Read efik NEHEMIAH 3 Bible Online

NEHEMIAH 3 - efik bible

NEHEMIAH 3

¹NDIEN Eliashib akamba oku, ye nditɔ-ete esie, mme oku, edaha ke enyɔŋ ebɔp inua-otop ŋkpri ufene; mmɔ enim enye enɔ Abasi, enyuŋ ekɔŋ itim esie, enyuŋ enim enye enɔ Abasi tutu osim ke tower Hammeah, ye ke tower Hananel.

²Ndien mbio-obio Jericho ebɔp ediana enye. Zaccur eyen Imri onyuŋ ɔbɔp adiana mmɔ.

³Ndien nditɔ Hassenaah ebɔp inua-otop iyak, mmɔ enam obubɔk esie, enyuŋ ekɔŋ itim esie, ye locks esie, ye usin-usuŋ esie.

⁴Ndien Meremoth eyen Uriah, eyen Hakkoz, ɔdiɔŋ adiana mmɔ. Ndien Meshullam eyen Berechiah, eyen Meshezabeel ɔdiɔŋ adiana mmɔ. Zadok eyen Baana onyuŋ ɔdiɔŋ adiana mmɔ.

⁵Mbio-obio Tekoa enyuŋ ediɔŋ ediana mmɔ; edi mbɔŋ mmɔ isinke itɔŋ mmɔ ke utom ɔbɔŋ mmɔ.

⁶Ndien Joiada eyen Paseah, ye Meshullam eyen Besodeiah ediɔŋ akani inua-otop; mmɔ enam obubɔk esie, enyuŋ ekɔŋ itim esie, ye locks esie, ye usin-usuŋ esie.

⁷Ndien Melatiah Gibeonite, ye Jadon Meronothite, ye mbio Gibeon ye eke Mizpah ediɔŋ ediana mmɔ, tutu osim ke itie ubɔŋ andikara edem akpa emi.

⁸Ndien Uzziel eyen Harhaiah owo mbon-usɔ gold kiet ɔdiɔŋ adiana enye. Ndien Hananiah eyen mme abuak-ibɔk kiet ɔdiɔŋ adiana enye. Ndien mmɔ ediɔŋ Jerusalem tutu esim ke edidobi ibibene.

⁹Ndien Rephaiah eyen Hur, etubom ubak Jerusalem kiet ɔdiɔŋ adiana mmɔ.

¹⁰Jedaiah eyen Harumaph onyuŋ ɔdiɔŋ adiana mmɔ, ekem ye ufɔk esie. Ndien Hattush eyen Hashabneiah ɔdiɔŋ adiana enye.

¹¹Malchijah eyen Harim, ye Hasshub eyen Pahath-moab ediɔŋ ubak ekem ye tower mme furnance.

¹²Shallum eyen Hallohesh, etubom ubak Jerusalem, ye nditɔ-iban esie ediɔŋ ediana enye.

¹³Hanum ye mme andiduŋ Zanoah ediɔŋ inua-otop itihere; mmɔ ediɔŋ enye, enyuŋ ekɔŋ mme itim esie, ye locks esie, ye usin-usuŋ esie; enyuŋ ebɔp ibibene ke tɔsin ibio-idomo-okuk, tutu osim ke inua-otop ifum.

¹⁴Edi Malchijah eyen Rechab, etubom ubak Beth-haccerem, ediɔŋ inua-otop ifum. Enye ɔbɔp enye, onyuŋ ɔkɔŋ itim esie, ye locks esie, ye usin-usuŋ esie.

¹⁵Edi Shallun eyen Col-hozeh, etubom ubak Mizpah, ɔdiɔŋ inua-otop idim; enye ɔbɔp enye, onyuŋ okubi enye, onyuŋ ɔkɔŋ itim esie, ye locks esie, ye usin-usuŋ esie, ye ibibene mkpɔdiɔhɔ-mmɔŋ Shelah tutu osim iŋwaŋ-esa edidem, udigukot emi otode ke obio David ɔsuhɔre.

¹⁶Ndien Nehemiah eyen Azbuk, etubom ubak Beth-zur, ɔdiɔŋ adiana enye, tutu ekem ye udi David, ye mkpɔdiɔkhɔ-mmɔŋ emi ekenamde, ye ke ufɔk mbon-uko.

¹⁷Ndien mme Levite ediɔŋ ediana enye, Rehum eyen Bani. Hashabiah, etubom ubak Keilah, ɔdiɔŋ adiana enye, ke ubak esie.

¹⁸Ndien nditɔ-ete mmɔ, Bavvai eyen Henadad, etubom ubak Keilah, ediɔŋ ediana enye.

¹⁹Ndien Ezer eyen Jeshua, etubom Mizpah, adiana enye ɔdiɔŋ ubak efen, ekem ye usuŋ emi edɔkde ke ufɔk unim-ŋkpɔ-ekɔŋ ke inuk.

²⁰Baruch eyen Zabbai esin idem ɔdiɔŋ ubak efen ɔtɔŋɔde ke inuk tutu osim enyn-usuŋ ufɔk Eliashib, ɔbɔŋ oku.

²¹Meremoth eyen Uriah, eyen Hak-koz, adiana enye ɔdiɔŋ ubak efen, ɔtɔŋɔde ke enyin-usuŋ ufɔk Eliashib, tutu osim ke utit ufɔk Eliashib.

²²Ndien mme oku, mbon itihere Jordan, ediɔŋ ediana enye.

²³Ndien Benjamin ye Hasshub ediana enye ediɔŋ ekem ye ufɔk mmɔ. Azariah eyen Maaseiah, eyen Ananiah, adiana enye ɔdiɔŋ ke mben ufɔk esie.

²⁴Binnui eyen Henadad adiana enye ɔdiɔŋ ubak efen, ɔtɔŋɔde ke ufɔk Azariah tutu osim ke ukabare ibibene ke inuk.

²⁵Palal eyen Uzai ekem ye ukabare ibibene ye tower, emi ɔwɔrɔde ekem ye ufɔk enyɔŋ edidem, emi ekperede okure ufɔk ukwak. Pedaiah eyen Parosh onyuŋ adiana enye.

²⁶Ndien ŋko mme Nethinim eduŋ ke Ophel, tutu ekem ye inua-otop mmɔŋ ese edem usiaha-utin, ye tower emi ɔwɔrɔde ada.

²⁷Ndien mbio-obio Tekoa ediana enye ediɔŋ ubak efen, ekem ye akwa tower emi ɔwɔrɔde ada, tutu osim ke ibibene Ophel.

²⁸Ɔtɔŋɔde ke inua-otop mme horse, mme oku ediɔŋ, kpukpru owo ekem ye esien mmɔ.

²⁹Zadok eyen Immer adiana mmɔ ɔdiɔŋ ekem ye ufɔk esiemɔ. Ndien Shemaiah eyen Shecaniah andikpeme inua-otop ke edem usiaha utin ɔdiɔŋ adiana enye.

³⁰Ndien Hananiah eyen Shelemiah, ye Hanun, ɔyɔhɔ eyen Zalaph itio-kiet, ediana enye ediɔŋ ubak efen. Ndien Meshullam eyen Berechiah, adiana enye ɔdiɔŋ ekem ye ubet esie.

³¹Ndien Malchijah eyen owo-usɔ-gold adiana enye ɔdiɔŋ tutu osim ebiet mme Nethinim, ye eke mbon-urua, ekem ye inua-otop Hammiphkad, tutu osim ke usuŋ emi edɔkde ke inuk.

³²Ndien mbon-usɔ-gold, ye mbon urua ediɔŋ ufaŋ usuŋ emi edɔkde ke inuk ye inua-otop ŋkpri ufene.