Read efik ESTHER 4 Bible Online

ESTHER 4 - efik bible

ESTHER 4

¹EKEM ke ini Mordecai edifiɔkde kpukpru se enamde, Mordecai awai edisine-ŋkpɔ esie, onyuŋ esine ɔfɔŋ-ikpo ye ntɔŋ ke idem, ndien ɔwɔrɔ aka ke ufɔt obio, onyuŋ, eseme akamba ye edidoro eseme:

²onyuŋ asaŋa tutu edisim iso inua-otop edidem: koro baba owo kiet eke esinede ɔfɔŋ-ikpo midukke ke inua-otop edidem.

³Ndien ke kpukpru mme province, ke ebiet emi uyo edidem ye ewuhɔ esie esimde, akamba eseme odu ke otu mme Jew, ye utre udia, ye eyet, ye ntuaŋa; ndien ediwak owo ena ke ɔfɔŋ-ikpo ye ntɔŋ.

⁴Ekem ifin iban Esther, ye mme eunuch esie, edi editiŋ enɔ enye. Ndien ɔbɔŋ-aŋwan ɔfuhɔ eti-eti; onyuŋ ɔnɔ edisine-ŋkpɔ, ete esine Mordecai ke idem, enyuŋ esio enye ɔfɔŋ-ikpo ke idem efep; edi enye ibɔhɔ.

⁵Ndien Esther okot Hathach owo mme eunuch edidem kiet, emi enye ɔkɔdɔhɔde, ete ada enye (Esther) ke iso, ndien ɔdɔŋ enye utom ke ɔtɔ Mordecai, man ɔfiɔk se idude, ye se inamde odu.

⁶Ndien Hathach ɔwɔrɔ etiene Mordecai ke aŋwa obio, emi odude ke iso inua-otop edidem.

⁷Ndien Mordecai emen kpukpru se iketibede etiŋ ɔnɔ enye, ye ibat silver oro Haman ɔkɔdɔhɔde, ete iyedomo isin ke unim-inyene edidem ibaŋa mme Jew, man esobo mmɔ.

⁸Enye onyuŋ akaŋa ŋwed ewuhɔ oro eketaŋade ke Shushan, ete esobo mmɔ, ada ɔnɔ enye, ete owut Esther, onyuŋ asian enye, onyuŋ eteme enye, ete, Yak enye oduk ke ɔtɔ edidem, ekekpe enye ubɔk, onyuŋ ebeŋe enye, ɔnɔ oruk esiemɔ.

⁹Ndien Hathach emen ikɔ Mordecai edi editiŋ ɔnɔ Esther.

¹⁰Ndien Esther ɔdɔhɔ Hathach ikɔ, onyuŋ ɔdɔŋ enye utom ke ɔtɔ Mordecai; ete,

¹¹Ofuri ikɔt edidem, ye mbio mme province edidem efɔfiɔk ete ke owo ekededi, edide eren, onyuŋ edide ŋwan, eke odukde ke ɔtɔ edidem, ke okure esit ufɔk, eke mikotke enye, enyene ewuhɔ esie kiet, ete ewot enye, ke mibɔhɔke owo eke edidem edinyande mmɔnyɔ o-gold ɔnɔ enye, ndien enye odu uwem; edi ikokotke mi nduk ke ɔtɔ edidem, ke ofuri usen edip ye duop emi.

¹²Ndien mmɔ emen ikɔ Esther etiŋ enɔ Mordecai.

¹³Ndien Mordecai ɔdɔhɔ, ete ebɔrɔ Esther, ete, Kukere ke esit fo, ete ke afo edibɔhɔ ke ufɔk edidem akan kpukpru mme Jew.

¹⁴Koro edieke afo odopde ke ini emi, eribɔhɔ ye erinyaŋa eyeto ke ebiet efen enɔ mme Jew; edi afo ye ufɔk usɔ eyetak: ndien anie ɔfiɔk mme afo okosim itie ubɔŋ ɔnɔ oruk ini emi?

¹⁵Ndien Esther etiŋ se edibɔrɔde Mordecai, ete,

¹⁶Ka kobon kpukpru mme Jew emi edude ke Shushan, mbufo enyuŋ etre udia ebaŋa mi, ekunyuŋ edia ŋkpɔ, ekunyuŋ eŋwɔŋ ke usen ita, ke okoneyo, ye ke uwemeyo, ami ye nditɔ-iban mi ŋko iyetre udia kpa ntre; ndien ntem ke ndiduk ke ɔtɔ edidem, eke misaŋake ke ewuhɔ; ndien mma ŋkpa yak ŋkpa.

¹⁷Ndien Mordecai ɔnyɔŋ akanam kpukpru se Esther eketemede enye.