Read efik 2 CHRONICLES 35 Bible Online

2 CHRONICLES 35 - efik bible

2 CHRONICLES 35

¹EKEM Josiah anam passover ɔnɔ Jehovah ke Jerusalem: ndien mmɔ ewot passover ke ɔyɔhɔ usen duopenaŋ ke akpa ɔfiɔŋ.

²Enye onyuŋ onim mme oku ke itie-ukpeme mmɔ, onyuŋ ɔsɔŋ mmɔ esit ke utom ufɔk Jehovah,

³onyuŋ ɔdɔhɔ mme Levite emi etemede ofuri Israel, emi edide edisana ikɔt Jehovah, ete, Mbufo enim edisana ekebe ke ufɔk emi Solomon eyen David edidem Israel ɔkɔbɔpde; enye idibiomoke aba mbufo ke afara: mbufo ekam enam ŋkpɔ Jehovah Abasi mbufo, ye eke ikɔt esie Israel.

⁴Mbufo enyuŋ ediɔŋ idem enim ke ŋka mbufo, nte ufɔk mme ete mbufo esaŋade, ekem nte David edidem Israel ye Solomon eyen

⁵esie ekewetde. Mbufo enyuŋ eda ke edisana ebiet enɔ ŋka mme ete nditɔ-ete mbufo mbio-obio, ye

⁶ŋka ufɔk ete mme Levite. Mbufo enyuŋ ewot passover, enyuŋ enam idem mbufo esana, enyuŋ etim (ŋkpɔ passover) enɔ nditɔ-ete mbufo, enyuŋ enam nte Jehovah ɔkɔdɔhɔde ke ubɔk Moses.

⁷Ndien Josiah ada ŋkpri ufene, kpa nditɔ-erɔŋ, ye nditɔ-ebot, ɔnɔ mbio-obio, kpukpru ke eke passover, nte ekemde ye kpukpru owo eke edude do, osim ibat tɔsin owo edip ye duop, ye tɔsin enaŋ ita: mme mmɔ emi eto ke inyene

⁸edidem. Ikpɔ owo esie ŋko etat ubɔk eda ŋkpɔ enɔ mbio-obio, ye mme oku, ye mme Levite: Hilkiah, ye Zechariah, ye Jehiel, mme etubom ufɔk Abasi enɔ mme oku tɔsin ŋkpri ufene ye ikie itiokiet ke eke passover, ye enaŋ

⁹ikie ita. Conaniah ŋko, ye Shemaiah, ye Nethanel, nditɔ-ete esie, ye Hashabiah, ye Jeiel, ye Jozabad, mbɔŋ mme Levite, emen tɔsin ŋkpri ufene ition, ye enaŋ ikie ition, enɔ mme Levite ke eke passover.

¹⁰Ekem mmɔ etim ŋkpɔ ema, ndien mme oku eda ke itie mmɔ, mme Levite enyuŋ eda ke ŋka mmɔ, nte emi edidem okowukde.

¹¹Ndien mmɔ ewot passover, mme oku enyuŋ ebɔ mmɔ iyip ke ubɔk esime, mme Levite enyuŋ esioŋo

¹²mmɔ ikpa. Ndien mmɔ esioŋo mbak eke efɔpde efep, man enɔ mmɔ nte ŋka ufɔk mme ete nditɔ obio esaŋade, man ewa enɔ Jehovah, kpa nte ewetde ke ŋwed Moses.

¹³Ntre ŋko ke enam enaŋ oro. Ndien mmɔ efɔp passover ke ikaŋ nte ekam esinamde: edi etem mme edisana ŋkpɔ efen ke eso, ye ke kettle, ye ke pan, enyuŋ eda mmɔ iwiwa esɔk kpukpru mbio-obio.

¹⁴Ekem ke ini oro ama ekebe, mmɔ etim eke idem mmɔ ye eke mme oku: koro mme oku, nditɔ Aaron, ededa ewa edifɔp uwa, ye ikpɔŋ tutu osim ke mbubreyo: oro esin mme Levite etim eke idem mmɔ, ye eke mme oku, nditɔ Aaron.

¹⁵Ndien mme ɔkwɔ-ikwɔ, nditɔ Asaph, edu ke itie mmɔ, kpa nte ewuhɔ David, ye eke Asaph, ye Heman, ye Jeduthun, mbon ŋkukut edidem, asaŋade; mme etie-usuŋ enyuŋ etie ke kpukpru inua-otop; mmɔ ikenyeneke ndikpɔŋ utom mmɔ: koro nditɔ-ete mmɔ mme Levite etimde eke mmɔ.

¹⁶Ntre ke mmɔ etim enam kpukpru ŋkpɔ Jehovah ke usen oro, man enim passover, enyuŋ ewa edifɔp uwa ke enyɔŋ itie-uwa Jehovah, ke ewuhɔ edidem Josiah.

¹⁷Ntem ke nditɔ Israel eke edude do enam passover ke ini oro, ye usɔrɔ uyo eke leaven miduhe, ke usen itiaba.

¹⁸Ndien akanam inimke oruk passover eke ebietde oro ke Israel, toto ke eyo Samuel prophet: baba ofuri edidem Israel kiet ikonyuŋ inimke oruk passover emi Josiah, ye mme oku, ye mme Levite, ye ofuri Judah ye Israel eke edude do, ye mme andiduŋ Jerusalem, enamde.

¹⁹Mmɔ enim passover emi ke ɔyɔhɔ isua ubɔŋ Josiah efureta.

²⁰Ke ini kpukpru ŋkpɔ emi ema ekebe, ke adaŋemi Josiah ɔkɔdiɔŋde ufɔk oro, Neco edidem Egypt ɔdɔk ndiŋwana ekɔŋ ke Car-chemish ke mben Euphrates: ndien Josiah ɔwɔrɔ aka ɔkɔbiɔŋɔ enye.

²¹Ndien enye (Neco) ɔdɔŋ mme isuŋtom ekedɔhɔ enye, ete, Ami nsaŋa nso ye afo, edidem Judah? Ndige ndiŋwana ekɔŋ ye afo mfin emi, edi ye ufɔk ekɔŋ mi: Abasi onyuŋ ɔdɔhɔ mi, ete ŋwawara: daha Abasi ke usuŋ, emi odude ye ami, man enye okubiat fi.

²²Edi Josiah ikabakede iso esie ikpɔŋ enye, edi ofuk idem, man anwana ekɔŋ ye enye, inyuŋ ikopke uyo Neco oro otode Abasi ke inua, ndien enye edi ndiŋwana ekɔŋ ke itihere Megiddo.

²³Ndien mbon-utiga etiga edidem Josiah; ndien edidem ɔdɔhɔ ikɔt esie, ete, Mbufo emen mi efep: koro ndade unam eti-eti.

²⁴Ndien ikɔt esie emen enye ke chariot oro efep edori ke udiana chariot emi enye enyenede: ndien mmɔ eda enye edi ke Jerusalem. Ntre ke enye akpa, onyuŋ ɔbuhɔ ke udi mme ete esie. Ofuri Judah ye Jerusalem enyuŋ etuaŋa Josiah.

²⁵Jeremiah onyuŋ ewet ikwɔ-eyet abaŋa Josiah: ndien kpukpru mme ɔkwɔ-ikwɔ iren ye iban edɔhɔ ebaŋa Josiah ke ikwɔ-eyet mmɔ tutu osim mfin emi, enyuŋ enim mmɔ ke ido ke Israel: ndien, sese, ekewet mmɔ ke otu mme ikwɔ-eyet.

²⁶Ndien ama edi ikɔ Josiah eŋwen ye mfɔn-ido esie, nte ekemde ye se ewetde ke ŋwed mme ewuhɔ Jehovah, ye ikɔ esie,

²⁷mbemiso ye akpatre, sese, ekewet mmɔ esin ke ŋwed ndidem Israel ye Judah.