Read efik NEHEMIAH 1 Bible Online

NEHEMIAH 1 - efik bible

NEHEMIAH 1

¹IKƆ Nehemiah eyen Hacalaiah. Edikem ke ɔfiɔŋ Chislev, ke ɔyɔhɔ isua edip, ke ini ami ndude ke Shushan ufɔk edidem.

²Ndien Hanani, owo nditɔ-ete mi kiet, oto edi, ye ndusuk nditɔ Judah, ndien mbup mmɔ mbaŋa mme Jew oro ekebɔhɔde, emi esuhɔde ke otu mmɔ oro eketode ke itie ntaŋ-mfep, nnyuŋ mbup mbaŋa Jerusalem.

³Ndien mmɔ edɔhɔ mi, ete, Mme mmɔ oro eketode ke itie ntaŋ-mfep esuhɔ ko ke province, ke etie ke akwa ukut, ye ke esuene: ibibene Jerusalem onyuŋ owure, itim esie ema enyuŋ eta ikaŋ.

⁴Edikem ke ini ŋkopde ikɔ emi, nsuhɔre ntie, nnyuŋ ntua eyet, nnyuŋ nseme ndusuk usen, nnyuŋ ntre udia, nnyuŋ mbɔŋ akam ke iso Abasi enyɔŋ.

⁵Ndien ndɔhɔ nte, Mbɔk, Jehovah Abasi enyɔŋ, akamba Abasi emi enyenede uteŋe, emi onimde ediomi ye ima ɔnɔ mmɔ emi emade enye, enyuŋ enimde mbet esie:

⁶mbɔk, kpaŋ utɔŋ, nyuŋ tat enyin, man okop mkpe-ubɔk owo fo, emi ami ŋkpede ke iso fo mfin, ke uwemeyo ye ke okoneyo, mbaŋa nditɔ Israel ikɔt fo, nnyuŋ nyarare mme idiɔk ido nditɔ Israel, emi nnyin ikenamde ye afo kpa ami ye ufɔk ete mi ikedue.

⁷Nnyin ima inam oburobut ye afo, inyuŋ ikpemeke mbet, ye ewuhɔ, ye item oro afo okowukde Moses owo fo.

⁸Mbɔk, ti ikɔ emi afo okowukde Moses owo fo, ete Mbufo ema edue, ami nyesuan mbufo ke otu mme idut:

⁹ndien mbufo ema efiak etiene mi, enyuŋ enim ibet mi, enyuŋ enam mmɔ; mbufo ekpesuana tutu esim ke utit enyɔŋ, ŋkpataŋ mmɔ do mbon, nnyuŋ nda mmɔ ndi ke ebiet emi ŋkemekde man nnim enyiŋ mi do.

¹⁰Ndien mme mmɔ emi edi ifin fo, emi afo akafakde ke akwa odudu fo, ye ke ɔkpɔsɔŋ ubɔk fo.

¹¹Mbɔk, O Ɔbɔŋ, kpaŋ utɔŋ fo ke mkpeubɔk owo fo, ye ke mkpeubɔk ikɔt fo emi emade ndibak enyiŋ fo: mbɔk, nyuŋ nam owo fo okut unen mfin emi nyuŋ nam owo emi atua enye mbɔm. Ndien ami ndi akama-wine edidem.