Read efik 1 CHRONICLES 22 Bible Online

1 CHRONICLES 22 - efik bible

1 CHRONICLES 22

¹NDIEN David ɔdɔhɔ, ete, Emi edi ufɔk Jehovah Abasi emi onyuŋ edi itie edifɔp-uwa Israel.

²Ndien David ɔdɔhɔ ete ebon isen owo eke edude ke isɔŋ Israel; enye onyuŋ onim mbon usɔ-itiat eke ediɔŋde itiat ubɔp ufɔk Abasi.

³David onyuŋ obon ediwak ukwak, ke eke ɔkpɔ ukwak itim enyin-usuŋ, ye ke eke ntok; ye ediwak okpoho emi midomoke;

⁴ye eto cedar eke minyeneke ibat: koro mbio Zidon ye eke Tyre edade eto cedar ediwak esɔk David.

⁵Ndien David ɔdɔhɔ, ete, Solomon eyen mi edi ekpri eyen-ɔwɔŋ, inyuŋ isɔŋke, ndien ufɔk eke ekpebɔpde enɔ Jehovah enyene ndikpon eti-eti, man enye enyene etop ye itoro ke otu kpukpru mme idut; yak ami mbon ndien ŋkpɔ nnɔ enye. Ntre ke David obon ediwak ŋkpɔ ke enye mika-ikpaha kaŋa.

⁶Ekem enye okot Solomon eyen esie edi, ndien eteme enye, ete ɔbɔp ufɔk ɔnɔ Jehovah Abasi Israel.

⁷Ndien David ɔdɔhɔ Solomon eyen esie, ete, Ŋkɔm okodu mi ke esit ndibɔp ufɔk nnɔ enyiŋ Jehovah Abasi mi:

⁸edi uyo Jehovah okosim mi, ete, Afo ama ɔduɔk iyip ediwak, ama onyuŋ aŋwana ikpɔ ekɔŋ: idige afo edibɔp ufɔk ɔnɔ enyiŋ mi, koro ama ɔduɔk ediwak iyip ke isɔŋ ke iso mi.

⁹Sese, eyen eyemana ɔnɔ fi eke edidide owo nduɔk-odudu; nyenyuŋ nnam enye ɔbɔhɔ kpukpru mme asua esie eke ekande enye ekuk, ɔduɔk odudu: koro enyiŋ esie eyekere Solomon, ndien nyenɔ Israel ifure ke eyo esie.

¹⁰Enye eyebɔp ufɔk ɔnɔ enyiŋ mi; eyenyuŋ odu ye ami nte eyen, ami nyenyuŋ ndu ye enye nte ete; nyenyuŋ ŋwuk ebekpo ubɔŋ esie ke Israel ke nsinsi.

¹¹Yak Jehovah ndien akam odu ye afo, eyen mi; afo akam onyuŋ okut unen, onyuŋ ɔbɔp ufɔk Jehovah Abasi fo, kpa nte enye ɔkɔdɔhɔde abaŋa fi.

¹²Yak Jehovah akam ɔnɔ fi ikike ye asian, onyuŋ eteme fi abaŋa Israel, man afo onim mbet Jehovah Abasi fo.

¹³Afo eyekut unen, ndien, edieke edikpemede ndinim mme ewuhɔ ye mme item emi Jehovah okowukde Moses abaŋa Israel: sɔŋ esit, sɔŋ idem; kufehe, kunyuŋ udikhe.

¹⁴Ndien, sese, ke ukut mi mma mbon tɔsin talent gold ke itie ikie, nnɔ ufɔk Jehovah, ye tɔsin talent silver ke itie tɔsin; edi idomoke okpoho ye ukwak: koro mmɔ ewakde eti-eti; mma nnyuŋ mbon eto ye itiat; afo eyenyuŋ adian efen ke mmɔ.

¹⁵Mbon utom ediwak enyuŋ edu ye afo, mme ndisɔi-itiat, ye mbon usɔ-eto, ye kpukpru owo eke efiɔkde kpukpru oruk utom.

¹⁶Ndien idomoke gold, ye silver, ye okpoho, ye ukwak. Daha ke enyɔŋ nam, ndien Jehovah eyedu ye afo.

¹⁷Ndien David owuk kpukpru mbɔŋ Israel, ete eŋwam Solomon eyen imɔ, ete,

¹⁸Nte Jehovah Abasi mbufo iduhe ye mbufo? nte enye ikɔnɔŋɔ mbufo nduɔk-odudu ikan ikuk? koro enye ama ada mme andiduŋ isɔŋ esin mi ke ubɔk; isɔŋ onyuŋ osuk ibuot ke iso Jehovah, ye ke iso ikɔt esie.

¹⁹Mbufo esin ndien esit mbufo, ye ukpɔŋ mbufo, eyom Jehovah Abasi mbufo: edaha ke enyɔŋ ndien, ebɔp edisana iduŋ Jehovah Abasi, enyuŋ eda ekebe ediomi Jehovah, ye edisana ŋkpɔ utom Abasi, enim ke ufɔk eke ebɔpde enɔ enyiŋ Jehovah.