Read efik 2 CHRONICLES 34 Bible Online

2 CHRONICLES 34 - efik bible

2 CHRONICLES 34

¹JOSIAH osim isua itiaita ke ini enye adade ubɔŋ, onyuŋ edi edidem ke Jerusalem ke isua edip ye duopekiet.

²Enye onyuŋ anam se inende ke iso Jehovah, onyuŋ asaŋa ke usuŋ David ete esie, inyuŋ iwahake ika nnasia inyuŋ ikaha ufien.

³Ekem ke ɔyɔhɔ isua ubɔŋ esie itiaita, ke edide kaŋa eyenɔwɔŋ, enye ɔtɔŋɔ nditiene Abasi David ete esie: ndien osim ke ɔyɔhɔ isua duopeba, enye ɔtɔŋɔ ndisioŋo mme edikoŋ ebiet, ye mme eto-mkpe, ye mme edisɔi mbiet, ye mme editara mbiet infep, onyuŋ anam Judah ye Jerusalem esana.

⁴Ndien mmɔ ewuri itie-uwa Baalim ke iso esie, onyuŋ asiak mme ibɔk eke edorode ke enyɔŋ mmɔ, enye onyuŋ obom mme eto-mkpe, ye edisɔi mbiet, ye editara mbiet, mbai-mbai, onyuŋ anuak emem, onyuŋ asuan ke mme udi mmɔ emi ewade uwa enɔ mmɔ.

⁵Ndien enye ada ɔkpɔ mme oku ɔfɔp ke enyɔŋ itie-uwa mmɔ; ntre ke enye anam Judah ye Jerusalem esana:

⁶ye ke mme obio Manasseh, ye eke Ephraim, ye eke Simeon, tutu osim ke Naphtali, ke ndon mmɔ akan okuk.

⁷Enye onyuŋ owuri mme itie-uwa oro, onyuŋ obom mme eto-mkpe, onyuŋ anuak mme edisɔi mbiet emem, onyuŋ asiak kpukpru ibɔk ke ofuri isɔŋ Israel, ndien enye afiak ke Jerusalem.

⁸Ekem ke ɔyɔhɔ isua ubɔŋ esie efureta, ke enye ama akanam isɔŋ ye ufɔk esana, enye ɔdɔŋ Shaphan eyen Azaliah, ye Maaseiah etubom obio, ye Joah eyen Joahaz andiwet ŋkpɔ obio, ekediɔŋ ufɔk Jehovah Abasi esie.

⁹Ndien mmɔ eka ke ɔtɔ Hilkiah ɔbɔŋ oku, ekenɔ silver oro okodukde ke ufɔk Abasi, emi mme Levite eke ekpemede usuŋ ekebɔde ke ubɔk Manasseh, ye Ephraim, ye kpukpru Israel emi esuhɔde, ye ofuri Judah, ye Benjamin, ye mme andiduŋ Jerusalem.

¹⁰Ndien mmɔ eda enye esin ke ubɔk mme anam-utom emi esede ufɔk Jehovah, ndien mme anam-utom oro enamde utom ke ufɔk Jehovah, enɔ enye, ete ediɔŋ ufɔk enam ɔsɔŋ.

¹¹Ntre ke mmɔ eda enye enɔ mme carpenter ye mme ɔbɔp ufɔk, man edep edisɔi itiat, ye eto isobo, enyuŋ enam deck ufɔk oro ndidem Judah ekebiatde.

¹²Ndien mbio oro enam utom oro ke akpanikɔ: mmɔ enyuŋ edori Jahath ye Obadiah, mme Levite, emi etode ke nditɔ Merari; ye Zechariah, ye Meshullam, emi etode ke mme Kohathite, ete eteme mmɔ: ye mme Levite kpukpru eke efiɔkde ŋkpɔ ikwɔ.

¹³Mmɔ enyuŋ edi mbɔŋ mbon-mbiomo, ye mme eteme kpukpru mme anam-utom ke oruk usɔ ekededi: ndusuk Levite enyuŋ edi mme ewet-ŋwed, ye mme ekpe-ikpe, ye mme etie-usuŋ.

¹⁴Ekem adaŋemi mmɔ esiode inyene oro okodukde ke ufɔk Jehovah, Hilkiah oku okut ŋwed ewuhɔ Jehovah emi kotode Moses ke ubɔk.

¹⁵Ndien Hilkiah ɔbɔrɔ Shaphan andiwet ŋwed, ete, Mmokut ŋwed ewuhɔ ke ufɔk Jehovah.

¹⁶Ndien Hilkiah emen ŋwed oro ɔnɔ Shaphan. Ndien Shaphan ada ŋwed oro aka ɔkɔsɔk edidem, onyuŋ emen ikɔ ɔbɔrɔ edidem, ete, Mmɔ enam kpukpru se ekesinde ikɔt fo ke ubɔk.

¹⁷Ndien mmɔ ema eŋwaŋa silver eke ekutde ke ufɔk Jehovah, enyuŋ eda enye esin ke ubɔk mme andise, ye ke ubɔk mme andinam utom.

¹⁸Ndien Shaphan andiwet ŋwed etiŋ ɔnɔ edidem, ete, Hilkiah oku ɔmɔnɔ mi ŋwed kiet. Ndien Shaphan emen enye okot ke iso edidem.

¹⁹Edidem adaŋemi edidem okopde ikɔ ŋwed ewuhɔ oro, enye awai edisine-ŋkpɔ esiemɔ.

²⁰Ndien edidem eteme Hilkiah, ye Ahikam eyen Shaphan, ye Abdon eyen Micah, ye Shaphan andiwet ŋwed, ye Asaiah owo edidem kiet, ete,

²¹Mbufo eka ekebup Jehovah enɔ mi, ye mmɔ emi esuhɔde ke Israel, ye ke Judah, ebaŋa ikɔ ŋwed emi ekutde: koro iyaresit Jehovah emi eŋwaŋade nnyin ke idem omokpon koro mme ete nnyin mikenimke ikɔ Jehovah, minyuŋ inamke kpukpru se ewetde ke ŋwed emi.

²²Ndien Hilkiah ye ikɔt edidem eka ke ɔtɔ Huldah prophet aŋwan kiet, ŋwan Shallum, eyen Tokhath, eyen Hasrah, emi akamade mme edisine-ŋkpɔ; ndien enye oduŋ ke Jerusalem ke edem obio eken: ndien mmɔ eneme ye enye ntem.

²³Ndien enye ɔbɔrɔ mmɔ, ete, Ntem ke Jehovah Abasi Israel ɔdɔhɔ ete, Mbufo edɔhɔ owo oro ɔkɔdɔŋde mbufo utom ke ɔtɔ mi, ete,

²⁴Ntem ke Jehovah ɔdɔhɔ, ete, Sese, ami mmɔŋ nda idiɔk-ŋkpɔ ntiene ebiet emi, ye mme andiduŋ ke esit, kpa kpukpru isuŋi oro ekewetde ke ŋwed oro mmɔ ekekotde ke iso edidem Judah:

²⁵koro mmɔ emekpɔŋ mi, enyuŋ efɔp uwa enɔ mme abasi efen, man mmɔ eyat mi esit ke kpukpru se ubɔk mmɔ enamde mmɔdo ndiŋwaŋade iyaresit mi ke ebiet emi, ndien enye idinimeke.

²⁶Ndien ama edi edidem Judah emi ɔkɔdɔŋde mbufo edibup Jehovah, ntem ke mbufo edidɔhɔ enye, ete, Ntem ke Jehovah Abasi Israel ɔdɔhɔ ete, Ama edi ikɔ oro afo okokopde; koro esit fo ememde,

²⁷afo onyuŋ osukde idem fo ke iso Abasi, ke ini afo okokopde ikɔ esie emi abaŋade ebiet emi, ye mme andiduŋ ke esit, onyuŋ osukde idem fo ke iso mi, onyuŋ awaide edisine ŋkpɔ fo, onyuŋ atuade eyet ke iso mi; Jehovah ɔmɔdɔhɔ, ete,

²⁸Ami, ŋko mmokop. Sese, ami nyemen fi ŋkonim ye mme usɔ, eyenyuŋ enim fi ke udi fo ke ifure, enyin fo idinyuŋ ikwe kpukpru ŋkpɔ emi ndidade ntiene ebiet emi, ye mme andiduŋ ke esit. Ndien mmɔ eda ikɔ efiak eketiŋ enɔ edidem.

²⁹Ndien edidem ɔdɔŋ ekebon kpukpru mbiowo Judah ye Jerusalem.

³⁰Edidem onyuŋ ɔdɔk ke ufɔk Jehovah, ye kpukpru mbio Judah, ye mme andiduŋ Jerusalem, ye mme oku, ye mme Levite, ye kpukpru owo, ikpɔ ye ŋkpri: ndien enye emen kpukpru ikɔ ŋwed ediomi emi edutde ke ufɔk Jehovah etiŋ ke utɔŋ mmɔ.

³¹Edidem onyuŋ ada ke ɔtɔ esie, onyuŋ anam ediomi ke iso Jehovah, ete iyesaŋa itiene Jehovah, inyuŋ inim mbet esie, ye mme item esie, ye mme ewuhɔ esie, ke ofuri esit esie, ye ke ofuri ukpɔŋ esie, inyuŋ inam ikɔ ediomi eke ekewetde ke ŋwed emi.

³²Ndien enye anam kpukpru owo emi edude ke Jerusalem ye Benjamin eda ke esit. Ndien mme andiduŋ Jerusalem enam nte asaŋade ke ediomi Abasi, Abasi mme ete mmɔ.

³³Ekem Josiah osioŋo kpukpru mbubiam-ŋkpɔ efep ke kpukpru mme idut eke enyenede nditɔ Israel, onyuŋ esin kpukpru owo eke edude ke Israel enam ŋkpɔ Jehovah Abasi mmɔ. Mmɔ iŋwɔŋɔkede ikpɔŋ Jehovah Abasi mme ete mmɔ ke ofuri eyo esie.