Read efik 2 CHRONICLES 36 Bible Online

2 CHRONICLES 36 - efik bible

2 CHRONICLES 36

¹NDIEN mbio-obio eda Jehoahaz eyen Josiah enim ke edidem ke itie ete esie ke Jerusalem.

²Jehoahaz edi isua edip ye ita ke ini enye adade ubɔŋ, ndien enye edi edidem ke Jerusalem ke ɔfiɔŋ ita.

³Ekem edidem Egypt ada enye ke Jerusalem efep, onyuŋ adia isɔŋ talent silver ikie,

⁴ye talent gold kiet. Edikem Egypt onyuŋ ada Eliakim enye-ete esie onim ke edidem Judah ye Jerusalem, onyuŋ ɔkpuhɔre enye enyiŋ, okot Jehoiakim. Ndien Neco omum Joahaz eyen-ete esie, ada enye ɔnyɔŋ ke Egypt.

⁵Jehoiakim osim isua edip ye ition ke ini enye adade ubɔŋ; ndien edi edidem ke isua duopekiet ke Jerusalem: enye onyuŋ anam idiɔk ke iso Jehovah Abasi esie.

⁶Nebuchadnezzar edidem Babylon ɔdɔk edi ekɔŋ ye enye, onyuŋ ɔkɔbi enye ufat-ubɔk, ete ida enye inyɔŋ ke Babylon.

⁷Ndien Nebuchadnezzar ada ndusuk mkpoduoho ufɔk Jehovah ɔnyɔŋ ke Babylon, ekesin mmɔ ke temple esie ke Babylon.

⁸Ndien ama edi ikɔ Jehoiakim eŋwen, ye mbubiam ido esie eke enye akanamde, ye se ekutde enye ke idem, sese, ekewet mmɔ esin ke ŋwed ndidem Israel ye Judah. Ndien Jehoiakim eyen esie ada ubɔŋ ke itie esie.

⁹Jehoiakim osim isua efureta ke ini enye adade ubɔŋ, ndien enye edi edidem ke Jerusalem ke ɔfiɔŋ ita ye usen duop: onyuŋ anam idiɔk ke iso Jehovah.

¹⁰Ekem ke ukabare isua Nebuchadnezzar ɔdɔŋ ekeda enye edi ke Babylon, ye ŋkpɔ-uto ufɔk Jehovah, onyuŋ ada Zedekiah eyen-ete esie onim ke edidem Judah ye Jerusalem.

¹¹Zedekiah osim isua edip ye kiet ke ini enye adade ubɔŋ, ndien enye edi edidem ke Jerusalem ke isua duopekiet.

¹²Enye onyuŋ anam idiɔk ke iso Jehovah Abasi esie, inyuŋ isukke idem esie ke iso Jeremiah prophet, ke uyo Jehovah.

¹³Enye onyuŋ ɔsɔŋ ibuot ye edidem Nebuchadnezzar, emi akanamde enye otomo Abasi: enye onyuŋ ɔsɔŋ obot-itɔŋ esie, onyuŋ ɔsɔŋ esit esie, ete ikufiak itiene Jehovah Abasi Israel.

¹⁴Ndien ŋko kpukpru mbɔŋ oku, ye mbio-obio, edue ediwak ŋkpɔ, esaŋa ye kpukpru mbubiam ido mme idut; mmɔ enyuŋ esabare ufɔk Jehovah, emi enye okonimde ke edisana ke Jerusalem.

¹⁵Ndien Jehovah Abasi mme ete mmɔ ɔdɔŋ mme isuŋ esie utom ke ɔtɔ mmɔ, abak ɔdɔŋ; koro enye enyenede mbɔm ye ikɔt esie ye ebiet iduŋ esie:

¹⁶edi mmɔ esak mme isuŋ-utom Abasi, enyuŋ esin ikɔ esie ke ndek, enyuŋ esuŋi mme prophet esie, tutu Jehovah obumere iyaresit ye ikɔt esie, tutu inyeneke erikure.

¹⁷Ekem enye ada edidem mme Chaldean ɔdɔk etiene mmɔ, ndien enye owot mkparawa mmɔ ke ofut ke ufɔk edisana ebiet mmɔ, inyuŋ inyeneke mbɔm ye mkparawa, ye nditɔ-iban, ye akani-eren ye owo iwat: enye ada kpukpru esin enye ke ubɔk.

¹⁸Ndien ama edi kpukpru mkpoduoho ufɔk Abasi, ikpɔ ye ŋkpri, ye ŋkpɔ-uto ufɔk Jehovah, ye ŋkpɔ-uto edidem, ye eke mbɔŋ esie, enye ataŋ kpukpru ɔnyɔŋ ke Babylon.

¹⁹Mmɔ enyuŋ efɔp ufɔk Abasi, enyuŋ ewuri ibibene Jerusalem, enyuŋ efɔp kpukpru ufɔk mbɔŋ mmɔ ke ikaŋ, enyuŋ ebiat kpukpru ndiye ŋkpɔ esie.

²⁰Ndien enye ataŋ mmɔ eke ofut ɔsuhɔde, ɔnyɔŋ ke Babylon; ndien mmɔ edi ikɔt esie, ye eke nditɔ esie, tutu edidem Persia ada ubɔŋ:

²¹kpaŋ uyo Jehovah ke inua Jeremiah ekpekem, tutu isɔŋ adia mme sabbath esie: ofuri ini emi enye anade ikpikpu, enye onim sabbath tutu isua ata ye duop eyɔhɔ.

²²Ekem ke akpa isua Cyrus edidem Persia, man se Jehovah akadade inua Jeremiah ɔdɔhɔ ekpekem, Jehovah edemere Cyrus edidem Persia spirit, ndien enye ɔdɔŋ ewuhɔ ke ofuri edem emi enye akarade, onyuŋ esin ke ŋwed ŋko, ete,

²³Ntem ke Cyrus edidem Persia ɔdɔhɔ, ete, Jehovah Abasi enyɔŋ ɔmɔnɔ mi kpukpru mme idut ererimbot: enye omonyuŋ owuk mi, ete ndiɔŋ ufɔk nnɔ imɔ ke Jerusalem, emi odude ke Judah. Anie owo ikɔt esie kpukpru odu ke otu mbufo? Yak Jehovah Abasi esie odu ye enye, yak enye onyuŋ ɔdɔk.