Read efik 1 CHRONICLES 27 Bible Online

1 CHRONICLES 27 - efik bible

1 CHRONICLES 27

¹NDIEN mme mmɔ emi edi nditɔ Israel ke ibat mmɔ, kpa mme etubom mme ete, mbɔŋ mme tɔsin ye eke mme ikie, ye mme ndidaha mmɔ emi esaŋade utom edidem ke kpukpru ŋkpɔ mme ŋka, eke edukde, enyuŋ ewɔrɔde ke ɔfiɔŋ, ke ɔfiɔŋ, ke kpukpru ɔfiɔŋ ke isua, ŋka kiet edi tɔsin owo ke itie edip ye inaŋ.

²Jashobeam eyen Zabdiel akara akpa ŋka akpa ɔfiɔŋ: ndien tɔsin owo edip ye inaŋ edu ke ŋka esie.

³Enye oto ke nditɔ Perez etubom kpukpru mbɔŋ mbon-ekɔŋ akpa ɔfiɔŋ.

⁴Ndien Dodai Ahohite akara ŋka udiana-akpa ɔfiɔŋ, ndien Mikloth edi ɔbɔŋ ŋka esie: ŋka esie onyuŋ edi tɔsin owo edip ye inaŋ.

⁵Ɔyɔhɔ etubom mbon-ekɔŋ ita, ke ɔyɔhɔ ɔfiɔŋ ita, edi Benaiah eyen Jehoiada, akamba ɔbɔŋ: ndien tɔsin owo edip ye inaŋ edu ke ŋka esie.

⁶Enye Benaiah okpon ke otu owo edip ye duop oro, onyuŋ akan mbedip ye duop: Ammizabad eyen esie onyuŋ odu ke ŋka esie.

⁷Ɔyɔhɔ etubom inaŋ, ke ɔyɔhɔ ɔfiɔŋ inaŋ, edi Asahel eyen eka Joab, ndien Zebadiah eyen esie adiana enye: tɔsin owo edip ye inaŋ enyuŋ edu ke ŋka esie.

⁸Ɔyɔhɔ etubom ition, ke ɔyɔhɔ ɔfiɔŋ ition, edi Shamhuth Izrahite: tɔsin owo edip ye inaŋ enyuŋ edu ke ŋka esie.

⁹Ɔyɔhɔ etubom itiokiet, ke ɔyɔhɔ ɔfiɔŋ itiokiet, edi Ira eyen Ikkesh a Tekoite: tɔsin owo edip ye inaŋ enyuŋ edu ke ŋka esie.

¹⁰Ɔyɔhɔ etubom itiaba, ke ɔyɔhɔ ɔfiɔŋ itiaba, edi Helez Pelonite, emi otode ke nditɔ Ephraim: ndien tɔsin owo edip ye inaŋ edu ke ŋka esie.

¹¹Ɔyɔhɔ etubom itiaita, ke ɔyɔhɔ ɔfiɔŋ itiaita, edi Sibbecai Hushathite, emi otode ke mme Zerahite: ndien tɔsin owo edip ye inaŋ edu ke ŋka esie.

¹²Ɔyɔhɔ etubom usukkiet, ke ɔyɔhɔ ɔfiɔŋ usukkiet, edi Abiezer Anathothite, emi otode ke mme Benjamite: ndien tɔsin owo edip ye inaŋ edu ke ŋka esie.

¹³Ɔyɔhɔ etubom duop, ke ɔyɔhɔ ɔfiɔŋ duop, edi Maharai Netophathite emi otode ke mme Zerahite: tɔsin owo edip ye inaŋ enyuŋ edu ke ŋka esie.

¹⁴Ɔyɔhɔ etubom duopekiet, ke ɔyɔhɔ ɔfiɔŋ duopekiet, edi Benaiah Pirathonite, emi otode ke nditɔ Ephraim: ndien tɔsin owo edip ye inaŋ edu ke ŋka esie.

¹⁵Ɔyɔhɔ etubom duopeba, ke ɔyɔhɔ ɔfiɔŋ duopeba, edi Heldai Netophathite, ubon Othniel: ndien tɔsin owo edip ye inaŋ edu ke ŋka esie.

¹⁶Ndien ŋko mme etubom mme esien Israel; ɔbɔŋ mme Reubenite edi Eliezer eyen Zichri; eke mme Simeonite, Shephatiah eyen Maacah:

¹⁷eke mme Levite, Hashabiah eyen Kemuel: eke mme Aaronite, Zadok:

¹⁸eke Judah, Elihu, owo nditɔ-ete David kiet: eke Issachar, Omri eyen Michael; eke Zebulun,

¹⁹Ishmaiah eyen Obadiah; eke Naphtali, Jeremoth eyen Azriel:

²⁰eke nditɔ Ephraim, Hoshea eyen Azaziah; eke ubak esien Manasseh, Joel eyen Pedaiah;

²¹eke ubak esien Manasseh; ke Gilead, Iddo eyen Zechariah; eke Benjamin, Jaasiel eyen Abner:

²²eke Dan, Azarel eyen Jeroham. Mme mmɔ emi edi mbɔŋ mme esien Israel.

²³Edi David ibatke mmɔ eke edide isua edip, ye mmɔ eke misimke oro: koro Jehovah ɔkɔdɔhɔde, ete ke imɔ iyenam Israel ewak nte ntantafiɔŋ enyɔŋ.

²⁴Joab eyen Zeruiah ɔkɔtɔŋɔ ndibat, edi ibatke ima, ndien iyaresit oto do odoro Israel: ndien ibat oro isineke ke ibat ikɔ eyo edidem David.

²⁵Ndien Azmaveth eyen Adiel edi etubom unim-ŋkpɔ edidem: Jeonathan eyen Uzziah onyuŋ edi etubom unim-ŋkpɔ ke iŋwaŋ, ye ke obio, ye ke mme obio iŋwaŋ, ye ke mme tower;

²⁶Ezri eyen Chelub onyuŋ edi etubom mbon utom-iŋwaŋ ke erifuŋ isɔŋ.

²⁷Ndien etubom mme iŋwaŋ vine edi Shimei a Ramathite: etubom se idude ke iŋwaŋ-vine ke ebiet unim-wine edi Zabdi Shiphmite:

²⁸Baal-hanan Gederite onyuŋ edi etubom eto olive, ye eke sycamore eke edude ke una-isɔŋ edem inyaŋ: Joash ŋko edi etubom unim-aran.

²⁹Shitrai Sharonite kiet onyuŋ edi etubom mme enaŋ eke ebɔkde ke Sharon; Shaphat eyen Adlai onyuŋ edi etubom mme enaŋ ke mme itihere:

³⁰Obil eyen Ishmaelite kiet onyuŋ edi etubom mme camel: Jehdeiah Meronothite kiet onyuŋ edi etobom mme ass:

³¹ndien Jaziz Hagrite kiet edi etubom ŋkpri ufene. Kpukpru mmɔ emi edi mbɔŋ inyene emi enyenede edidem David.

³²Ndien Jonathan eyen-ete ete David edi owo item emi edide asian, onyuŋ ɔfiɔkde ŋwed: Jehiel eyen Hachmoni onyuŋ odu ye nditɔ edidem:

³³Ahitophel ŋko edi ɔnɔ edidem item: ndien Hushai Arkite onyuŋ edi ufan edidem:

³⁴Jehoiada eyen Benaiah, ye Abiathar enyuŋ ediana Ahitophel: Joab ŋko onyuŋ edi ɔbɔŋ mbon-ekɔŋ edidem.