Read efik 2 CHRONICLES 12 Bible Online

2 CHRONICLES 12 - efik bible

2 CHRONICLES 12

¹EDIKEM adaŋemi Reho-boam ama ɔkɔdiɔŋ onim ubɔŋ, onyuŋ ɔsɔŋɔ itie esie, enye ye ofuri Israel ŋko ekpɔŋ mbet Jehovah.

²Edikem ke ɔyɔhɔ isua Rehoboam ition, Shishak edidem Egypt ɔdɔk edi ekɔŋ ke Jerusalem, koro mmɔ ekeduede Jehovah,

³asaŋa ye tɔsin chariot ikie itie duopeba, ye tɔsin mbio horse ata; ndien mmɔ eke etode ke Egypt esaŋa ye enye, mme Lubim, ye mme Sukkiim, ye mme Ethiopian, inyeneke ibat.

⁴Ndien enye ada obio ibibene eke edude ke Judah, onyuŋ osim ke Jerusalem.

⁵Ndien Shemaiah prophet edi ke ɔtɔ Rehoboam, ye eke mbɔŋ Judah emi ebonode ke Jerusalem ebaŋa Shishak, edidɔhɔ mmɔ, ete, Ntem ke Jehovah ɔdɔhɔ, ete, Mbufo ema ekpɔŋ mi, ami nde mmonyuŋ ŋkpɔŋ mbufo ke ubɔk Shishak.

⁶Ndien mbɔŋ Israel ye edidem esuhɔre idem mmɔ enim; enyuŋ edɔhɔ, ete, Jehovah emenen.

⁷Edi adaŋemi Jehovah okutde, ete ke mmɔ esuhɔre idem mmɔ enim, uyo Jehovah osim Shemaiah, ete, Mmɔ ema esuhɔre idem mmɔ enim: ndisoboke mmɔ, edi nyenɔ mmɔ ubɔhɔ ini esesit; ndidaha ubɔk Shishak ntɔhɔ Jerusalem ifuresit mi ke esit.

⁸Edi mmɔ eyedi ikɔt esie; ndien mmɔ eyefiɔk utom mi, ye utom mme idut ererimbot.

⁹Ndien Shishak, edidem Egypt, ɔdɔk aka ke Jerusalem, akada ŋkpɔ-uto ufɔk Jehovah, ye ŋkpɔ-uto ufɔk edidem; enye ada kpukpru; onyuŋ ada otu-ekɔŋ o-gold oro Solomon akanamde.

¹⁰Ndien edidem Rehoboam anam otu-ekɔŋ ke okpoho onim ke itie mmɔ, ada mmɔ esin ke ubɔk mbon-ukpeme emi ekpemede inua-otop ufɔk edidem.

¹¹Edikem adaŋa ini nte edidem odukde ke ufɔk Jehovah, mbon-ukpeme edi edikama mmɔ, ndien etɔŋɔ ntak eda mmɔ ekenim ke ubet mbon-ukpeme.

¹²Ndien adaŋemi enye osukde idem esie, iyaresit Jehovah akabare ɔkpɔŋ enye, Enye inyuŋ isoboke enye fap: ndien ŋko, nti ŋkpɔ enyuŋ edu ke Judah.

¹³Ntem ke edidem Rehoboam ɔsɔŋ itie esie ke Jerusalem, onyuŋ ada ubɔŋ, koro Rehoboam osimde isua aba ye kiet ke ini enye adade ubɔŋ, enye onyuŋ edi edidem ke isua efureba ke Jerusalem, obio emi Jehovah ekemekde ke kpukpru esien Israel, ndinim enyiŋ esie do: enyiŋ eka esie onyuŋ ekere Naamah, ŋwan Ammon.

¹⁴Enye onyuŋ anam idiɔk, koro miwukke esit esie ndiyom Jehovah.

¹⁵Ndien ama edi ikɔ Rehoboam, mbem-iso ye akpatre, nte ikewetke mmɔ isin ke ŋwed Shemaiah prophet, ye ke eke Iddo okut-ŋkukut, nte emi ewetde ŋwed emana?

¹⁶Ndien Rehoboam aŋwana ekɔŋ ye Jeroboam kpukpru ini. Ekem Rehoboam ɔsuhɔre ana ye mme ete esie ede, onyuŋ ɔbuhɔ ke obio David: ndien Abijah eyen esie ada ubɔŋ ke itie esie.