ofuri udim Hadarezer edidem Zobah;

¹⁰ndien enye ɔdɔŋ Hadoram eyen esie etiene edidem David, ndikɔm enye nnyuŋ ndara enye, koro enye akaŋwanade ekɔŋ ye Hadarezer, onyuŋ asuande enye; koro Hadarezer akaŋwanade ekɔŋ ye Tou; enye onyuŋ ɔnɔ kpukpru oruk ŋkpɔ gold, ye eke silver, ye eke okpoho, esɔk enye.

¹¹Edidem David onim mme mmɔ emi ŋko ɔnɔ Jehovah, ɔkɔrɔ ye silver, ye gold oro enye ɔkɔbɔde kpukpru mme idut, ada edi, kpa Edom, ye Moab, ye nditɔ Ammon, ye mme Philistine, ye Amalek.

¹²Abishai eyen Zeruiah onyuŋ asuan Edomite, tɔsin owo efureta,

¹³ke itihere inuŋ. Enye onyuŋ onim mbon-ukpeme ke Edom; ndien ofuri Edom ekabare edi ikɔt David. Jehovah onyuŋ anyaŋa David ke kpukpru ebiet eke enye akade.

¹⁴Ntre ke David ada ubɔŋ ofuri Israel, onyuŋ ekpe edinen ikpe ɔnɔ kpukpru ikɔt esie.

¹⁵Ndien Joab eyen Zeruiah edi etubom mbon-ekɔŋ; Jehoshaphat eyen Ahilud ŋko edi andiwet ŋkpɔ obio;

¹⁶Zadok eyen Ahitub, ye Abimelech eyen Abiathar, enyuŋ edi mme oku; Shavsha onyuŋ edi andiwet ŋwed;

¹⁷ndien Benaiah eyen Jehoiada edi etubom mme Cherethite, ye eke mme Pelethite; nditɔ-iren David enyuŋ edi akpan owo ke ubɔk edidem.