Read efik 2 CHRONICLES 21 Bible Online

2 CHRONICLES 21 - efik bible

2 CHRONICLES 21

¹EKEM Jehoshaphat ɔsuhɔre ana ye mme ete esie ede, onyuŋ ɔbuhɔ ye mme ete esie ke obio David. Ndien Jehoram eyen esie ada ubɔŋ ke itie esie.

²Ndien enye enyene nditɔ-ete, kpa nditɔ Jehoshaphat, Azariah, ye Jehiel, ye Zechariah, ye Azariah, ye Michael, ye Shephatiah: kpukpru mme mmɔ emi edi nditɔ-iren Jehoshaphat edidem Israel.

³Ndien ete mmɔ ɔnɔ mmɔ ikpɔ enɔ silver, ye gold, ye ŋkpɔ-uto, ye obio ibibene ke Judah: edi ɔnɔ Jehoram itie edidem: koro enye edide akpan.

⁴Ekem adaŋemi Jehoram adahade ke enyɔŋ ada ubɔŋ ete esie, enye ɔsɔŋ esit, ndien owot kpukpru nditɔ-ete esie ke ofut, ye ndusuk mbon Israel ŋko.

⁵Jehoram osim isua edip ye duop-eba ke ini enye adade ubɔŋ; ndien edi edidem ke Jerusalem ke isua itiaita.

⁶Enye onyuŋ asaŋa ke usuŋ ndidem Israel, kpa nte ufɔk Ahab enamde: koro eyen Ahab aŋwan edide ŋwan esie: enye onyuŋ anam se idiɔkde Jehovah ke enyin.

⁷Edi Jehovah inyimeke ndisobo ufɔk David, koro enye ama okonyuŋ ɔdɔhɔ, ete ke imɔ iyenɔ enye ye nditɔ esie utuen-ikaŋ ke nsinsi.

⁸Ke eyo esie Edom esɔŋ ibuot ewɔrɔ ke ubɔk Judah, ndien enim owo ke edidem mmɔ.

⁹Ndien Jehoram, ye mme etubom esie ye kpukpru mme chariot esie ŋko ewɔŋɔ: ndien enye adaha ke enyɔŋ ke okoneyo, akasuan Edom emi ekande enye ekuk, ye mme etubom mme chariot.

¹⁰Ntre ke Edom esɔŋ ibuot ewɔŋɔ ke ubɔk Judah, tutu osim mfin emi. Suk ke ini oro Libnah ɔsɔŋ ibuot ɔwɔrɔ ke ubɔk esie; koro enye ɔkɔkpɔŋde Jehovah Abasi mme ete esie.

¹¹Enye ŋko onyuŋ anam edikoŋ ebiet ke ikpɔ obot Judah, onyuŋ esin mme andiduŋ Jerusalem enam use, onyuŋ enyik Judah enam ntre.

¹²Ndien prophet Elijah ɔnɔ ŋwed esɔk enye, ete, Ntem ke Jehovah Abasi David usɔ ɔdɔhɔ, ete, Koro afo musaŋake ke mme usuŋ Jehoshaphat usɔ, ye ke usuŋ Asa edidem Judah,

¹³edi asaŋa ke usuŋ ndidem Israel, onyuŋ esin Judah ye mme andiduŋ Jerusalem enam use, ebiet use ufɔk Ahab, onyuŋ owot nditɔ-usɔ ufɔk usɔ, emi ekefɔnde ekan fi; sese,

¹⁴Jehovah mmɔŋ amia ikɔt fo, ye nditɔ fo ye iban fo, ye kpukpru inyene fo, akamba ufen;

¹⁵ndien afo eyedɔŋɔ akamba udɔŋɔ nsia fo, tutu nsia fo ewɔŋɔ ke udɔŋɔ kpukpru usen.

¹⁶Ndien Jehovah edemere esit mme Philistine, ye eke mme Arabian, emi ekperede mme Ethiopian, ɔnɔ Jehoram:

¹⁷ndien mmɔ edɔk ke Judah ebumere eduk ke esit, enyuŋ etaŋ kpukpru inyene eke mmɔ ekutde ke ufɔk edidem efep, ye nditɔ esie, ye iban esie; ndien baba eyen kiet isuhɔke inɔ enye, ke mibɔhɔke Jehoahaz ekpri eyen-eren esie.

¹⁸Ekem ke kpukpru ŋkpɔ emi ebede, Jehovah ada udɔŋɔ eke minyeneke erikure, amia enye ke nsia.

¹⁹Edikem ke ediwak ini ebede, ke utit isua iba, udɔŋɔ esie esin nsia esie ewɔŋɔ: ndien enye akpa ke idiɔk udɔŋɔ. Ndien ikɔt esie ifɔpke ŋkpɔ inɔ enye, nte ekefɔpde enɔ mme ete esie.

²⁰Enye okosim isua edip ye duopeba, ke ini enye adade ubɔŋ; onyuŋ edi edidem ke Jerusalem ke isua itiaita. Ntre enye adaha, ndien mmɔ isemeke enye. Mmɔ enyuŋ ebuk enye ke obio David, edi ibukke ke udi ndidem.