Read efik EXODUS 1 Bible Online

EXODUS 1 - efik bible

EXODUS 1

¹NDIEN mme mmɔ emi edi enyiŋ nditɔ Israel, emi eketienede Jacob eduk ke Egypt; kpukpru owo eduk ye ufɔk mmɔ.

²Reuben, ye Simeon, ye Levi, ye Judah,

³ye Isaachar, ye Zebulun, ye Benjamin,

⁴ye Dan, ye Naphtali, ye Gad, ye Asher.

⁵Ndien kpukpru mme ukpɔŋ emi eketode Jacob ke ŋkpatian-ukot edi ukpɔŋ ata ye udop: ndien Joseph odu ke Egypt.

⁶Ekem Joseph akpa, ye kpukpru nditɔ-ete esie, ye ofuri emana oro.

⁷Ndien nditɔ Israel etɔt, enyuŋ esiaha, enyuŋ ewak, enyuŋ esɔŋ eti-eti; ndien mmɔ eyɔhɔ ke isɔŋ oro.

⁸Ekem obufa edidem emi mifiɔkke Joseph, adaha ada ke Egypt.

⁹Ndien enye ɔdɔhɔ ikɔt esiemɔ, ete, Sese, obio nditɔ Israel ke ewak enyuŋ esɔŋɔ ekan nnyin.

¹⁰Mbufo edi ndien, nnyin ikari ŋkari ye mmɔ; mbak mmɔ ediwak, ndien ama ekem, ke ekɔŋ editibede, mmɔ edinyuŋ edian idem ye mme asua nnyin, enyuŋ eŋwana ekɔŋ ye nnyin, enyuŋ edaŋa ke isɔŋ emi.

¹¹Ndien mmɔ edori mme etubom mbon utom, ete ese mmɔ, man efik mmɔ ke mbiomo mmɔ. Ndien mmɔ ebɔp obio unim-ŋkpɔ enɔ Pharaoh, kpa Pithom ye Raamses.

¹²Edi adaŋa nte efikde mmɔ, ntre ke mmɔ edediɔŋ ewak, enyuŋ etɔt. Ntem ke nditɔ Israel enyene mmɔ ndik.

¹³Ndien nditɔ Egypt esin nditɔ Israel enam utom ke ufik:

¹⁴enyuŋ enam uwem odoro mmɔ ke ɔkpɔsoŋ ufin, ke mbat, ye ke brick, ye ke kpukpru utom iŋwaŋ, ke ofuri utom mmɔ eke esinde mmɔ enam ke ufik.

¹⁵Ndien edidem Egypt ɔdɔhɔ mme omum iban Hebrew uman; emi enyiŋ kiet ekerede Shiphrah, enyiŋ enye eken onyuŋ ekere Puah:

¹⁶ndien enye ɔdɔdɔ, ete, Ke ini mbufo emumde iban Hebrew uman, enyuŋ esede ŋkpɔ uyere mmɔŋ, ama edi eyen-eren, mbufo ewot enye; edi ama edi eyen-aŋwan, ndien enye edidu uwem.

¹⁷Edi mme omum uman oro ebak Abasi, ndien inamke nte edidem Egypt ɔkɔdɔhɔde mmɔ, edi enim nditɔ-iren uwem.

¹⁸Ndien edidem Egypt okot mme emum uman oro edi, onyuŋ ɔdɔhɔ mmɔ, ete, Nsinam mbufo enamde ŋkpɔ emi, ke enim nditɔ-iren uwem?

¹⁹Ndien mme omum uman edɔhɔ Pharaoh, ete, Koro iban mme Hebrew mibietke iban Egypt: koro mmɔ edide kpraŋ-kpraŋ, enyuŋ eman eyen ke mme omum uman mikaisimke mmɔ kaŋa.

²⁰Mmɔdo Abasi ɔfɔnde ido ye mme omum uman: ndien mbon oro ewak, enyuŋ esɔŋ eti-eti.

²¹Edikem, koro mme omum uman oro ebakde Abasi, enye anam ufɔk ɔnɔ mmɔ.

²²Ndien Pharaoh owuk kpukpru ikɔt esiemɔ, ete, Mbufo emen kpukpru nditɔ-iren eke emanade, eduɔŋɔ ke akpa, edi enim kpukpru nditɔ-iban ke uwem.