Read efik 2 CHRONICLES 17 Bible Online

2 CHRONICLES 17 - efik bible

2 CHRONICLES 17

¹NDIEN Jehoshaphat eyen esie ada ubɔŋ ke itie esie, onyuŋ ɔsɔŋ idem esie ebeŋe Israel.

²Enye onyuŋ onim mbon-ekɔŋ ke kpukpru mkpɔsɔŋ obio Judah, onyuŋ onim mbon-ukpeme ke isɔŋ Judah, ye ke mme obio Ephraim, emi Asa ete esie akadade.

³Ndien Jehovah ada ye Jehoshaphat, koro enye asaŋade ke akpa usuŋ David ete esie, minyuŋ itieneke Baalim;

⁴edi enye ebine Abasi ete esie, onyuŋ asaŋa ke mbet esie, isaŋake nte Israel enamde.

⁵Ndien Jehovah anam ubɔŋ ɔsɔŋ ada enye ke ubɔk; ofuri Judah enyuŋ enɔ Jehoshaphat enɔ; enye onyuŋ enyene ediwak inyene ye ukpono.

⁶Ndien enye emenere esit esie esin ke usuŋ Jehovah: onyuŋ osioŋo edikoŋ ebiet ye mme eto-mkpe ke Judah efep.

⁷Ndien ke ɔyɔhɔ isua ubɔŋ esie ita, enye ɔdɔŋ mbɔŋ esie, Benhail, ye Obadiah, ye Zechariah, ye Nethanel, ye Micaiah, ete eteme owo ke mme obio Judah.

⁸Enye onyuŋ ɔdɔŋ Levite ŋko, ete esaŋa ye mmɔ, kpa Shemaiah, ye Nethaniah, ye Zebadiah, ye Asahel, ye Shemiramoth, ye Jehonathan, ye Adonijah ye Tobijah, ye Tob-adonijah, mme Levite; Elishama, ye Jehoram mme oku enyuŋ esaŋa ye mmɔ ŋko.

⁹Ndien mmɔ eteme owo ke Judah, ŋwed mbet Jehovah onyuŋ odu ye mmɔ, ndien mmɔ ekanare kpukpru mme obio Judah, enyuŋ eteme kpukpru owo.

¹⁰Ndien ndik Jehovah odoro kpukpru mme idut ke ererimbot, emi ekande Judah ekuk, ndien mmɔ iŋwanake ekɔŋ ye Jehoshaphat.

¹¹Ndusuk mme Philistine ŋko enyuŋ eda enɔ, ye silver utomo, edisɔk Jehoshaphat; mme Arabian nde eda ŋkpri ufene esɔk enye, tɔsin okukim erɔŋ itiaba ye ikie itiaba, ye tɔsin okpo-ebot itiaba ye ikie itiaba.

¹²Ndien Jehoshaphat ɔdɔdiɔŋ okpon aka iso; onyuŋ ɔbɔp mkpɔsɔŋ ufɔk ekɔŋ, ye obio unim-ŋkpɔ ke Judah.

¹³Enye onyuŋ enyene ediwak utom ke mme obio Judah: mbon-ekɔŋ uko enyuŋ edu ke Jerusalem.

¹⁴Ndien mme mmɔ emi edi ibat mmɔ, nte ufɔk mme ete mmɔ edide: eke Judah, mme etubom mme tɔsin: Adnah etubom, ndien tɔsin mbon-ekɔŋ itie ikie esaŋa ye enye.

¹⁵Ndien Jehohanan etubom adiana enye, tɔsin owo itie ikie iba ye anaŋ enyuŋ esaŋa ye enye.

¹⁶Ndien Amasiah eyen Zichri, emi ayakde idem esie ɔnɔ Jehovah ke ofuri esit, adiana enye; tɔsin mbon-ekɔŋ uko itie ikie iba enyuŋ esaŋa ye enye.

¹⁷Ndien eke Benjamin; Eliada, owo uko, tɔsin mbon-utiga ye otu-ekɔŋ enyuŋ esaŋa ye enye.

¹⁸Ndien Jehozabad adiana enye, tɔsin owo eke ekamade ŋkpɔ-ekɔŋ itie ikie ye anaŋ enyuŋ esaŋa ye enye.

¹⁹Mme mmɔ emi enam ŋkpɔ enɔ edidem, ekɔrɔ ye mmɔ emi edidem okonimde ke mme obio ibibene ke ofuri Judah.