Read efik 2 CHRONICLES 10 Bible Online

2 CHRONICLES 10 - efik bible

2 CHRONICLES 10

¹EKEM Rehoboam aka ke Shechem: koro ofuri Israel edide ke Shechem ndinim enye ke edidem.

²Edikem adaŋemi Jeroboam eyen Nebat emi odude ke Egypt, emi enye ekefehede ɔbɔhɔ Solomon edidem aka do, okopde, ndien Jeroboam oto ke Egypt afiak edi.

³Ndien mmɔ edɔŋ ekekot enye edi. Ndien Jeroboam ye ofuri Israel edidɔhɔ Rehoboam, ete,

⁴Usɔ akanam ɔkpɔnɔ nnyin odobi; kam biomere nnyin usuk ɔkpɔsɔŋ utom usɔ, ye edidobi ɔkpɔnɔ esie emi enye ye edidobi ɔkpɔnɔ esie emi enye okodoride nnyin, fep, ndien nnyin iyedi ikɔt fo.

⁵Ndien enye ɔdɔhɔ mmɔ, ete, Usen ita ema ebe, mbufo efiak etiene mi. Ndien mmɔ enyɔŋɔ.

⁶Ndien edidem Rehoboam osop ibuot ye mbiowo oro ekedade ke iso Solomon ete esie, adaŋemi enye odude uwem, ete Mbufo eteme didie, nte ndibɔrɔde mbon emi?

⁷Ndien mmɔ ebɔrɔ enye, ete, Afo ama ɔfɔn ido ye mbon emi, ama onyuŋ enem mmɔ esit, onyuŋ ɔdɔhɔ eti ikɔ ye mmɔ, mmɔ eyedi ikɔt fo ke nsinsi.

⁸Edi enye ɔkpɔŋ item mbiowo oro eketemede enye, ndien okosop ibuot ye mkparawa oro ekekɔride ye enye, enyuŋ edade enye ke iso.

⁹Ndien enye obup mmɔ, ete, Mbufo eteme didie, man nnyin ikpɔbɔrɔ mmɔ oro ekedɔhɔde mi, ete, Nam ɔkpɔnɔ emi usɔ okodoride nnyin efere?

¹⁰Ndien mkparawa oro ekekɔride ye enye edɔhɔ enye, ete, Ntem ke afo edibɔrɔ mbio oro ekedɔhɔde fi, ete, Usɔ akanam ɔkpɔnɔ odobi nnyin, edi afo nam enye efere nnyin; dɔhɔ mmɔ ntem, ete, Ekpri nnuen-ubɔk mi eyekpon akan isin ete mi.

¹¹Ndien ŋko ete mi okodori mbufo edidobi mbiomo, edi ami nyedɔdiɔŋ ŋkɔrɔ efen ke ɔkpɔnɔ mbufo: ete mi akada ikpa amia mbufo, edi ami nyeda scorpion.

¹²Ekem Jeroboam ye kpukpru owo eka ke ɔtɔ Rehoboam, ke ɔyɔhɔ usen ita, kpa nte edidem ɔkɔdɔhɔde ete, Mbufo efiak etiene mi ke ɔyɔhɔ usen ita.

¹³Ndien edidem ɔbɔrɔ mmɔ uyat-uyat; edidem Rehoboam onyuŋ ɔkpɔŋ item mbiowo;

¹⁴ndien ɔbɔrɔ mmɔ esin ke item mkparawa, ete, Ete mi akanam ɔkpɔnɔ odobi mbufo, edi ami nyekɔrɔ efen ke esit; ete mi akada ikpa amia mbufo, edi ami nyeda scorpion.

¹⁵Ntre edidem ikopke uyo mmɔ oro: koro edide Abasi ekesin ɔwɔrɔ ntem, kpaŋ Jehovah akpanam uyo esie osu, emi enye akadade inua Ahijah Shilonite ɔdɔhɔ Jeroboam eyen Nebat.

¹⁶Ndien adaŋemi ofuri Israel ekutde, ete ke edidem ikopke uyo mmimɔ, mbon oro ebɔrɔ edidem, ete, Ewe ubak ke nnyin inyene ke David? Nnyin inyuŋ inyeneke udeme eyen Jesse. Yak kpukpru owo enyɔŋɔ ke mme tent mmɔ, O Israel! David, se ndien ufɔk fo. Ndien ofuri Israel enyɔŋɔ ke tent mmɔ.

¹⁷Edi ama edi nditɔ Israel emi eduŋde ke mme obio Judah, Rehoboam edi edidem mmɔ.

¹⁸Ekem Rehoboam edidem ɔdɔŋ Hadoram emi edide etubom mbon-utomo; ndien nditɔ Israel etɔŋɔ enye ke itiat ewot: ndien edidem Rehoboam awara ɔdɔk ke chariot esie ɔnyɔŋ ke Jerusalem.

¹⁹Ntre ke Israel esɔŋ ibuot ye ufɔk David tutu osim mfin emi.