Read efik 2 CHRONICLES 31 Bible Online

2 CHRONICLES 31 - efik bible

2 CHRONICLES 31

¹EKEM adaŋemi mmɔ ema ekema kpukpru ŋkpɔ emi, ofuri Israel eke edude do, ewɔŋɔ eka ke mme obio Judah, ekenuak mme adaha, enyuŋ esiak mme eto-mkpe, enyuŋ ewuri mme edikoŋ ebiet, ye mme itie-uwa, efep ke ofuri Judah, ye Benjamin, ye Ephraim, ye Manasseh, tutu ekure ema. Ndien kpukpru nditɔ Israel efiak kiet kiet ke ebiet esie, ke mme obio mmɔ.

²Ekem Hezekiah otim ŋka mme oku ye eke mme Levite onim ke ŋka mmɔ, kpukpru mme oku ye mme Levite nte utom mmɔ edide, ke eke edifɔp uwa, ye uwa emem, ndinam ŋkpɔ, nnyuŋ ŋkɔm, nnyuŋ ŋkwɔ itoro ke inua-otop nna Jehovah;

³ye udeme eke esiode ke inyene edidem enɔ ke edifɔp uwa, kpa edifɔp uwa usenubɔk ye eke mbubreyo, ye edifɔp uwa mme sabbath, ye eke mbufa ɔfiɔŋ, ye eke mme usɔrɔ emi ekedoride, kpa nte ekewetde ke ŋwed mbet Jehovah.

⁴Enye onyuŋ ɔdɔhɔ mmɔ eke eduŋde ke Jerusalem, ete enɔ udeme mme oku ye eke mme Levite, man mmɔ esɔŋɔ emum ido Jehovah ekama.

⁵Ekem adaŋemi ikɔ oro ɔwɔrɔde, nditɔ Israel eda ediwak akpa ibokpot, ye wine, ye aran, ye aran-ɔkwɔk, ye kpukpru mbuŋwum iŋwaŋ edi; mmɔ enyuŋ eda ɔyɔhɔ ubak kpukpru ŋkpɔ duop edi ediwak.

⁶Ndien ama edi nditɔ Israel ye eke Judah eke eduŋde ke mme obio Judah, mmɔ ŋko esio ɔyɔhɔ ubak duop ke enaŋ, ye ke erɔŋ, ye ɔyɔhɔ ubak duop ke edisana ŋkpɔ eke enimde enɔ Jehovah Abasi mmɔ, eda mmɔ edi edikubi otu-otu.

⁷Mmɔ etɔŋɔ ndikubi otu ke ɔyɔhɔ ɔfiɔŋ ita, ndien ema ke ɔyɔhɔ ɔfiɔŋ itiaba.

⁸Ekem adaŋemi Hezekiah ye mbɔŋ edide edikut mme otu oro, mmɔ ekɔm Jehovah ye ikɔt esie Israel.

⁹Ndien Hezekiah obup mme oku ye mme Levite ikɔ mme otu oro.

¹⁰Ndien Azariah ɔbɔŋ oku, eyen ufɔk Zadok, ɔbɔrɔ enye, ete, Toto nte mmɔ eketɔŋɔ ndida enɔ nduk ke ufɔk Jehovah, nnyin idadia iyuhɔ, inyuŋ isuhɔ ediwak: koro Jehovah ɔdiɔŋde ikɔt esie; ndien se isuhɔde edi otu emi.

¹¹Ndien Hezekiah ɔdɔhɔ, ete etim ubet ke ufɔk Jehovah; ndien mmɔ etim, ndien eda enɔ oro,

¹²ye ɔyɔhɔ mbak duop, ye mme edisana ŋkpɔ, eduk ke esit kiet: ndien Conaniah Levite edi etubom mmɔ, Shimei eyen-ete esie onyuŋ edi udiana.

¹³Ndien Jehiel, ye Azaziah, ye Nahath, ye Asahel, ye Jerimoth, ye Jozabad, ye Eliel, ye Ismachiah, ye Mahath, ye Benaiah, etiene Conaniah ye Shimei eyen-ete esie, edi mme ese-utom, kpa nte Hezekiah edidem, ye Azariah etubom ufɔk Abasi okowukde.

¹⁴Ndien Kore eyen Imnah Levite kiet, etie-usuŋ ke edem usiaha-utin, edi etubom ŋkpɔ emi enɔde Abasi ke ima esit, man edeme enɔ Jehovah, ye ata edisana ŋkpɔ.

¹⁵Ndien Eden, ye Miniamin, ye Jeshua, ye Shemaiah, ye Amariah, ye Shecaniah esaŋa utom enɔ enye ke obio mme oku, man enye ada akpanikɔ edeme ŋkpɔ ɔnɔ nditɔ-ete esie, ŋkani owo, ye nditɔwɔŋ, ke ŋka mmɔ:

¹⁶adian ye ŋwed enyiŋ irenowo mmɔ, ɔtɔŋɔde ye eyen isua ita, ye mmɔ eke ebede oro, kpukpru mmɔ eke edukde ke ufɔk Jehovah, nte udeme kpukpru usen asaŋade, ke utom mmɔ, ke idaha mmɔ, ye ke ŋka mmɔ;

¹⁷ye ŋwed emana mme oku ŋko, nte ufɔk mme ete mmɔ esaŋade, ye mme Levite, ɔtɔŋɔde ke owo isua edip, ye mmɔ eke ebede oro, ke idaha mmɔ, ye ke ŋka mmɔ;

¹⁸ye ŋwed emana kpukpru ŋkpri nditɔwɔŋ mmɔ, ye iban mmɔ, ye nditɔ-iren mmɔ, ye nditɔ-iban mmɔ, ke ofuri esop: koro ke akpanikɔ mmɔ ke mmɔ etim ekama edisana ŋkpɔ:

¹⁹ndien nditɔ Aaron mma oku ke iŋwaŋ mben obio mmɔ, ke obio, ke obio, enyene owo eke asiakde mmɔ enyiŋ, ete eda udeme enɔ kpukpru iren-owo ke otu mme oku, ye kpukpru owo eke ewetde mmɔ esin ke ŋwed emana ke otu mme Levite.

²⁰Ndien Hezekiah anam ntem ke ofuri Judah, onyuŋ anam se ifɔnde, inyuŋ inende, inyuŋ idide akpanikɔ, ke iso Jehovah Abasi esie.

²¹Ye ke kpukpru se enye ɔtɔŋɔde ndinam ke utom ufɔk Abasi, ye ke mme ewuhɔ, ye ke mbet, ke eritiene Abasi esie, enye anam ke ofuri esit esie, onyuŋ okut unen.