Read efik 1 CHRONICLES 28 Bible Online

1 CHRONICLES 28 - efik bible

1 CHRONICLES 28

¹EKEM David osop kpukpru mbɔŋ Israel, mbɔŋ mme esien ye mbɔŋ mme ŋka, eke esaŋade utom edidem, ye mbɔŋ mme tɔsin, ye mbɔŋ mme ikie, ye mbɔŋ kpukpru inyene ye ufene edidem, ye eke nditɔ esie, ye mme ndidaha, ye mkpɔsɔŋ owo, ye kpukpru mbon-uko, ke Jerusalem.

²Ndien David edidem adaha ke enyɔŋ ada ke ukot esie, onyuŋ ɔdɔhɔ, ete, Mbufo nditɔ-ete mi, ye ikɔt mi, ekop uyo mi: ami ŋkekere ke esit mi ndibɔp ufɔk nduɔk-odudu nnɔ ekebe ediomi Jehovah, ye ke udorukot Abasi nnyin, mma nnyuŋ ntim ŋkpɔ ubɔp ufɔk:

³edi Abasi ɔdɔhɔ mi, ete, Idige afo edibɔp ufɔk ɔnɔ enyiŋ mi; koro afo edide owo ekɔŋ onyuŋ ɔduɔkde iyip.

⁴Edi Jehovah Abasi Israel ekemek mi, ke edidem ofuri israel ɔkpɔŋ ofuri ufɔk ete mi, ete ndi edidem Israel ke nsinsi: koro enye emekde Judah onim ke ɔbɔŋ; onyuŋ emek ufɔk ete mi ke otu ufɔk Judah; onyuŋ ama mi ke otu nditɔ-ete mi, ndien onim mi

⁵Ndien ke otu kpukpru nditɔ-iren mi (koro Jehovah ama ɔnɔ mi ediwak nditɔ-iren,) enye onyuŋ emek Solomon eyen mi, ete etie ke ebekpo ubɔŋ Jehovah akan Israel.

⁶Enye onyuŋ ɔdɔhɔ mi, ete, Edi Solomon eyen fo edibɔp ufɔk mi, ye mme okure mi: koro mmemek enye ke idemmi nnim ke eyen, ami nyenyuŋ ndi ete esie.

⁷Nyenyuŋ ndiɔŋ ubɔŋ esie nnim ke nsinsi, edieke enye edisɔŋde anam mme ewuhɔ mi ye mme item mi, kpa nte ke mfin emi.

⁸Mbufo ekpeme, ndien, enyuŋ eyom kpukpru mbet Jehovah Abasi mbufo, ke enyin ofuri Israel, esop Jehovah, ye ke utɔŋ Abasi nnyin; man mbufo enyene eti isɔŋ emi, enyuŋ eda enye enɔ nditɔ mbufo eke editienede mbufo ke edem, edia ke nsinsi.

⁹Ndien afo Solomon eyen mi, fiɔk Abasi usɔ, nyuŋ nam ŋkpɔ esie ke ofuri esit, ye ke ima ukpɔŋ: koro Jehovah ɔduŋɔde kpukpru esit owo, onyuŋ otim ɔfiɔk kpukpru se ekikere obotde: afo ama oyom enye, eyekut enye; edi ama ɔkpɔŋ enye, enye eyemen fi ɔduɔk tutu amama.

¹⁰Kpeme idem, ndien; koro Jehovah emekde fi, ete ɔbɔp ufɔk ɔnɔ edisana ebiet: sɔŋ ubɔk nam.

¹¹Ndien David ɔnɔ Solomon eyen esie ŋwed etehe, ye eke ufɔk esie, ye eke mme ebiet unim-ŋkpɔ-uto esie, ye eke mme ubet enyɔŋ esie, ye eke mme ubet esit ufɔk esie, ye eke ubet itie-usio-isop:

¹²ye ŋwed kpukpru se spirit eketemede enye abaŋa okure ufɔk Jehovah, ye kpukpru ubet emi ekande ekuk, ye ebiet-unim-ŋkpɔ ufɔk Abasi, ye unim ŋkpɔ eke enimde enɔ Abasi:

¹³ye ŋka mme oku, ye eke mme Levite, ye kpukpru se enamde ke utom ufɔk Jehovah, ye kpukpru ŋkpɔ unam utom ufɔk Jehovah;

¹⁴ye gold nte edomode gold enɔ kpukpru ŋkpɔ oruk utom ekededi; ye kpukpru ŋkpɔ silver nte edomode enɔ kpukpru oruk utom ekededi:

¹⁵ekem ke udobi kpukpru udiɔk utuenikaŋ o gold kiet, kiet, ye mme utuenikaŋ o gold mmɔ, ye udiɔk-utuenikaŋ silver, ke udop udiɔk ye utuenikaŋ esie, kpa nte utom kpukpru udiɔk utuenikaŋ asaŋade:

¹⁶ye udobi gold ke okpokoro udiɔk uyo, ke eke kpukpru okpokoro; ye silver ke eke okpokoro silver;

¹⁷ye eti gold ke mme fork, ye mme bowl, ye mme cup: ye ke utɔhɔ-ubɔk gold, nte udop kpukpru utɔhɔ-ubɔk edide; ye ke utɔhɔ-ubɔk silver ke udop utɔhɔ-ubɔk,:

¹⁸ye ata eti gold ke itie ufɔp incense ekem ke udop esie; ye ŋwed mbiet chariot mme cherubim o gold eke etatde mba mmɔ, enyuŋ efukde ekebe ediomi Jehovah.

¹⁹(David ete,) Jehovah akasian mi kpukpru mmɔ emi ke ŋwed eke otode enye ke ubɔk, kpa ofuri utom ŋwed oruk emi.

²⁰Ndien David ɔdɔhɔ Solomon eyen esie, ete, Sɔŋ idem, sɔŋ esit, nyuŋ nam: kufehe, kunyuŋ udikhe: koro Jehovah Abasi, Abasi mi, odude ye afo; enye idimenke fi iduɔk, idinyuŋ ikpɔŋke fi, tutu afo ama ofuri utom usɔ ufɔk Jehovah.

²¹Sese, ŋko afo emenyene ŋka mme oku ye mme Levite ke kpukpru utom ufɔk Abasi ndien kpukpru owo eke enyimede, enyuŋ enyenede ifiɔk kpukpru oruk usɔ edu mi ye afo, ke ofuri oruk utom: ndien mbɔŋ ye mbio-obio eyekop kpukpru uyo fo.