Read efik EXODUS 12 Bible Online

EXODUS 12 - efik bible

EXODUS 12

¹NDIEN Jehovah ɔdɔhɔ Moses ye Aaron ke isɔŋ Egypt, ete,

²Ɔfiɔŋ emi edidi eritɔŋɔ ɔfiɔŋ mbufo: enye edidi akpa ɔfiɔŋ isua mbufo.

³Mbufo edɔhɔ ofuri esop Israel, ete, Ke ɔyɔhɔ usen ɔfiɔŋ emi duop, yak kpukpru owo kiet kiet eda eyen ufene ke idem mmɔ enɔ ufɔk ete, eyen ufene kiet ke ufɔk kiet

⁴Ndien edieke ufɔk ekpride akan nte adade eyen ufene, yak enye ye mbɔhiduŋ esie eke ekperede ufɔk esie, eda enye nte asaŋade ke ibat ukpɔŋ mmɔ; kpukpru mbufo kiet kiet ebat enɔ eyen ufene nte mmɔ editade.

⁵Yak eyen ufene mbufo ɔfɔn ama, edi ayara, osim isua kiet: mbufo esioŋo enye edide ke erɔŋ, onyuŋ edide ke ebot.

⁶Ndien mbufo enim enye tutu osim ke ɔyɔhɔ usen ɔfiɔŋ emi duopenaŋ: ndien yak ofuri otu mbon-esop Israel ewot enye ke mbubreyo.

⁷Ndien yak mmɔ eda ubak iyip esie, esime ke obubɔk usuŋ edem mbiba, ye ke ibiɔŋ ndori enyin-usuŋ mme ufɔk eke mmɔ editade enye ke esit.

⁸Ndien yak mmɔ eta unam oro ke okoneyo oro, edifɔp ke ikaŋ, ye uyo eke leaven miduhe; eta enye ekɔrɔ ke ndot-ndot ikɔŋ.

⁹Ekuta enye ndisi, ekunyuŋ etem ke mmɔŋ, edi efɔp ke ikaŋ; ibuot esie, ye ukot esie, ye nsia esie.

¹⁰Ndien mbufo ekuyak ndomo esisit adaŋ esiere usen; edi eda eke ɔsuhɔre esiere usen, efɔp ke ikaŋ ema.

¹¹Ndien ntem ke mbufo edita enye; ebɔbɔ mbɔbɔ mbufo ke isin, esine ikpa-ukot mbufo ke ukot, ye esaŋ ke ubɔk mbufo: ndien mbufo eta enye ke nnyekidem; enye edi passover Jehovah.

¹²Koro nyesaŋa ke ufɔt isɔŋ Egypt ke okoneyo emi mbe, nyenyuŋ ŋwot kpukpru akpan ke isɔŋ Egypt, ntɔŋɔ ye owo nsim ufene; nnyuŋ mmia kpukpru mme abasi Egypt ufen; ami ndi Jehovah.

¹³Ndien iyip oro eyedi idiɔŋɔ mbufo ke mme ufɔk eke mbufo edude do: ndien nyekut iyip oro, nnyuŋ mbe mbufo, ufen idinyuŋ isimke mbufo, nte nsobo, ke ini ami ndibiatde isɔŋ Egypt.

¹⁴Ndien usen emi eyedi usen eke mbufo etide; mbufo enyuŋ enim enye enɔ Jehovah ke usɔrɔ, ke kpukpru emana mbufo; enim enye ke nsinsi ewuhɔ.

¹⁵Mbufo edita uyo eke leaven miduhe ke usen itiaba; esioŋo leaven efep ke ufɔk mbufo ke akpa usen: koro owo ekededi amadia se leaven odude ke esit, toto ke akpa usen tutu osim ke ɔyɔhɔ usen itiaba, eyesibe ukpɔŋ oro efep ke Israel.

¹⁶Ndien ke akpa usen mbufo edinim edisana esop, enyuŋ enim edisana esop ke ɔyɔhɔ usen itiaba; mbufo ekunam baba utom ke esit, ke mibɔhɔke se kpukpru owo edidiade, oro ikpɔŋ ke mbufo edinam.

¹⁷Mbufo edinyuŋ enim usɔrɔ uyo eke leaven miduhe: koro ke idem usen emi ke ami nsio mme udim mbufo ke isɔŋ Egypt mfep: mbufo enim ndien usen emi ke ofuri emana mbufo ke nsinsi ewuhɔ.

¹⁸Ke akpa ɔfiɔŋ, ke ɔyɔhɔ usen ɔfiɔŋ duopenaŋ, ke mbubreyo, ke mbufo edita uyo eke leaven miduhe, tutu osim ɔyɔhɔ usen ɔfiɔŋ edip ye kiet, ke mbubreyo.

¹⁹Yak ekukut baba leaven ke ufɔk mbufo ke ofuri usen itiaba: koro owo ekededi ama adia se leaven odude ke esit, eyesibe ukpɔŋ oro efep ke esop nditɔ Israel,

²⁰edide esen owo, onyuŋ edide amana do ke isɔŋ. Mbufo ekuta baba uyo eke leaven esinede; eta uyo eke leaven miduhe, ke kpukpru ebiet iduŋ mbufo.

²¹Ekem Moses okot kpukpru mbiowo Israel edi, onyuŋ ɔdɔhɔ mmɔ, ete, Mbufo esioŋo eyen ufene nte mme ubon mbufo edide, eda ke idem mbufo, enyuŋ ewot passover emi.

²²Enyuŋ eda ebek hyssop, edebi ke iyip eke odude ke usan, eda iyip eke odude ke usan esime ke ibiɔŋ ndori enyin-usuŋ, ye ke enyin-usuŋ ufɔk mbufo, tutu eyo esiere.

²³Ndien Jehovah eyesaŋa ebe ndiwot nditɔ Egypt; ndien ke ini enye edikutde iyip ke ibiɔŋ ndori, ye ke obubɔk usuŋ mbiba, Jehovah eyebe enyin-usuŋ oro, idinyuŋ iyakke nsobo oduk ke ufɔk mbufo owot.

²⁴Mbufo enyuŋ enim ŋkpɔ emi ke ewuhɔ fo, ye eke nditɔ fo ke nsinsi.

²⁵Ndien ama ekem, ke adaŋemi mbufo edidukde ke isɔŋ emi Jehovah edinɔde mbufo, kpa nte emi ɔkɔdɔhɔde, mbufo ekpeme ndinam utom emi.

²⁶Ndien ama ekem, ke ini nditɔ mbufo edibupde mbufo, ete, Mbufo enam utom emi ebaŋa nso?

²⁷Ndien mbufo edɔhɔ, ete, Enye edi uwa passover Jehovah, emi ekebede mme ufɔk nditɔ Israel ke Egypt, ke ini enye okowotde nditɔ Egypt, onyuŋ anyaŋade mme ufɔk nnyin.

²⁸Ndien kpukpru owo etuk ibuot, enyuŋ enuhɔ. Ndien nditɔ Israel enyɔŋ, ekenam kpa nte Jehovah eketemede Moses ye Aaron: ntem ke mmɔ enam.

²⁹Edikem ke ufɔt okoneyo, Jehovah owot kpukpru akpan ke isɔŋ Egypt, ɔtɔŋɔde ke akpan Pharaoh, emi etiede ke ebekpo esie, tutu osim akpan ofin eke odude ke obube; ye kpukpru akpa nditɔ ufene.

³⁰Ndien Pharaoh adaha ke enyɔŋ ke okoneyo, enye ye ikɔt esie kpukpru; ye kpukpru nditɔ Egypt; akwa ntuaŋa onyuŋ odu ke Egypt; koro baba ufɔk kiet eke owo mikpaha do, miduhe.

³¹Ndien enye okot Moses ye Aaron ke okoneyo edi, onyuŋ ɔdɔhɔ, ete, Mbufo ye nditɔ Israel edaha ke enyɔŋ, ewɔŋɔ ke otu mbio-obio mi; enyuŋ eka ekenam ŋkpɔ Jehovah, nte emi mbufo ekedɔhɔde.

³²Enyuŋ eda ŋkpri ufene mbufo ye enaŋ mbufo ŋko, nte emi mbufo ekedɔhɔde, eka; enyuŋ ediɔŋ mi ŋko.

³³Ndien nditɔ Egypt ekpak mbon oro, ete, ibin mmɔ ewɔŋɔ usɔp-usɔp ke isɔŋ koro mmɔ edɔhɔde ete, Nnyin kpukpru idi mme akpaŋa mkpa.

³⁴Ndien mbio oro emen ebok ndisi uyo mmɔ ke mika-ifutke kaŋa, eda edisine-ŋkpɔ mmɔ ebɔp ke ŋkpɔ-unuak-uyo mmɔ ebiom ke afara mmɔ

³⁵Nditɔ Israel enyuŋ enam ke uyo Moses; mmɔ enyuŋ ebeŋe nditɔ Egypt ŋkpɔ silver, ye ŋkpɔ gold, ye edisine-ŋkpɔ.

³⁶Ndien Jehovah esin nditɔ Egypt enen iso ye mmɔ, enyuŋ enɔ mmɔ ke ima. Ntre ke mmɔ ebume ŋkpɔ nditɔ Egypt.

³⁷Ekem nditɔ Israel edaŋa ke Rameses eka Succoth, esim tɔsin irenowo ke itie ikie itiokiet, emi esaŋade ke ikpat, ibatke nditɔwɔŋ.

³⁸Ndien ŋko mbuaha udim owo esaŋa ye mmɔ edɔk; ye ŋkpri ufene, ye enaŋ, kpa ata ediwak ufene ŋkpɔ eti-eti.

³⁹Mmɔ enyuŋ eda ndisi uyo emi mmɔ ekedade ke Egypt ewɔŋɔ, enam uyo eke leaven miduhe, koro mikofutke; koro ekebinde mmɔ efep ke Egypt, mmɔ mikenyuŋ ikwe nte ebigide; ikenyuŋ itemke udia inɔ idem mmɔ.

⁴⁰Ndien ediduŋ emi nditɔ Israel ekeduŋde ke Egypt edi isua ikie inaŋ ye edip ye udop.

⁴¹Edikem ke akpatre isua emi ɔyɔhɔde ke ikie inaŋ ye edip ye udop, ke idem usen oro, kpukpru mme udim Jehovah eto ke isɔŋ Egypt ewɔŋɔ.

⁴²Enye edi okoneyo eke ekpenimde enɔ Jehovah, koro enye adade mmɔ ke Egypt ɔwɔrɔ; emi edi okoneyo emi kpukpru nditɔ Israel ekpekpemede ke emana mmɔ.

⁴³Ndien Jehovah ɔdɔhɔ Moses ye Aaron, ete, Emi edi ewuhɔ passover: Esen owo ndomo kiet okudia ke esit:

⁴⁴edi kpukpru ifin eke edepde ke inyene, edieke afo onimde mmɔ mbobi, eyedia ndien ke esit.

⁴⁵Owo idut, ye owo eke ekpede enye utom, ekudia ke esit.

⁴⁶Yak edia enye ke ufɔk kiet; ekumen unam oro baba esisit esio ke ufɔk; ekunyuŋ ebuŋ baba ɔkpɔ esie kiet.

⁴⁷Yak ofuri esop Israel enam enye.

⁴⁸Ndien ŋko adaŋemi esen owo oduŋde ye afo, onyuŋ oyomde ndinam passover nnɔ Jehovah, yak kpukpru irenowo esie ena mbobi, ndien yak enye asaŋa ekpere anam enye; ndien enye eyetie nte amana do ke isɔŋ: edi edut baba kiet okudia ke esit.

⁴⁹Yak enim ido kiet, ekpedi amana do, okponyuŋ edi esen owo eke oduŋde ke otu mbufo.

⁵⁰Ntem ke kpukpru nditɔ Israel enam; nte emi Jehovah eketemede Moses ye Aaron, kpa ntre ke mmɔ enam.

⁵¹Ekem ke idem usen oro ke Jehovah osioŋo nditɔ Israel ke mme udim mmɔ efep ke isɔŋ Egypt.