Read efik 2 CHRONICLES 14 Bible Online

2 CHRONICLES 14 - efik bible

2 CHRONICLES 14

¹EKEM Abijah ɔsuhɔre ana ye mme ete esie ede, ndien ebuk enye ke obio David; ndien Asa eyen esie ada ubɔŋ ke itie esie. Ke eyo esie isɔŋ ana suŋ ke isua duop.

²Ndien Asa anam se ifɔnde inyuŋ inende ke iso Jehovah Abasi esie;

³onyuŋ osioŋo mme itie-uwa isen abasi, ye mme edikoŋ ebiet efep, onyuŋ obom mme adaha, onyuŋ asiak mbio eto;

⁴onyuŋ owuk Judah, ete eyom Jehovah Abasi mme ete mmɔ enyuŋ enim mbet ye ewuhɔ.

⁵Enye onyuŋ osioŋo mme edikoŋ ebiet ye mbiet ŋkpɔ ke kpukpru obio Judah efep: ndien isɔŋ (Judah) ana suŋ ke iso esie.

⁶Ndien enye ɔbɔp mkpɔsɔŋ obio ke Judah: koro isɔŋ anade suŋ, enye inyuŋ iŋwanake ekɔŋ ke mme isua oro: koro Jehovah ɔkɔnɔde enye nduɔk-odudu.

⁷Ndien enye ɔdɔhɔ Judah, ete, Eyak nnyin ibɔp mme obio emi, inam ibibene ikan mmɔ ikuk, ye tower, ye itim, ye eto-usuŋ, adaŋemi isɔŋ anade kaŋa ke iso nnyin: koro nnyin ima iyom Jehovah Abasi nnyin, nnyin ima iyom enye, ndien enye ɔnɔ nnyin nduɔk-odudu ke edem kpukpru. Ntre ke mmɔ ebɔp, enyuŋ ekut unen.

⁸Ndien Asa enyene mbon-ekɔŋ eke ekamade otu-ekɔŋ ye eduat, eke Judah, tɔsin owo ikie ita; ye nditɔ Benjamin, eke ekamade ŋkpri otu-ekɔŋ enyuŋ etopde utiga, tɔsin owo itie ikie iba ye tɔsin anaŋ: kpukpru mmɔ emi edi mbon-uko.

⁹Ekem Zerah Ethiopian ada udim tɔsin, tɔsin owo ke itie tɔsin, ye tɔsin chariot ita, ɔwɔrɔ edi ekɔŋ ye mmɔ; ndien edi ke Mareshah.

¹⁰Ndien Asa ɔwɔrɔ aka ekɔŋ ye enye, ndien mmɔ etim udim-ekɔŋ ke ebedeŋ Zephathah ke Mare-shah.

¹¹Ndien Asa eseme ɔnɔ Jehovah Abasi esie, ete, O Jehovah baba kiet ke mibɔhɔke afo ikemeke ndinyaŋa ke ufɔt mkpɔsɔŋ owo ye mmeme: nyaŋa nnyin, O Jehovah Abasi nnyin; koro nnyin ibɔbuɔt idem nnyin ye afo, inyuŋ ida enyiŋ fo ika ndiŋwana ye akwa otu emi. O Jehovah, afo edi Abasi nnyin; kuyak owo ɔsɔŋ akan fi.

¹²Ndien Jehovah asuan mme Ethiopian ke iso Asa, ye ke iso Judah; ndien mme Ethiopian efeŋe.

¹³Ndien Asa ye mmɔ eke edude ye enye ebine mmɔ tutu esim ke Gerar: ndien mme Ethiopian eduɔŋɔ, tutu mmɔ inyeneke se idude uwem: koro mmɔ enuahade ke iso Jehovah, ye ke iso udim esie; ndien mmɔ etaŋ ediwak mbume:

¹⁴mmɔ enyuŋ esuan kpukpru obio eke ekande Gerer ekuk; koro ndik Jehovah odorode mmɔ; enyuŋ ebume kpukpru obio oro: koro ediwak mbume edude mmɔ ke esit.

¹⁵Mmɔ enyuŋ esuan mme ataya ufene, enyuŋ etaŋ ediwak ŋkpri ufene, ye camel, ndien enyɔŋɔ ke Jerusalem.