Read efik EZRA 5 Bible Online

EZRA 5 - efik bible

EZRA 5

¹NDIEN mme prophet, Haggai prophet, ye Zechariah eyen Iddo, etiŋ prophecy enɔ mme Jew, emi edude ke Judah ye Jerusalem, ke enyiŋ Abasi Israel, enɔ kpa mmɔ.

²Ndien Zerubbabel eyen Shealtiel, ye Jeshua eyen Jozadak, edaha ke enyɔŋ etɔŋɔ ndibɔp ufɔk Abasi emi odude ke Jerusalem: mme prophet Abasi enyuŋ eŋwam mmɔ ŋko.

³Ke kpasuk ini oro Tattenai, emi akarade edem akpa emi, ye Shethar-bozenai, ye mme nsaŋa mmɔ, edi ke ɔtɔ mmɔ, edidɔhɔ mmɔ ntem, ete, Anie owo ɔkɔnɔ mbufo item, ete ebɔp ufɔk emi, enyuŋ enam ibibene emi ema?

⁴Ndien ntem ke nnyin isian mmɔ enyiŋ mme mmɔ emi enamde utom ubɔp ebiet emi nte edide.

⁵Edi enyin Abasi mmɔ ese mbiowo mme Jew, ndien mmɔ ikwe nte enamde mmɔ edop, tutu ikɔ emi edi ke iso Darius; ndien mmɔ enɔ ŋwed esɔk mmɔ ebaŋa ikɔ emi.

⁶Emi edi ŋwed oro ekekaŋade, emi Tattenai, andikara edem akpa emi, ye Shethar-bozenai ye mme nsaŋa mmɔ mme Apharsachite, emi edude ke edem akpa emi, ekenɔde esɔk Darius edidem.

⁷Mmɔ enɔ ŋwed esɔk enye, enyuŋ ewet ntem ke esit, ete, “Ekɔm Darius edidem ke kpukpru oruk mfɔn.

⁸Yak edidem ɔfiɔk, ete ke nnyin ima ika ke province Judah, isim ufɔk akwa Abasi, ndien mmɔ ebɔp enye ke ikpɔ itiat, enyuŋ edori eto ke ibibene, mmɔ enyuŋ esin idem enam utom emi, utom onyuŋ aka iso ke ubɔk mmɔ.

⁹Ndien nnyin ibup mbiowo oro, idɔhɔ mmɔ ntem, ite, Anie owo ɔkɔnɔ mbufo item, ete ebɔp ufɔk emi, enyuŋ ema ibibene emi?

¹⁰Nnyin ima inyuŋ ibup enyiŋ mmɔ man isian fi, man iwet enyiŋ mme mmɔ emi edide mme etubom mmɔ.

¹¹Ndien mmɔ ebɔrɔ nnyin ikɔ ntem, ete, Nnyin idi ikɔt Abasi enyɔŋ ye isɔŋ, inyuŋ ibɔp ufɔk emi ekebɔpde toto ko anyan ini, emi akwa edidem Israel kiet ɔkɔbɔpde, onyuŋ ama enye.

¹²Edi adaŋemi mme ete nnyin ekeyatde Abasi enyɔŋ esit, enye ada mmɔ esin ke ubɔk Nebuchadnezzar edidem Babylon, eyen Chaldea, ndien enye osobo ufɔk emi, onyuŋ ataŋ mbio oro ɔnyɔŋ, ke Babylon.

¹³Edi ke akpa isua Cyrus edidem Babylon, edidem Cyrus owuk ewuhɔ, ete ebɔp ufɔk Abasi emi.

¹⁴Ndien ŋko ama edi mkpoduoho ufɔk Abasi o-gold ye silver, emi Nebuchadnezzar akataŋde ke temple emi okodude ke Jerusalem ɔnyɔŋ, ada mmɔ okonim ke temple ke Babylon, mmɔ ke Cyrus okosio ke temple Babylon, onyuŋ ada mmɔ ɔnɔ owo emi ekerede Sheshbazzar, emi enye okonimde ke etubom;

¹⁵onyuŋ ɔdɔhɔ enye, ete, Bɔ mkpoduoho emi, ka konim mmɔ ke temple emi odude ke Jerusalem, yak mmɔ enyuŋ ebɔp ufɔk Abasi ke itie esie.

¹⁶Ntre ke Sheshbazzar oro edi editɔŋɔ ndibɔp ufɔk Abasi emi odude ke Jerusalem; ndien toto ke ini oro ebebɔp tutu osim ini emi edi ika-imaha.

¹⁷Mmɔdo edieke edidem amade, yak eduŋɔre ufɔk ŋkpɔ-uto edidem, emi odude do ke Babylon, mme edi ntre, ete ke Cyrus okowuk ewuhɔ, ete ebɔp ufɔk Abasi emi odude ke Jerusalem, ndien yak edidem asian nnyin se enye amade abaŋa ŋkpɔ emi”.