Read efik EXODUS 13 Bible Online

EXODUS 13 - efik bible

EXODUS 13

¹NDIEN Jehovah ɔdɔhɔ Moses, ete, Dianare kpukpru akpan nim nɔ mi:

²se isirerede kpukpru itie-eyen ke otu nditɔ Israel, ke owo ye ke ufene edidi okim.

³Ndien Moses ɔdɔhɔ kpukpru owo, ete, Mbufo eti usen emi mbufo ewɔŋɔde ke Egypt, ke ufɔk ufin; koro Jehovah adade ɔkpɔsɔŋ ubɔk osio mbufo ke ebiet emi: mbufo ekudia baba se leaven odude ke esit.

⁴Mfin emi ke ɔfiɔŋ Abib ke mbufo ewɔŋɔ.

⁵Ndien ama ekem ke ini Jehovah edidade mbufo oduk ke isɔŋ mme Canaanite, ye mme Hittite, ye mme Amorite, ye mme Hivite, ye mme Jebusite, emi enye ɔkɔŋwɔŋɔde ɔnɔ mme usɔ, ete iyenɔ mbufo, isɔŋ emi ɔfiɔrɔde mmɔŋ-eba ye aran-ɔkwɔk, ndien mbufo enam utom emi ke ɔfiɔŋ emi.

⁶Mbufo edita uyo eke leaven miduhe, ke ofuri usen itiaba, ndien ke ɔyɔhɔ usen itiaba, eyedi usɔrɔ Jehovah.

⁷Edita uyo eke leaven miduhe ke ofuri usen itiaba emi; ekuyak ekut se leaven esinede ke ubɔk mbufo: ekunyuŋ eyak ekut leaven ke ubɔk mbufo, ye ke kpukpru mme adaŋa mbufo.

⁸Nyuŋ tiŋ nɔ eyen fo ke usen oro, ete, Ema enam emi ebaŋa se Jehovah akanamde ye ami, ke ini ŋwɔrɔde ke Egypt.

⁹Ndien enye eyedu fi ke ubɔk nte idiɔŋɔ fo, eyenyuŋ odu fi ke ufɔt enyin, nte ŋkpɔ eke edade eti, man mbet Jehovah okpodu fi ke inua: koro Jehovah adade ɔkpɔsɔŋ ubɔk osio fi ke Egypt.

¹⁰Nim ndien ewuhɔ emi ke ekem ini esie, kpukpru isua.

¹¹Ndien ama ekem, ke adaŋemi Jehovah edidade fi oduk ke isɔŋ mme Canaanite, nte emi enye ɔkɔŋwɔŋɔde ɔnɔ fi ye mme usɔ,

¹²edinyuŋ adade enye ɔnɔ fi, ndien afo edidianare kpukpru se isirerede itie-eyen onim ke eke Jehovah, ye kpukpru akpa nditɔ eke efene eke afo enyenede, edimande: nyara edidi ŋkpɔ Jehovah.

¹³Afo edinyuŋ ada eyen ufene afak kpukpru akpa nditɔ ass; edi mufakke, buŋ mmɔ itɔŋ ndien: nyuŋ fak kpukpru akpan ke otu nditɔ-iren fo.

¹⁴Ndien ama ekem, adaŋemi eyen fo edibupde fi ke ini iso, ete, Emi edi nso? ndien, dɔhɔ enye, ete, Jehovah akada ɔkpɔsɔŋ ubɔk osioŋo nnyin ke Egypt, ke ufɔk ufin;

¹⁵ndien ekem ke Pharaoh mi-kenyimke ndiyak nnyin ika, Jehovah owot kpukpru akpan ke isɔŋ Egypt, ye akpan owo, ye akpan eyen ufene: mmɔdo ami ndade kpukpru nyara eke esirerede itie-eyen ŋwa nnɔ Jehovah; edi mfak kpukpru akpan nditɔ iren mi.

¹⁶Ndien enye eyedu fi ke ubɔk nte idiɔŋɔ, eyenyuŋ odu fi ke ufɔt enyin nte frontlet: koro Jehovah akadade ɔkpɔsɔŋ ubɔk osioŋo nnyin efep ke Egypt.

¹⁷Ekem adaŋemi Pharaoh akayakde mbio oro eka, Abasi idaha mmɔ usuŋ edem mme Philistine, okposuk edieke enye ekperede; koro Abasi ɔdɔhɔde, ete, Mbak mmɔ editua mkpɔfiɔk adaŋemi edikutde ekɔŋ, ndien efiak ke Egypt.

¹⁸Edi Abasi ada mbio oro akabare ke usuŋ wilderness Ididuot Inyaŋ. Ndien nditɔ Israel etim idem eto ke isɔŋ Egypt edɔk.

¹⁹Moses onyuŋ emen mme ɔkpɔ Joseph obiom: koro enye okowukde nditɔ Israel, ete, Abasi iditreke ndidi ndise mbufo; ndien mbufo emen mme ɔkpɔ mi ke ebiet emi edɔk.

²⁰Ekem mmɔ edaŋa ke Succoth, ekenam nna ke Etham, ke mben wilderness.

²¹Jehovah onyuŋ ebem mmɔ iso, ke uwemeyo ke obubit enyɔŋ ebiet adaha, ndida mmɔ usuŋ; ke okoneyo ŋko, ke ikaŋ ebiet adaha, ndiyama nnɔ mmɔ; kpaŋ mmɔ ekpesaŋa ke uwemeyo ye ke okoneyo.

²²Adaha oro ke ikpa-enyɔŋ idahake ke uwemeyo, adaha ikaŋ inyuŋ idahake ke okoneyo, ke iso mbio oro.