Read efik EZRA 1 Bible Online

EZRA 1 - efik bible

EZRA 1

¹EDIKEM ke akpa isua Cyrus edidem Persia, man se Jehovah akadade inua Jeremiah ɔdɔhɔ ekpekem, Jehovah edemere spirit Cyrus, edidem Persia, ndien enye owuk ofuri edem emi enye akarade, onyuŋ esin ke ŋwed ŋko, ete,

²Ntem ke Cyrus edidem Persia ɔdɔhɔ, ete, Jehovah Abasi enyɔŋ ɔmɔnɔ mi kpukpru mme idut ererimbot, omonyuŋ eteme mi, ete ndiɔŋ ufɔk Jerusalem emi odude ke Judah nnɔ imɔ.

³Anie owo mbufo odu ke otu kpukpru ikɔt esie, yak Abasi esie odu ye enye; yak enye onyuŋ ɔdɔk ke Jerusalem emi odude ke Judah, onyuŋ ɔdiɔŋ ufɔk Jehovah Abasi Israel (enye edi Abasi), emi odude ke Jerusalem.

⁴Ndien ama edi kpukpru owo eke esuhɔde ke ebiet ekededi eke mmɔ eduŋde do, yak mbon ebiet mmɔ oro eŋwam mmɔ ke silver, ye ke gold, ye ke inyene, ye ke ufene, ekɔrɔ ye enɔ ima ufɔk Abasi emi odude ke Jerusalem.

⁵Ndien mme etubom mme ete Judah ye Benjamin, ye mme oku, ye mme Levite, ye kpukpru mmɔ eke Abasi edemerede esit mmɔ, edaha ke enyɔŋ, ete idɔk ikɔbɔp ufɔk Jehovah emi odude ke Jerusalem.

⁶Ndien kpukpru mmɔ eke ekande mmɔ ekuk eda ŋkpɔ silver, ye gold, ye inyene, ye ufene, ye ŋkpɔ-uto esɔŋɔ mmɔ ubɔk, ekɔrɔ ye kpukpru se enɔde ke ima esit.

⁷Ndien Cyrus edidem osioŋo mkpoduoho ufɔk Jehovah oro Nebuchadnezzar akataŋde ke Jerusalem efep, edisin ke ufɔk abasi esie;

⁸ndien Cyrus edidem Persia osioŋo mmɔ ke ubɔk Mithredath akama-ukpɔhɔre, onyuŋ abat mmɔ ɔnɔ Sheshbazzar ɔbɔŋ Judah.

⁹Emi onyuŋ edi ibat mmɔ: basin o-gold edip ye duop, tɔsin bason e-silver, ikwa edip ye usukkiet,

¹⁰cup o-gold edip ye duop, cup silver oruk efen ikie inaŋ ye duop, ye tɔsin mkpoduoho efen.

¹¹Kpukpru mkpoduoho o-gold ye silver edi tɔsin ition ye ikie inaŋ. Sheshbazzar ada kpukpru mmɔ emi ɔdɔk ye mbon ntaŋ-mfep, emi edade ke Babylon edɔk ke Jerusalem.