Read efik 1 CHRONICLES 19 Bible Online

1 CHRONICLES 19 - efik bible

1 CHRONICLES 19

¹EDIKEM ke ŋkpɔ emi ema ekebe, Nahash edidem nditɔ Ammon akpa, ndien eyen esie ada ubɔŋ ke itie esie.

²Ndien David ɔdɔhɔ, ete, Nyefɔn ido ye Hanun eyen Nahash, koro ete esie ɔkɔfɔnde ido ye ami. Ntre ke David ɔdɔŋ mme isuŋutom ekedɔŋ enye esit, ebaŋa ete esie. Ndien ikɔt David eka ke isɔŋ nditɔ Ammon, ke ɔtɔ Hanun, ndidɔŋ enye esit.

³Ekem mbɔŋ nditɔ Ammon edɔhɔ Hanun, ete, Nte etie fi nte David okokpono usɔ, eke esinde enye ɔdɔŋ mme andidɔŋ esit etiene fi? Nte ikɔt esie idige ke ɔtɔ fo, man mmɔ eduŋɔ, enyuŋ ebiat, enyuŋ eyep idut nnyin?

⁴Ndien Hanun omum ikɔt David, okporo mmɔ idet, onyuŋ osibe mmɔ ɔfɔŋidem mbio-mbio ke ifuhi, ndien asana mmɔ ayak.

⁵Ekem eka eketiŋ enɔ David ebaŋa mbio oro; ndien enye ɔdɔŋ ekesobo ye mmɔ; koro mbio oro enyenede but eti-eti. Edidem onyuŋ ɔdɔhɔ ete, Mbufo etie ke Jericho tutu ntaŋebek mbufo ɔkɔri, ndien efiak edi.

⁶Ekem adaŋemi nditɔ Ammon ekutde, ete ke mmimɔ imetebe David, Hanun ye nditɔ Ammon enɔ tɔsin talent silver, ete ekekpe chariot, ye mbon horse enɔ idem mmɔ ke Mesopotamia, ye ke Aram-maacah, ye ke Zobah.

⁷Ntem ke mmɔ ekpe tɔsin chariot edip ye duopeba, ye edidem Maacah, ye ikɔt esie, enɔ idem mmɔ; ndien mmɔ eka ekena ke iso Medeba. Nditɔ Ammon ŋko enyuŋ eto ke mme obio mmɔ edibono, enyuŋ eka ekɔŋ.

⁸Ekem adaŋemi David okopde, enye ɔdɔŋ Joab aka ye ofuri udim mbon uko.

⁹Ndien nditɔ Ammon ewɔŋɔ ke usuŋ obio, eketim udim-ekɔŋ: ndidem oro eketode edi, enyuŋ edu ke idem mmɔ ke ntaŋwaŋ ebiet.

¹⁰Ekem ke ini Joab okutde ete ke ekɔŋ odu imɔ ke iso ye ke edem, enye asat kpukpru akpan-akpan owo ke Israel onim, ete ebiɔŋɔ Syria.

¹¹Enye onyuŋ ada mmɔ eke esuhɔde, esin Abishai eyen ete esie ke ubɔk, ndien mmɔ etim udim, ete ibiɔŋɔ nditɔ Ammon.

¹²Ndien enye ɔdɔhɔ ete, Edieke Syria esɔŋde ekan mi, di di ŋwam mi: nditɔ Ammon ŋko ema esɔŋ ekan fi, ami nyeŋwam fi.

¹³Sɔŋ esit, yak nnyin idaha uko ibaŋa oruk nnyin ye mme obio Abasi nnyin; yak Jehovah onyuŋ anam se enye amade.

¹⁴Ntre ke Joab ye mmɔ eke edude ye enye, eda ekɔŋ eyi ye mme Syrian; ndien mmɔ efeŋe enye ke iso.

¹⁵Ndien ke ini nditɔ Ammon ekutde ete ke Syria efeŋe, mmɔ enyuŋ efeŋe ŋko ke iso Abishai eyen-ete esie, enyuŋ eduk ke obio. Ndien Joab ɔnyɔŋ ke Jerusalem.

¹⁶Ekem adaŋemi Syria ekutde ete ke Israel emesuan mmimɔ mmɔ edɔŋ mme isuŋutom ekekot mme Syrian ke edem akpa oko, ete ewɔŋɔ edi; ndien Shophach, etubom mbon ekɔŋ Hadarezer, edi etubom mmɔ.

¹⁷Ekem etiŋ enɔ David; ndien enye obon ofuri Israel, onyuŋ ebe Jordan, aka okosim mmɔ, onyuŋ otim udim ekɔŋ ɔbiɔŋɔ mmɔ. Ndien adaŋemi David okotimde udim ekɔŋ ɔbiɔŋɔ mme Syrian, mmɔ eŋwana ye enye.

¹⁸Edi Syria efeŋe ke iso Israel; David onyuŋ owot Syria tɔsin chariot itiaba, ye mbon-ekɔŋ eke esaŋade ke ikpat, tɔsin owo aba, onyuŋ owot Shophach etubom mbon-ekɔŋ oro.

¹⁹Ekem ke ini ikɔt Hadarezer ekutde ete ke Israel emekan mmimɔ, mmɔ ekɔŋɔ mfaŋ enɔ David, enyuŋ ekabare edi ikɔt esie: Syria inyuŋ inyimeke aba ndiŋwam nditɔ Ammon.