Read efik EXODUS 10 Bible Online

EXODUS 10 - efik bible

EXODUS 10

¹EKEM Jehovah ɔdɔhɔ Moses, ete, Ka ke ebiet Pharaoh: Koro edi ami nsɔŋ enye esit, ye esit ikɔt esie ŋko, man nnam mme idiɔŋɔ mi emi ke otu mmɔ:

²man afo onyuŋ emen se nnamde ke Egypt, ye mme utibe ŋkpɔ emi nnamde ke otu mmɔ, etiŋ ke utɔn eyen fo, ye eke eyeyen fo; ndien mbufo eyefiɔk ete ke ami ndi Jehovah.

³Ndien Moses ye Aaron eka ke ebiet Pharaoh, ekedɔhɔ enye, ete, ntem ke Jehovah Abasi mme Hebrew ɔdɔhɔ ete, adaŋa didie ke afo edisin ndisuk idem ke iso mi? yak ikɔt mi eka, man ekenam ŋkpɔ enɔ mi.

⁴Koro edieke afo munyimeke ndiyak ikɔt mi eka, sese, mkpɔŋ nyeda ŋkukuŋkpɔyɔriyɔ nduk adaŋa fo:

⁵ndien mmɔ eyefuk iso isɔŋ, nte owo midikemeke ndikut isɔŋ: mmɔ eyenyuŋ eta se ikosukde, emi ɔkɔbɔhɔde, emi edim-itiat ɔkɔkpɔŋde ɔnɔ mbufo, eyenyuŋ eta kpukpru eto eke etibede enɔ mbufo ke iŋwaŋ.

⁶Eyenyuŋ eyɔhɔ ke ufɔk fo, ye ke mme ufɔk kpukpru ikɔt fo, ye ke mme ufɔk nditɔ Egypt akpaimɔ; eke mme ete mbufo, ye mme ete ete mbufo ekenam mikwe, toto ke ini mmɔ edude ke isɔŋ, tutu osim mfin emi. Ndien enye akabare ɔkpɔŋ Pharaoh ɔwɔrɔ.

⁷Ndien ikɔt Pharaoh edɔhɔ enye ete, Adaŋa didie ke owo emi edidi afia nnyin? Yak mbio oro eka, man ekenam ŋkpɔ enɔ Jehovah Abasi mmɔ: nte afo ufiɔkke kaŋa ete Egypt amatak?

⁸Ndien ekeda Moses ye Aaron efiak esɔk Pharaoh: ndien enye ete mmɔ, Mbufo eka ekenam ŋkpɔ enɔ Jehovah Abasi mbufo: edi mme anie mme anie edika?

⁹Ndien Moses ɔdɔhɔ ete, Iyeka ye nditɔɔwɔŋ nnyin, ye ŋkani iren nnyin, iyeka ye nditɔ-iren nnyin, ye nditɔ-iban nnyin, iyeka ye ŋkpri ufene nnyin, ye enaŋ nnyin; koro nnyin ikamade usɔrɔ Jehovah.

¹⁰Ndien enye ɔdɔhɔ mmɔ ete, Yak edi ntre; yak Jehovah odu ye mbufo, kpasuk nte emi ndiyakde mbufo ye nditɔwɔŋ mbufo eka: mbufo ese nte idiɔk-ŋkpɔ anade mbufo ke iso.

¹¹Ih ih: mbufo irenowo eka ekenam ŋkpɔ enɔ Jehovah koro edide emi ke mbufo ekeyom. Ndien ebin mmɔ ke iso Pharaoh efep.

¹²Ekem Jehovah ɔdɔhɔ Moses ete, Nyan ubɔk fo ke isɔŋ Egypt se ŋkukuŋkpɔyɔriyɔ, man mmɔ eto edɔk ke isɔŋ Egypt, enyuŋ eta kpukpru mbiet isɔŋ, kpukpru se edim-itiat ɔkɔkpɔŋde.

¹³Ndien Moses anyan esaŋ esie ke isɔŋ Egypt, ndien Jehovah anam ofim ikɔrabak abara ke isɔŋ ke ofuri uwemeyo oro, ye ke ofuri okoneyo; ndien ke adaŋemi eyo esierede, ikɔrabak ada ŋkukuŋkpɔyɔriyɔ edi.

¹⁴Ndien ŋkukuŋkpɔyɔriyɔ eto edɔk ke ofuri isɔŋ Egypt, editie ke kpukpru mme adaŋa Egypt, ediɔk eti-eti; oruk ŋkukuŋkpɔyɔriyɔ nte mme mmɔ emi akanam iduhe, oruk oro idinyuŋ iduhe aba.

¹⁵Ndien mmɔ efuk ofuri iso isɔŋ, isɔŋ onyuŋ okim; mmɔ enyuŋ eta kpukpru mbiet iŋwaŋ, ye kpukpru mfri eto eke edim-itiat ɔkɔsuhɔde; ndien mmɔ isuhɔke baba se idide awawa ke eto, ye ke mbiet inwaŋ, ke ofuri isɔŋ Egypt.

¹⁶Ndien Pharaoh awara okot Moses ye Aaron edi; ndien enye ɔdɔhɔ ete, Mmedue Jehovah Abasi mbufo, ye mbufo ŋko.

¹⁷Mbɔk, ndien, dahado ke ndudue mi ini emi ikpɔŋ; mbufo enyuŋ ekpe Jehovah Abasi mbufo ubɔk, ete Enye anam suk mkpa emi ikpɔŋ ɔkpɔŋ mi.

¹⁸Ndien enye ɔwɔrɔ ɔkpɔŋ Pharaoh, ekekpe Jehovah ubɔk.

¹⁹Ndien Jehovah anam ata ɔkpɔsɔŋ ofim oto ke edem usop utin ɔwɔŋɔre, emen ŋkukuŋkppɔyɔriyɔ ɔduɔk ke Ididuot Inyaŋ; baba ŋkukuŋkpɔyɔriyɔ kiet isuhɔke ke ofuri adaŋa Egypt.

²⁰Ndien Jehovah ɔsɔŋ Pharaoh esit, ndien enye iyakke nditɔ Israel eka.

²¹Ndien Jehovah ɔdɔhɔ Moses ete, Menere ubɔk fo ke enyɔŋ, ndien ekim eyefuk isɔŋ Egypt, ndien owo eyekeme ndifiɔŋɔ ubɔk ke ekim.

²²Ndien Moses emenere ubɔk esie ke enyɔŋ; ndien ɔkpɔsɔŋ ekim ofuk ofuri isɔŋ Egypt ke usen ita:

²³kiet ikwe kiet, owo inyuŋ idahake ke ebiet esie ke ofuri usen ita: edi kpukpru nditɔ Israel ekut uŋwana ke iduŋ mmɔ.

²⁴Ndien Pharaoh okot Moses edi, onyuŋ ɔdɔhɔ ete, Mbufo eka ekenam ŋkpɔ enɔ Jehovah; edi eyak ŋkpri ufene mbufo ye enaŋ mbufo esuhɔ: nditɔwɔŋ mbufo enyuŋ etiene mbufo eka.

²⁵Ndien Moses ɔdɔhɔ ete, Afo ekpesin nnyin uwa ye edifɔp uwa ke ubɔk ŋko, man nnyin iwa uwa inɔ Jehovah Abasi nnyin.

²⁶Ufene nnyin nde eyeka ye nnyin; baba ikpat kiet idisuhɔke ke edem; koro mmɔ ke nnyin idisio inam ŋkpɔ inɔ Jehovah Abasi nnyin; nnyin inyuŋ ifiɔkke se ididade inam ŋkpɔ inɔ Jehovah tutu isim ko.

²⁷Edi Jehovah ɔsɔŋ Pharaoh esit, ndien enye inyimeke ndiyak mmɔ eka.

²⁸Ndien Pharaoh ɔdɔhɔ enye ete, Daha mi ke usuŋ, kpeme idem fo, kutɔŋɔ ntak ukut mi iso: koro ke usen afo edikutde mi iso, afo eyekpa.

²⁹Ndien Moses ete, Ekem ke se afo ɔdɔhɔde; ndikwe aba fi iso.