Read efik 2 CHRONICLES 4 Bible Online

2 CHRONICLES 4 - efik bible

2 CHRONICLES 4

¹NDIEN enye ada okpoho anam itie-uwa; uniɔŋ esie edi ibio-idomo-okuk edip, ubom esie edi ibio-idomo-okuk edip, ye idaha esie ibio-idomo-okuk duop.

²Enye onyuŋ atara okpoho aŋwana anam mkpɔdiɔhɔ-mmɔŋ (emi edide) ibio-idomo-okuk duop ɔtɔŋɔde ke mben eken osim mben eken, ekara-ekara akanare okuk, idaha esie onyuŋ edi ibio-idomo-okuk ition; uruk ibio-idomo-okuk edip ye duop, onyuŋ odomo enye akan okuk.

³Ndien mbiet enaŋ edu enye ke idak ofuri mben esie ekanare enye ekuk, duop ke ibio-idomo-okuk, duop ke ibio-idomo-okuk, ekanare mkpɔdiɔhɔ-mmɔŋ ekuk. Ekenam udim enaŋ iba oro ke adaŋemi etarade enye.

⁴Enye ɔdiɔhɔ enaŋ duopeba ke edem, enaŋ ita enyuŋ ese usiaha-utin; ndien mkpɔdiɔhɔ-mmɔŋ oro ɔdiɔhɔ mmɔ ke edem isim mmɔ kpukpru enyuŋ esine ke esit-esit.

⁵Ndien udobi esie etie nte ibiɔŋ ekaubɔk, mben esie onyuŋ amia mfri lily, kpa nte usɔ mben cup; enye ekeme ndikama tɔsin bath ita ke idomo.

⁶Enye onyuŋ anam akpaŋkpaŋ duop, ndien ɔdiɔk ition ke nnasia, ye ition ke ufien, man eyet ŋkpɔ ke esit: mmɔ eda se ewade ke edifɔp uwa eyet ke esit: mkpɔ-diɔhɔ-mmɔŋ oro onyuŋ edi se mme oku eyerede ke esit.

⁷Enye onyuŋ anam udiɔhɔ-utuenikaŋ ke gold nte oruk mmɔ edide, ndien ɔdiɔk mmɔ ke temple, ition ke nnasia, ye ition ke ufien. Onyuŋ ada gold anam bowl ikie.

⁸Enye onyuŋ anam okpokoro duop ada ɔdiɔk ke temple, ition ke nnasia, ition ke ufien. Enye onyuŋ anam bowl gold ikie.

⁹Enye onyuŋ anam okure mme oku, ye akamba okure, ye mme itim okure, onyuŋ ada okpoho ofuk itim mmɔ.

¹⁰Ndien enye ada mkpɔdiɔhɔ-mmɔŋ oro ɔdiɔk ke ŋkaŋ nnasia, ke edem usiaha-utin ese usuk.

¹¹Huram onyuŋ anam mme eso, ye mme uwobi-ntɔŋ, ye mme bowl. Ekem Huram anam usɔ eke enye anamde ɔnɔ edidem Solomon ke ufɔk Abasi ama: mme adaha mbiba, ye bowl,

¹²ye mbuot emi edorode ke enyɔŋ mme adaha mbiba, ye mme iyire iba, emi efukde bowl mbuot iba, emi edorode ke enyɔŋ mme adaha oro:

¹³ye mme pomegranate ikie inaŋ ke mme iyire mbiba; ndien pomegranate iba ke iyire kiet, emi ofukde mme bowl mbuot iba, emi edorode ke enyɔŋ mme adaha.

¹⁴Enye onyuŋ anam mme udiɔhɔ-akpaŋkpaŋ, onyuŋ ada mme akpaŋkpaŋ odori ke mme udiɔhɔ oro:

¹⁵mkpɔdiɔhɔ-mmɔŋ kiet, ye mme enaŋ duopeba ke idak esie.

¹⁶Ndien Huram ete esie ada edisak okpoho anam mme eso, ye mme uwobi-ntɔŋ, ye mme fork, ye kpukpru ŋkpɔ utom mmɔ, ɔnɔ edidem Solomon ke eke ufɔk Jehovah.

¹⁷Edidem anam mmɔ ke eritara ŋŋwaŋa ke itihere Jordan ke isɔŋ mbat-eso ke ufɔt Succoth ye Zeredah.

¹⁸Ntem ke Solomon anam ata ediwak mkpoduoho emi: koro mmɔ mikwe nte efiɔkde udobi okpoho oro.

¹⁹Ntem ke Solomon anam kpukpru ŋkpɔ eke edude ke ufɔk Abasi, ye itie-uwa o-gold, ye mme okpokoro udiɔk uyo iso; ye mme uwuk-utuenikaŋ,

²⁰ye mme utuenikaŋ mmɔ, ke oruk mmɔ, man esak ke iso ubet-etak, ke edisana gold:

²¹enye onyuŋ ada gold anam mme flower, ye mme utuenikaŋ, ye mme ufat-ikaŋ, oro edi ata edisana gold;

²²ye mme udiɔŋ-utuenikaŋ, ye mme bowl, ye mme ikpaŋ-idaŋ, ye mme censer ata eti gold: ye enyin-usuŋ ufɔk, ye itim esit-esit, eke ata edisana ubet, ye itim ubet temple, ke gold.