Read efik 2 CHRONICLES 32 Bible Online

2 CHRONICLES 32 - efik bible

2 CHRONICLES 32

¹KE ema ekenam ŋkpɔ emi ke akpanikɔ ema, Sennacherib edidem Assyria edi ediduk ke Judah, onyuŋ anam nna esie ke mben mme obio enyene ibibene, onyuŋ ekere ndida mmɔ ke idem esie ke ŋkanubɔk.

²Ekem adaŋemi Hezekiah okutde ete ke Sennacherib emedi, onyuŋ owuk iso ndiŋwana ekɔŋ ye Jerusalem,

³enye odiomi ye mme etubom esie, ye mbon-uko esie, ete ifuk mmɔŋ mme obube oro edude ke edem obio: ndien mmɔ eŋwam enye.

⁴Ndien ediwak owo ebono, ndien mmɔ efuk kpukpru obube ye idim oro ewetde ke ufɔt isɔŋ, ete, Ke nso ke edidem Assyria edidi edikut ediwak mmɔŋ?

⁵Ndien ŋko enye ɔsɔŋ esit ɔbɔp ofuri ibibene eke owurede, onyuŋ eneŋere enye onim tutu osim ke mme tower, ye ibibene efen ke edem, onyuŋ ɔdiɔŋ ɔsɔŋ Millo, ye obio David, onyuŋ anam ediwak onyim ye otu-ekɔŋ.

⁶Enye onyuŋ onim mme etubom ekɔŋ, ete ekara mbio-obio, ndien osop mmɔ ke ɔtɔ esie, ke aŋwa inua-otop obio, onyuŋ ɔdɔhɔ ufan-ufan ye mmɔ, ete,

⁷Mbufo esɔŋ esit, esɔŋ idem, ekudikhe, idem okukpa mbufo ke iso edidem Assyria, ye ke iso ofuri otu mmɔ emi edude ye enye; koro eke edude ye nnyin ekponde ekan eke edude ye enye;

⁸ubɔk obuk-idem odu ye enye; edi Jehovah Abasi nnyin odu ye nnyin ndinyaŋa nnyin, ndinyuŋ ŋŋwana ekɔŋ nnyin. Ndien mbio-obio ebere idem ke ikɔ Hezekiah edidem Judah.

⁹Ke ini ŋkpɔ emi ema ekebe, Sennacherib edidem Assyria ɔdɔŋ ikɔt esie utom ke ɔtɔ Hezekiah edidem Judah ke Jerusalem, ye eke ofuri Judah emi edude ke Jerusalem (edi enye odu ke mben Lachish ye kpukpru mbɔŋ esie ŋko) ete,

¹⁰Ntem ke Sennacherib edidem Assyria ɔdɔhɔ, ete, Mbufo ebuɔt idem ke nso, eke esinde mbufo etie ke ɔkpɔsɔŋ ebiet ke Jerusalem?

¹¹Nte idige Hezekiah esin mbufo eyak idem mbufo enɔ mkpa, ye akaŋ, ye nsat-itɔŋ, ete, Jehovah Abasi nnyin eyenyaŋa nnyin osio edidem Assyria ke ubɔk?

¹²Nte kpa Hezekiah emi okosioŋo mme edikoŋ ebiet esie, ye mme itie-uwa esie efep, okonyuŋ ɔdɔhɔ Judah ye Jerusalem, ete, Mbufo enyene ndituak ibuot ke iso itie-uwa kiet, nnyuŋ mfɔp uwa ke esit?

¹³Nte mbufo ifiɔkke se ami ye ete mi ikanamde ye kpukpru mme idut ererimbot? Nte mme abasi mme idut ererimbot ema ekeme ndisio idut mmɔ ke ubɔk mi mfep?

¹⁴Anie odu ke otu kpukpru abasi mme idut oro mme ete mi okosobode, eke ekemede ndisio mi ikɔt esie ke ubɔk, eke Abasi mbufo ekemede ndisio mbufo ke ubɔk mi?

¹⁵Mbufo, ndien, ekuyak Hezekiah abiaŋa mbufo, ekunyuŋ eyak enye esin mbufo enam ntem, mbufo ekunyuŋ enim uyo esie ke akpanikɔ: koro baba abasi idut ekededi, mme eke obio ekededi akanam mikemeke ndisio ikɔt mmɔ ke ubɔk mi, ye ke ubɔk mme ete mi: ŋwaŋwa ediso Abasi mbufo idikemeke ndisio mbufo ke ubɔk mi?

¹⁶Ndien ikɔt esie edediɔŋ etiŋ ikɔ edian Jehovah Abasi, enyuŋ edian Hezekiah owo esie.

¹⁷Enye onyuŋ ewet ŋwed esuene Jehovah Abasi Israel, onyuŋ ɔdɔhɔ abaŋa enye, ete, Kpa nte mme abasi mme idut efen etide, emi mikekemeke ndisio ikɔt mmɔ ke ubɔk mi, kpa ntre Abasi Hezekiah idisioho ikɔt esie ke ubɔk mi.

¹⁸Ndien mmɔ efiori ɔkpɔsɔŋ uyo ke usem mme Jew, enɔ mbio Jerusalem emi edade ke enyɔŋ ibibene, ete isin mmɔ ndik ye unyekidem; kpaŋ ekpeda obio.

¹⁹Ntre ke mmɔ eketiŋ ebaŋa Abasi Jerusalem, kpa nte abasi mme idut ererimbot, emi ubɔk owo enamde.

²⁰Ndien oro esin Hezekiah edidem ye Isaiah prophet, eyen Amoz, enam mkpe-ubɔk, mmɔ enyuŋ eseme enɔ enyɔŋ.

²¹Ndien Jehovah ɔdɔŋ angel okosobo kpukpru mbon uko, ye mbɔŋ ye mme etubom nna-ekɔŋ edidem Assyria. Ndien enye ada but ke iso ɔnyɔŋ ke idut esie. Ekem adaŋemi enye odukde ke ufɔk abasi esie, mmɔ emi eketode enye ke idem ewot enye do ke ofut.

²²Ntem ke Jehovah akanyaŋa Hezekiah ye mme andiduŋ Jerusalem, osio ke ubɔk Sennacherib edidem Assyria, ye ke ubɔk kpukpru owo, onyuŋ ekpeme mmɔ akan okuk.

²³Ndien ediwak owo eda enɔ esɔk Jehovah ke Jerusalem, enyuŋ eda ŋkpɔ-uto esɔk Hezekiah edidem Judah: ndien toto ke ini oro enye okpon ke enyin kpukpru mme idut.

²⁴Ke ini oro Hezekiah ɔdɔŋɔ oyom ndikpa; ndien enye ekpe Jehovah ubɔk: ndien Enye ɔdɔhɔ ikɔ ye enye, onyuŋ owut enye ŋkpɔ ndyɔ.

²⁵Edi Hezekiah inamke usiene ke ufɔŋ emi efɔnde enye; koro esit esie emenerede ke enyɔŋ: mmɔdo iyaresit odorode enye ke idem, ye ke idem Judah ye Jerusalem.

²⁶Ekem Hezekiah osuk idem abaŋa mmenere esit esie, enye ye mme andiduŋ Jerusalem; ndien iyaresit Jehovah inamke mmɔ ke eyo Hezekiah.

²⁷Ekem Hezekiah enyene inyene ye ubɔŋ eti-eti: enye onyuŋ anam ebiet unim-ŋkpɔ-uto ke idem esie ɔnɔ silver, ye gold, ye ndiye itiat, ye ufuɔŋkpɔ, ye otu-ekɔŋ, ye kpukpru ŋkpɔ inemesit:

²⁸ye ufɔk unim-mbuŋwum ibokpot, ye wine, ye aran; ye efe kpukpru oruk unam, ye unam ye ŋkpri ufene ke mme efe.

²⁹Enye onyuŋ anam obio ke idem esie, onyuŋ ɔkɔ ŋkpri ufene, ye enaŋ ediwak: koro Abasi ɔkɔnɔde enye ata ediwak inyene eti-eti.

³⁰Enye Hezekiah onyuŋ esiri enyɔŋ-enyɔŋ udiɔŋ mmɔŋ Gihon, onyuŋ anam enye eneŋere ewet ke idak-idak aka edem usop-utin obio David. Hezekiah onyuŋ okut unen ke kpukpru se enye anamde.

³¹Edi ke ikɔ mme isuŋutom mbɔŋ Babylon oro ekedɔŋde ekebup ŋkpɔ ndyɔ oro ekenamde ke isɔŋ, Abasi, ɔkpɔŋ enye, ete idomo ifiɔk kpukpru se idude enye ke esit.

³²Ndien ama edi ikɔ Hezekiah eŋwen, ye mfɔn-ido esie, sese, ekewet mmɔ ke ŋkukut Isaiah eyen Amoz prophet, ye ke ŋwed ndidem Judah ye Israel.

³³Ekem Hezekiah ɔsuhɔre ana ye mme ete esie ede, ndien mmɔ ebuk enye ke akpan udi nditɔ David: ndien ofuri Judah ye mme andiduŋ Jerusalem ekpono enye ke mkpa esie. Ndien Manasseh eyen esie ada ubɔŋ ke itie esie.