Read efik 2 CHRONICLES 18 Bible Online

2 CHRONICLES 18 - efik bible

2 CHRONICLES 18

¹EDIKEM Jehoshaphat enyene inyene ye ukpono ediwak, onyuŋ okoro ukot ye Ahab.

²Ekem ke utit ndusuk isua, enye ɔsuhɔre aka ke ɔtɔ Ahab ke Samaria. Ndien Ahab owot ediwak ŋkpri ufene ye enaŋ, ɔnɔ enye, ye ikɔt emi edude ye enye, onyuŋ esin enye ɔdɔk ke Ramoth-gilead.

³Ndien Ahab edidem Israel ɔdɔhɔ Jehoshaphat, edidem Judah, ete, Nte afo editiene mi aka ke Ramoth-gilead? Ndien enye (Jehoshaphat) ɔbɔrɔ enye, ete, Ami ndi nte afo; ye ikɔt mi nte ikɔt fo; ndien nyetiene fi ŋka ekɔŋ.

⁴Ndien Jehoshaphat ɔdɔhɔ edidem Israel, ete, Mbɔk bup uyo Jehovah mfin emi.

⁵Ndien edidem Israel obon mme prophet, owo ikie inaŋ, ndien ɔdɔhɔ mmɔ, ete, Nte nnyin idika ekɔŋ ke Ramoth-gilead, mme nditre? Ndien mmɔ edɔhɔ, ete, Dɔk: ndien Abasi eyeda enye esin edidem ke ubɔk.

⁶Ndien Jehoshaphat ɔdɔhɔ, ete, Nte prophet Jehovah iduhe aba mi, eke nnyin ikpebupde enye?

⁷Ndien edidem Israel ɔdɔhɔ Jehoshaphat, ete, Osuk kaŋa owo kiet eke nnyin ikpedade ibup Jehovah; edi mmasua enye; koro enye akanam mitiŋke eti prophecy ibaŋa mi, edi idiɔk kpukpru ini: enye edi Micaiah eyen Imla. Ndien Jehoshaphat adɔhɔ, ete, Edidem okudɔhɔ ntre.

⁸Ndien edidem Israel okot eunuch kiet, onyuŋ ɔdɔhɔ enye, ete, Wara ke kada Micaiah eyen Imla di.

⁹Ntre ke edidem Israel ye Jehoshaphat edidem Judah etie kiet ke ebekpo esie, kiet ke ebekpo esie, esine ɔfɔŋ-idem ubɔŋ, ndien mmɔ, etie ke aŋwa enyin-usuŋ Samaria; kpukpru prophet enyuŋ etiŋ prophecy ke iso mmɔ.

¹⁰Ndien Zedekiah eyen Chenaanah akanam nduk ukwak ke idem esie, onyuŋ ɔdɔhɔ ete, Ntem ke Jehovah ɔdɔhɔ ete, Afo eyeda mme mmɔ emi onuk Syria tutu osobo mmɔ ama.

¹¹Kpukpru prophet enyuŋ etiŋ prophecy ntem, ete, Dɔk ke Ramoth-gilead, ndien afo eyekut unen: koro Jehovah eyeda enye esin edidem ke ubɔk.

¹²Ndien isuŋutom oro akakade ndikot Micaiah, eneme ye enye, ete, Sese, mme prophet ke etiŋ ikɔ, uyo kiet, enɔ edidem: mbɔk, ndien, yak ikɔ fo enyuŋ etie nte ikɔ owo mmɔ kiet, nyuŋ tiŋ se ifɔnde.

¹³Ndien Micaiah ɔdɔhɔ, ete, Ma uwem Jehovah, se Abasi mi edidɔhɔde mi nditreke oro nditiŋ.

¹⁴Ekem adaŋemi enye osimde edidem, edidem ɔdɔhɔ enye, ete, Micaiah, nte nnyin ika ekɔŋ ke Ramoth-gilead, mme ŋkuka? Ndien enye ete, Mbufo edɔk, ndien eyekut unen, eyenyuŋ eda mmɔ esin mbufo ke ubɔk.

¹⁵Ndien edidem ɔdɔhɔ enye, ete, Adaŋa ini ikafaŋ ke ami ndiwuk fi, nte okutiŋ ke mibɔhɔke akpanikɔ ke enyiŋ Jehovah ɔnɔ mi.

¹⁶Ndien enye ɔdɔhɔ ete, Ŋkokut ofuri Israel esuanade ke ikpɔ obot, nte ufene eke minyeneke andibɔk: ndien Jehovah ɔdɔhɔ ete, Mme mmɔ emi inyeneke andinyene; yak kpukpru owo efiak ke ufɔk mmɔ ke ifure.

¹⁷Ndien edidem Israel ɔdɔhɔ Jehoshaphat, ete, Nte ŋkɔdɔhɔke fi, nte ke enye iditiŋke eti prophecy ibaŋa mi, ke mibɔhɔke idiɔk?

¹⁸Ndien enye ɔdɔhɔ, ete, Mbufo ekop ndien uyo Jehovah; ŋkokut Jehovah etiede ke ebekpo esie, ndien ofuri udim enyɔŋ eda enye ke nnasia ye ke ufien.

¹⁹Ndien Jehovah obup, ete, Anie editap Ahab edidem Israel, man enye ɔdɔk ɔkɔduɔ ke Ramoth-gilead? Ndien kiet ɔdɔhɔ ntem, kiet eken onyuŋ ɔdɔhɔ ntem.

²⁰Ekem spirit kiet oto edida ke iso Jehovah, onyuŋ ɔdɔhɔ, ete, Ami nyetap enye.

²¹Ndien Jehovah obup enye, ete, Ke nso? Ndien enye ɔbɔrɔ ete, Nyewɔrɔ ŋkedi spirit nso ke inua kpukpru prophet esie. Ndien Enye ete, Afo eyetap enye, eyenyuŋ ekeme: wɔrɔ, ka kanam ntre.

²²Mmɔdo, sese, Jehovah amada spirit nsu esin mme prophet fo emi ke inua, Jehovah omonyuŋ ɔdɔhɔ idiɔk abaŋa fi.

²³Ndien Zedekiah eyen Chenaanah asaŋa ekpere, ɔkɔtɔ Micaiah ke mfuk, onyuŋ ɔdɔhɔ, ete, Ke usuŋ ewe ke spirit Jehovah ɔkpɔŋ mi, ebe edidɔhɔ ye afo?

²⁴Ndien Micaiah ɔdɔhɔ, ete, Sese, afo eyekut ke usen emi edidukde ke esit ubet okodibe.

²⁵Ndien edidem Israel ɔdɔhɔ ete, Mbufo emum Micaiah, efiak esɔk Amon etubom obio, ye Joash eyen edidem; enyuŋ edɔhɔ ete,

²⁶Ntem ke edidem ɔdɔhɔ ete, Mbufo, esin owo emi ke ufɔk ukwak, enyuŋ ebɔk enye ke udia nnanenyin, ye mmɔŋ nnanenyin, tutu ami mfiak ndi ke ifure.

²⁷Ndien Micaiah ɔdɔhɔ, ete, Afo ama afiak ke ifure, Jehovah ikadaha inua mi idɔhɔ ikɔ. Enye onyuŋ ɔdɔhɔ, ete, Mbufo akpaimɔ ekop.

²⁸Ekem edidem Israel ye Jehoshaphat edidem Judah edɔk eka ke Ramoth-gilead.

²⁹Ndien edidem Israel ɔdɔhɔ Jehoshaphat, ete, Nyefuk idem nduk ke ekɔŋ: edi afo sine ɔfɔŋ-idem ubɔŋ fo. Ntre ke edidem Israel ofuk idem; ndien mmɔ eduk ke ekɔŋ.

³⁰Ndien edidem Syria okowuk mme etubom chariot emi edude ye enye, ete, Mbufo ekuŋwana ye ŋkpri, ekunyuŋ eŋwana ye akamba, ke mibɔhɔke edidem Israel ikpɔŋ-ikpɔŋ.

³¹Edikem adaŋemi mme etubom mme chariot ekekutde Jehoshaphat, enyuŋ edɔhɔde, ete, Edidem Israel edi emi; ndien mmɔ ekan enye ekuk, ete iŋwana ye enye: edi Jehoshaphat ofiori, ndien Jehovah anyaŋa enye; Abasi onyuŋ esin mmɔ ekpɔŋ enye.

³²Edikem adaŋemi mme etubom mme chariot ekutde ete ke idige edidem Israel, mmɔ efiak edem etre ndibine enye.

³³Ekem owo kiet odudi utiga ikoho koi, etiga edidem Israel ke ɔtɔ isobo ŋkpɔ ikpanesit: ndien enye ɔdɔhɔ akama chariot esie, ete, Kabare ubɔk fo, nyuŋ da mi wɔrɔ ke ekɔŋ: koro ndade unan.

³⁴Ndien ekɔŋ ɔdɔdiɔŋ ɔsɔŋ ubɔk ke usen oro: edi edidem Israel atuak ada ke chariot esie ke iso mme Syrian, tutu eyo okut; ekem enye akpa ke ini utin osopde.