Read efik 2 CHRONICLES 15 Bible Online

2 CHRONICLES 15 - efik bible

2 CHRONICLES 15

¹EKEM spirit Abasi oduk Azariah eyen Oded ke idem:

²ndien enye ɔwɔrɔ okosobo ye Asa, onyuŋ ɔdɔhɔ enye, ete: Asa ye ofuri Judah ye Benjamin, mbufo ekop uyo mi, Jehovah ada ye mbufo ke ini mbufo ededa ye enye; ndien edieke mbufo ediyomde enye, mbufo eyekut enye; edi edieke mbufo edikpɔŋde enye, enye eyekpɔŋ mbufo.

³Usen enyuŋ ewak emi Israel minyeneke Abasi akpanikɔ, minyuŋ inyeneke oku eke etemede, minyuŋ inyeneke ŋwed ibet.

⁴Ekem ke nnanenyin mmɔ, mmɔ efiak etiene Jehovah Abasi Israel, enyuŋ eyom enye; ndien enye ayak mmɔ ekut enye.

⁵Ndien ke ini oro baba owo kiet eke ɔwɔrɔde, ye baba owo kiet eke odukde, ikwe ifure, edi ediwak ndutime anam kpukpru mme andiduŋ edem oro.

⁶Ndien idut asuan idut, obio onyuŋ anuak obio: koro Abasi adade kpukpru oruk nnaneyin etimere mmɔ.

⁷Mbufo ndien esɔŋ idem, ubɔk okunyuŋ emem mbufo: koro se mbufo enamde edinyenede utip.

⁸Ekem adaŋemi Asa okopde ikɔ emi, ye prophecy Oded prophet, esit ɔsɔŋ enye, ndien enye osioŋo mbubiam-ŋkpɔ efep ke ofuri isɔŋ Judah, ye eke Benjamin, ye eke obio oro enye akadade ke obot Ephraim, onyuŋ ɔdiɔŋ itie-uwa Jehovah emi odude ke iso etehe Jehovah.

⁹Enye onyuŋ obon ofuri Judah, ye Benjamin, ye isen owo emi edude ye mmɔ, emi etode ke Ephraim ye Manasseh, ye ke Simeon: koro ediwak owo etode ke Israel edi edidian idem mmɔ ye enye, ke ini mmɔ ekutde nte Jehovah Abasi esie adade ye enye:

¹⁰ndien mmɔ ebono ke Jerusalem ke ɔyɔhɔ ɔfiɔŋ ita, ke ɔyɔhɔ isua ubɔŋ Asa efut.

¹¹Ndien ke ini oro mmɔ ewa uwa enɔ Jehovah ke mbume oro ekedade edi, enaŋ ikie itiaba, ye tɔsin ŋkpri ufene itiaba.

¹²Mmɔ enyuŋ eduk ke ediomi, ete mmimɔ iyeyom Jehovah Abasi mme ete mmimɔ, ke ofuri esit mmimɔ, ye ke ofuri ukpɔŋ mmimɔ;

¹³ndien kpukpru owo eke midiyomke Jehovah Abasi Israel eyekpa, edide ekpri, onyuŋ edide akamba, edide eren-owo, onyuŋ edide ŋwan.

¹⁴Mmɔ enyuŋ eŋwɔŋɔ enɔ Jehovah ke ɔkpɔsɔŋ uyo, ye ke mkpo, ye ke ukorowo, ye ke obukpoŋ.

¹⁵Ndien ofuri Judah edat esit ebaŋa uŋwɔŋɔ oro: koro mmɔ ekeŋwɔŋɔde ke ofuri esit mmɔ, enyuŋ eyomde enye ke ofuri itɔŋ mmɔ; ndien mmɔ ekut enye; Jehovah onyuŋ anam mmɔ etie suŋ ke edem kpukpru.

¹⁶Ndien ŋko enye osio Maacah eka Asa edidem ke itie ubɔŋ efep, koro enye akanamde ibɔk ɔnɔ Asherah: ndien Asa asiak ibɔk esie, anuak, onyuŋ ɔfɔp enye ke ebedeŋ Kidron.

¹⁷Edi mmɔ isioŋoke mme edikoŋ ebiet ke Israel ifep.

¹⁸Edi esit Asa ɔfɔn ama ke ofuri eyo esie. Enye onyuŋ ada se ete esie okonimde, ye se enye ke idem esie okonimde, silver, ye gold, ye mkpoduoho, esin ke ufɔk Abasi.

¹⁹Ndien ekɔŋ iduhe aba tutu osim isua ubɔŋ Asa edip ye efut.