Read efik NEHEMIAH 2 Bible Online

NEHEMIAH 2 - efik bible

NEHEMIAH 2

¹EKEM ke ɔfiɔŋ Nisan, ke ɔyɔhɔ isua Artaxerxes edidem edip, wine ɔdiɔhɔ enye ke iso: ndien ami mmen wine oro nnɔ edidem. Ndien ŋkanam mfuhɔ ke iso esie.

²Ndien edidem ɔdɔhɔ mi, ete, Nsinam iso ɔfuhɔde fi, ke afo mudɔŋɔke? Emi idige ŋkpɔ ke mibɔhɔke ndutuhɔ esit. Ndien akamba ndik anam mi eti-eti;

³ami nnyuŋ ndɔhɔ edidem, nte, Yak edidem akam odu uwem ke nsinsi: ke didie ke iso mikpɔfuhɔke mi ke ini obio emi edide ebiet udi mme ete mi edide ndon, mme itim esie ema enyuŋ eta ikaŋ?

⁴Ndien edidem ɔdɔhɔ mi, ete, Nso ke afo oyom? Ndien ŋkpe Abasi enyɔŋ ubɔk.

⁵Ndien ndɔhɔ edidem, nte, Edieke edidem amade, owo fo onyuŋ enemde fi, nte afo ɔkpɔdɔŋ mi utom ke Judah, ke obio udi mme ete mi, man ndiɔŋ enye.

⁶Ndien edidem ɔdɔhɔ mi (ŋwan esie etie enye ke ŋkaŋ) ete, Isaŋ fo edidi adaŋa didie? Afo edinyuŋ afiak ini ewe? Ndien ŋkpɔ enem edidem esit, ndien enye ɔdɔŋ mi utom; ami nnyuŋ nnim ini nnɔ enye.

⁷Nnyuŋ ndɔhɔ edidem, nte, Edieke edidem amade, yak ɔnɔ mi ŋwed nda nsɔk mme andikara ke edem akpa oko, man mmɔ eda mi usuŋ tutu nsim ke Judah;

⁸ye ŋwed kiet eke ndade nsɔk Asaph andikpeme akai emi enyenede edidem, ete enye ɔnɔ mi eto ke eke obubɔk usuŋ edikoŋ ufɔk temple, ye ke eke ibibene obio, ye ke eke ufɔk eke ami ndiduŋde ke esit. Ndien edidem ɔnɔ mi oto edifɔn ubɔk Abasi mi emi odude ye ami.

⁹Ekem ndisim mme andikara ke edem akpa oko, nnyuŋ nnɔ mmɔ ŋwed edidem. Edidem okonyuŋ ɔdɔŋ mme etubom mbon-ekɔŋ ye mme mbio horse, ete esaŋa ye ami.

¹⁰Ekem adaŋemi Sanballat Horonite, ye Tobiah ofin oro, Ammonite, ekopde, mmɔ ese enye ke ata idiɔk-ŋkpɔ eti-eti, koro owo edide ndiyom mfɔn nditɔ Israel.

¹¹Ntre ke ami nsim Jerusalem, nnyuŋ ndu do ke usen ita.

¹²Ekem ami ndaha ke enyɔŋ ke okoneyo, owo esisit enyuŋ esaŋa ye ami: ndien ŋkɔdɔhɔke baba owo kiet se Abasi mi ekesinde mi ke esit, ete nnam ke Jerusalem: unam baba kiet inyuŋ iduhe ye ami, ke mibɔhɔke unam emi ndorode ke esit.

¹³Ndien nsaŋa ke okoneyo ke inua-otop ebedeŋ ŋwɔrɔ ŋka ke iso obube mmɔŋ dragon, ye ke inua-otop ifum, ndien ntim nse ibibene Jerusalem emi owurede, mme itim esie enyuŋ eta ikaŋ.

¹⁴Ndien mbe nsim inua-otop idim mmɔŋ, ye mkpɔdiɔhɔ-mmɔŋ edidem, ndien ebiet eke unam ke idak mi akpasaŋade ebe, iduhe.

¹⁵Ndien nsaŋa ke itihere ndɔk ke okoneyo nnyuŋ ntim nse ibibene, ndien ŋkabare ndi ke inua-otop ebedeŋ. Ntem ke mfiak.

¹⁶Ndien mbɔŋ obio ifiɔkke ebiet eke ŋkade, ye ŋkpɔ eke nnamde: ŋkonyuŋ ntiŋke nnɔ mme Jew, ye mme oku, ye ikpɔ owo, ye mbɔŋ, ye mmɔ efen eke enamde utom, tutu osim ini emi.

¹⁷Ndien ndɔhɔ mmɔ, nte, Mbufo emekut idiɔk itie emi nnyin itiede ke esit, nte Jerusalem anade ndon, nte mme itim esie enyuŋ etade ikaŋ: mbufo edi, nnyin idiɔŋ ibibene Jerusalem, man nnyin ikudi aba ŋkpɔ but.

¹⁸Ndien nsian mmɔ ubɔk Abasi mi, nte enye ɔkɔfɔnde ye ami: ye ikɔ edidem ŋko oro enye ɔkɔdɔŋde mi. Ndien mmɔ edɔhɔ, ete, Yak nnyin idaha ke enyɔŋ inyuŋ idiɔŋ. Ndien mmɔ esɔŋɔ ubɔk enam eti ŋkpɔ.

¹⁹Ekem adaŋemi Sanballat Horonite oro, ye Tobiah ofin, eyen Ammon, ye Geshem Arabian, ekopde, mmɔ esak nnyin, enyuŋ esin nnyin ke ndek, ete Nsidi ŋkpɔ emi mbufo enamde? Nte mbufo eyom ndisɔŋ ibuot ye edidem?

²⁰Ndien ami mbɔrɔ mmɔ ikɔ, nnyuŋ ndɔhɔ mmɔ, nte, Abasi enyɔŋ eyenɔ nnyin unen: ndien nnyin ikɔt esie iyedaha ke enyɔŋ, inyuŋ ibɔp: edi mbufo inyeneke udeme, ye itie, ye ŋkpɔ eriti ke Jerusalem.