Read efik NEHEMIAH 9 Bible Online

NEHEMIAH 9 - efik bible

NEHEMIAH 9

¹EKEM ke ɔyɔhɔ usen edip ye inaŋ ke ɔfiɔŋ emi, nditɔ Israel esop idem etre udia, esine ɔfɔŋ-ikpo, ntan onyuŋ odoro mmɔ ke idem.

²Ubon Israel enyuŋ edia-nare ye kpukpru isen owo, enyuŋ eda eyarare mme idiɔk ido mmɔ, ye mme ukwaŋ-ŋkpɔ mme ete mmɔ.

³Ndien mmɔ edaha eda ke itie mmɔ, enyuŋ etiŋ ŋwed mbet Jehovah Abasi mmɔ ke ɔyɔhɔ ubak usen inaŋ, ndien ke ɔyɔhɔ ubak usen inaŋ efen, mmɔ eyarare, enyuŋ ebɔŋ akam enɔ Jehovah Abasi mmɔ.

⁴Mme Levite enyuŋ edaha eda ke ɔtɔ eke edɔkde, kpa Jeshua ye Bani, ye Kadmiel, ye Shebaniah, ye Bunni, ye Sherebiah, ye Bani, ye Che-nani, enyuŋ eseme enɔ Jehovah Abasi mmɔ ke ɔkpɔsɔŋ uyo.

⁵Ndien mme Levite, Jeshua, ye Kadmiel, ye Bani, ye Hashabneiah, ye Sherebiah, ye Hodiah, ye Shebaniah, ye Pethahiah, edɔhɔ, ete, Mbufo edaha ke enyɔŋ ekɔm Jehovah Abasi mbufo ke nsinsi nsinsi: yak mmɔ enyuŋ ekɔm enyiŋ ubɔŋ fo, emi okoŋde akan kpukpru ekɔm ye itoro.

⁶Afo edi enye, O Jehovah, afo ikpɔŋ: edi afo akanam ikpa-enyɔŋ, ye ata enyɔŋ, ye kpukpru udim mmɔ, ye isɔŋ, ye kpukpru se idude ke esit, ye inyaŋ ye kpukpru se idude ke esit, afo onyuŋ onim kpukpru mmɔ uwem; udim enyɔŋ enyuŋ etuak ibuot enɔ fi.

⁷Edi afo, O Jehovah Abasi, ekemek Abram, onyuŋ ada enye ke Ur mme Chaldean ɔwɔrɔ, onyuŋ osio enye enyiŋ Abraham;

⁸afo okonyuŋ okut ete ke esit esie enyene akpanikɔ ke iso fo, afo onyuŋ odiomi ediomi ye enye, ete eyeda isɔŋ mme Canaanite, ye eke mme Hittite, ye eke mme Amorite, ye eke mme Perizzite, ye eke mme Jebusite, ye eke mme Girgashite, ete eyeda enye ɔnɔ ubon esie afo ama onyuŋ anam ke uyo fo ŋko; koro afo enende:

⁹ndien afo okokut ukut mme ete nnyin ke Egypt, okonyuŋ okop eseme mmɔ ke mben Ididuot Inyaŋ;

¹⁰afo okonyuŋ owut idiɔŋɔ ye utibe ŋkpɔ ke idem Pharaoh, ye ke idem kpukpru ikɔt esie, ye ke eke kpukpru mbio-obio esie: koro afo ɔfiɔkde ete ke mmɔ ekeseri iseri ye mmɔ. Ntre ke afo akanam enyiŋ ɔnɔ idem fo kpa nte edide mfin emi.

¹¹Ndien afo abakhare inyaŋ ke iso mmɔ, ndien mmɔ esaŋa ke ufɔt inyaŋ ke nsat-isɔŋ ebe; afo onyuŋ emen mme andibine mmɔ ɔduɔk ke udem, nte itiat ke akamba mmɔŋ.

¹²Ndien ŋko afo ada mmɔ usuŋ ke adaha obubit enyɔŋ ke uwemeyo; ye ke adaha ikaŋ ke okoneyo, ndiŋwaŋa ɔkpɔ-usuŋ eke mmɔ esaŋade ke esit nnɔ mmɔ.

¹³Afo onyuŋ ɔsuhɔre ke obot Sinai, eketie ke enyɔŋ eneme ye mmɔ, onyuŋ ɔnɔ mmɔ edinen ikpe, ye mbet akpanikɔ, ye nti ewuhɔ ye ido:

¹⁴onyuŋ anam mmɔ efiɔk edidsana sabbath fo, onyuŋ ada ubɔk Moses owo fo owuk mmɔ mbet, ye ewuhɔ ye ido:

¹⁵onyuŋ ɔnɔ mmɔ udia emi otode ke enyɔŋ ke ini ɔbiɔŋ mmɔ, onyuŋ osio mmɔŋ ke itiat ɔnɔ mmɔ ke ini nsat-itɔŋ mmɔ, onyuŋ ɔdɔhɔ mmɔ, ete eyeduk ekeda isɔŋ oro afo ɔkɔŋwɔŋɔde, ete iyenɔ mmɔ.

¹⁶Edi mmɔ ye mme ete nnyin eseri iseri, enyuŋ esɔŋ obot itɔŋ mmɔ, inyuŋ inimke mbet fo,

¹⁷inyuŋ inyimeke ndikop, inyuŋ itihe utibe ŋkpɔ fo oro afo akanamde ke otu mmɔ, edi esɔŋ obot itɔŋ mmɔ, enyuŋ esɔŋ ibuot, enim etubom, ete ifiak ke itie ufin mmimɔ. Edi afo edi Abasi eridahado, ye mfɔn, ye mbɔm, ye anyan ime, ye akwa ima, ndien ukpɔŋke mmɔ.

¹⁸Ndien, kpa ke ini emi mmɔ enamde editara eyen enaŋ ke idem mmɔ, enyuŋ edɔhɔde, ete, Emi edi Abasi fo emi akadade fi ke Egypt ɔdɔk, enyuŋ enamde ikpɔ ŋkpɔ but;

¹⁹ndien akwa mbɔm fo iyakke fi ɔkpɔŋ mmɔ ke wilderness: adaha obubit enyɔŋ idorokede ikpɔŋ mmɔ ke uwemeyo, itre ndida mmɔ usuŋ; adaha ikaŋ inyuŋ idorokede ke okoneyo itre ndiŋwaŋa usuŋ eke mmɔ esaŋade ke esit nnɔ mmɔ.

²⁰Afo onyuŋ ɔnɔ mmɔ eti spirit fo man anam mmɔ efiɔk ŋkpɔ, unyuŋ usioho mmɔ manna fo ke inua ufep, onyuŋ ɔnɔ mmɔ mmɔŋ ke ini nsat-itɔŋ mmɔ.

²¹Ndien afo ɔbɔk mmɔ ke wilderness ke isua aba; ŋkpɔ inanake mmɔ, edisine-ŋkpɔ mmɔ itahake, ukot mmɔ inyuŋ ifutke.

²²Onyuŋ ɔnɔ mmɔ obio ye idut ŋko, onyuŋ abahare mmɔ ke itie, ke itie: mmɔ enyuŋ eda isɔŋ Sihon, kpa isɔŋ edidem Heshbon, ye isɔŋ Og edidem Bashan.

²³Afo onyuŋ anam nditɔ mmɔ ewak nte ntantafiɔŋ enyɔŋ, onyuŋ ada mmɔ oduk ke isɔŋ oro afo ɔkɔŋwɔŋɔde ɔnɔ mme ete mmɔ, ete ke mmɔ eyeduk ekeda.

²⁴Ntre ke nditɔ mmɔ eduk ekeda isɔŋ emi, afo onyuŋ ɔsuhɔre mme andiduŋ isɔŋ, kpa mme Canaanite, ke iso mmɔ, onyuŋ ada mmɔ esin mmɔ ke ubɔk, ye ndidem mmɔ, ye mbio isɔŋ, ete enam mmɔ kpa nte emade.

²⁵Ndien mmɔ eda obio ibibene ekɔŋ, ye isɔŋ isek, enyuŋ enyene ufɔk emi kpukpru oruk nti ŋkpɔ eyɔhɔde ke esit, obube mmɔŋ emi eketibide, ye iŋwaŋ-vine, ye iŋwaŋ-olive, ye ediwak eto mfri eke ediade. Ndien mmɔ edia eyuhɔ, enyuŋ ekponi, enyuŋ edat esit ke akwa mfɔn fo.

²⁶Ekem mmɔ emiom, emiom, enyuŋ esɔŋ ibuot ye afo, enyuŋ emen ewuhɔ fo eduɔk ke edem mmɔ, enyuŋ ewot mme prophet fo oro ekesuade enɔ mmɔ, ete ida mmɔ ifiak isɔk fi, mmɔ enyuŋ enam ikpɔ ŋkpɔ but.

²⁷Mmɔdo afo ekesinde mmɔ ke ubɔk mme asua mmɔ, eke efikde mmɔ. Ekem mmɔ eseme enɔ fi ke ini nnan-enyin mmɔ, afo onyuŋ etie ke enyɔŋ okop; ndien uwak mbɔm fo esin fi ɔnɔ mmɔ mme andi-nyaŋa eke enyaŋade mmɔ esio mme asua mmɔ ke ubɔk.

²⁸Ndien ke adaŋemi mmɔ ekutde nduɔk-odudu, mmɔ etɔŋɔ ntak enam idiɔk ke iso fo, ndien afo ɔkpɔŋ mmɔ ke ubɔk mme asua mmɔ eke ekarade mmɔ. Edi adaŋoro mmɔ etɔŋɔde ntak eseme enɔ fi, afo etie ke enyɔŋ okop, onyuŋ anyaŋa mmɔ ediwak ini ke mbɔm fo.

²⁹Ndien afo asua ɔnɔ mmɔ, man anam mmɔ efiak ke ibet fo: edi mmɔ eseri iseri, inyuŋ ikopke ibet fo, edi edue mme item fo, eke owo eke anamde mmɔ edidude uwem ke esit; mmɔ enyuŋ enim afara emiom-emiom, enyuŋ esɔŋ obot itɔŋ mmɔ, inyuŋ ikopke.

³⁰Edi afo eme ime ye mmɔ ediwak isua, onyuŋ ada spirit fo asua ɔnɔ mmɔ ke ubɔk mme prophet fo: edi mmɔ ikpaŋke utɔŋ. Ndien afo emen mmɔ esin mbio mme idut ke ubɔk.

³¹Edi uwak mbɔm fo iyakke fi osobo mmɔ fap, inyuŋ iyakke fi ɔkpɔŋ mmɔ: koro afo edide Abasi mfɔn ye mbɔm.

³²Mbɔk, ndien, O Abasi nnyin, akwa, ye ɔkpɔsɔŋ Abasi emi enyenede ndik, onyuŋ onimde ediomi ye ima, kuse ofuri ukut emi nnyin, ye ndidem nnyin, ye mbɔŋ nnyin, ye mme oku nnyin, ye mme prophet nnyin, ye mme ete nnyin, ye ofuri ikɔt fo ekekutde, toto ke eyo edidem Assyria, tutu osim mfin emi, ke ekpri ŋkpɔ.

³³Edi afo emenen ke kpukpru se ama okosim nnyin; koro afo akanamde akpanikɔ; edi nnyin imɔdiɔk:

³⁴ndien ndidem nnyin, ye mbɔŋ nnyin, ye mme oku nnyin, ye mme ete nnyin, ikenimke mme ewuhɔ fo, inyuŋ inimke ibuot ke ibet fo, ye ke item fo, emi afo adade asua ɔnɔ mmɔ.

³⁵Ndien mmɔ ikanamke ŋkpɔ fo ke obio mmɔ, ye ke akamba mfɔn oro afo ɔkɔnɔde mmɔ, ye ke akamba isɔŋ isek emi afo okonimde ke iso mmɔ, mmɔ inyuŋ ikabakede ikpɔŋ mme idiɔk utom mmɔ.

³⁶Sese, nnyin idi ifin mfin emi, ndien ama edi isɔŋ emi afo ɔkɔnɔde mme ete nnyin, ete edia mfri esie, ye mfɔn esie, sese, nnyin idi ifin ke esit:

³⁷enye onyuŋ anam ediwak ŋkɔri ɔnɔ ndidem emi afo onimde, ete ekara nnyin ke abaŋa mme idiɔk ido nnyin: ndien mmɔ ekara nnyin idem, ye ufene nnyin, kpa nte mmɔ emade; nnyin inyuŋ itie ke akwa ukut.

³⁸Ndien kpukpru ŋkpɔ emi esin nnyin idiomi ediomi, inyuŋ iwet; ndien mbɔŋ nnyin, ye mme Levite nnyin, ye mme oku nnyin, enyuŋ efik ke ufik-ŋwed mmɔ.