Read efik 2 CHRONICLES 19 Bible Online

2 CHRONICLES 19 - efik bible

2 CHRONICLES 19

¹EKEM Jehoshaphat edidem Judah ɔnyɔŋ ke ufɔk esiemɔ ke Jerusalem ke ifure.

²Ndien Jehu eyen Hanani, okut-ŋkukut, ɔwɔrɔ okosobo ye enye, onyuŋ ɔdɔhɔ edidem Jehoshaphat, ete, Nte ɔfɔn fi ndiŋwam mme idiɔk owo, nnyuŋ mma mmɔ eke esuade Jehovah? Emi esin Jehovah ɔtɔhɔ utɔk ye afo.

³Edi emekut nti ŋkpɔ ke idem fo, ke oro afo okosioŋode mme eto-mkpe ke isɔŋ efep, onyuŋ owukde esit fo oyom Abasi.

⁴Ndien Jehoshaphat oduŋ ke Jerusalem: enye onyuŋ ɔtɔŋɔ ntak ɔwɔrɔ asaŋa ke otu mbio-obio, ɔtɔŋɔ ke Beer-sheba tutu osim ke obot Ephraim, onyuŋ ada mmɔ afiak etiene Abasi mme ete mmɔ.

⁵Enye onyuŋ onim mme ebiereikpe ke isɔŋ ke kpukpru obio Judah eke enyenede ibibene, ke obio, ke obio,

⁶onyuŋ ɔdɔhɔ mme ebierikpe, ete, Mbufo etiŋ enyin ke se mbufo enamde: koro midige owo ke mbufo ekpe enɔ, edi ekpe enɔ Jehovah, ndien enye odu ye mbufo ke ikɔ ikpe.

⁷Eyak ndik Jehovah odoro mbufo, ndien; ekpeme idem enyuŋ enam: koro baba mme ukwaŋ-ŋkpɔ miduhe ye Jehovah Abasi nnyin, baba uteŋe-enyin, baba erida enɔ.

⁸Ndien ŋko Jehoshaphat ada ndusuk mme Levite, ye mme oku, ye eke mme etubom mme ete Israel, onim ɔnɔ ikpe Jehovah ye ikɔ, ke Jerusalem, ekem mmɔ enyɔŋ ke Jerusalem.

⁹Ndien enye owuk mmɔ, ete, Ntem ke mbufo edinam ke uteŋe Jehovah, ye ke akpanikɔ, ye ke esit kiet.

¹⁰Ndien ama edi kpukpru ikɔ eke nditɔ-ete mbufo, emi eduŋde ke obio mmɔ, edade etiene mbufo, ebaŋa iyip ye iyip, enyuŋ ebaŋa mbet ye ewuhɔ, ye mme ido, ye mme item, mbufo esian mmɔ man ekudue Jehovah, iyaresit okonyuŋ odoro mbufo, ye nditɔ-ete mbufo: enam ntem, ndien mbufo idi-duehe.

¹¹Ndien, sese, Amariah ɔbɔŋ oku edi etubom mbufo ke kpukpru ŋkpɔ Jehovah; ye Zebadiah eyen Ishmael, ɔbɔŋ ufɔk Judah, etubom ke kpukpru ŋkpɔ edidem: mme Levite ŋko edi ndidaha ke iso mbufo. Mbufo esɔŋ esit enam, ndien Jehovah odu ye mmɔ eke edide nti.