Read efik EXODUS 19 Bible Online

EXODUS 19 - efik bible

EXODUS 19

¹KE ɔyɔhɔ ɔfiɔŋ ita, nte nditɔ Israel ekewɔŋɔ ke Egypt, ke suk usen oro mmɔ esim wilderness Sinai.

²Ndien mmɔ edaŋa ke Rephidim eka ke wilderness Sinai, ekenam nna ke wilderness; ntem ke nditɔ Israel ena do ke iso akamba obot oro.

³Ndien Moses ɔdɔk etiene Abasi, ndien Jehovah etie ke obot okot enye edi, ete, Ntem ke afo edidɔhɔ ye ufɔk Jacob, onyuŋ etiŋ ɔnɔ nditɔ Israel, ete;

⁴Mbufo emekut se ŋkenamde Egypt, ye nte ŋkadade mba ntrukpom mmen mbufo ŋkama nnyuŋ nda mbufo ndi ke ebiet mi.

⁵Mmɔdɔ edieke mbufo miditreke ndikop uyo mi, nnyuŋ nnim ediomi mi, mbufo eyedi ndien akpan inyene mi ekan kpukpru obio: koro ofuri ererimbot edide okim.

⁶Mbufo eyenyuŋ enyene mi nte obio oku, ye nte edisana idut. Mme ikɔ emi ke afo editiŋ ɔnɔ nditɔ Israel.

⁷Ndien Moses edi edikot mbiowo obio, onyuŋ emen kpukpru ikɔ emi Jehovah eketemede enye onim ke iso mmɔ

⁸Ndien kpukpru owo ebɔ uyo kiet edɔhɔ ete, Iyenam kpukpru se Jehovah ɔdɔhɔde. Ndien Moses emen uyo mmɔ afiak eketiŋ ɔnɔ Jehovah.

⁹Ndien Jehovah ɔdɔhɔ Moses, ete, Sese ami mmɔŋ ntiene fi ke obubit enyɔŋ, man kpukpru owo ekop ke ini ndidɔhɔde ye afo, enyuŋ enim uyo fo ke akpanikɔ ke nsinsi. Moses onyuŋ emen ikɔ kpukpru owo eketiŋ ɔnɔ Jehovah.

¹⁰Ndien Jehovah ɔdɔhɔ Moses, ete, Ka ketiene kpukpru owo, nyuŋ nam mmɔ esana mfin emi ye mkpɔŋ, nam enyuŋ eyet edisine-ŋkpɔ mɔ,

¹¹mbufo enyuŋ etim idem mbufo ebeŋe okut: koro ke okut ke Jehovah edisuhɔre ke iso kpukpru owo ke obot Sinai.

¹²Nyuŋ nim adaŋa nɔ kpukpru owo kanare kuk, ete, Mbufo ekpeme idem, ekudɔk ke ɔbot emi, ekunyuŋ etuk mben esie: kpukpru se itukde obot enyene ndikpa.

¹³Ubɔk owo ndomo kiet okutuk enye (owo oro), edi ekutre nditɔŋɔ enye ke itiat, mme nditiga enye nnyu; edide unam, onyuŋ edide owo, enye okudu uwem. Ke ini mmɔ efuride ukorowo edudi, mmɔ eyekeme ndidi ke obot.

¹⁴Ndien Moses oto ke obot ɔsuhɔre etiene kpukpru owo, onyuŋ anam kpukpru mmɔ esana; ndien mmɔ enyuŋ eyet edisine-ŋkpɔ mmɔ.

¹⁵Enye onyuŋ ɔdɔhɔ mmɔ, ete, Mbufo etim idem ebeŋe okut; ekutiene ŋwan.

¹⁶Edikem ke ɔyɔhɔ usen ita, ke ini eyo esierede, uyom enyɔŋ ye obuma edu, idiɔk enyɔŋ onyuŋ ofuk obot, uyom ukorowo onyuŋ ɔsɔŋ eti-eti; ndien kpukpru owo eke edude ke nna enyek idem.

¹⁷Ndien Moses ada kpukpru owo ɔwɔrɔ ke nna ndisobo ye Abasi; ndien mmɔ etuak eda ke usuhɔre obot.

¹⁸Ndien ofuri obot Sinai edi nsuŋikaŋ-nsuŋikaŋ; oto koro Jehovah etiede ke ikaŋ ɔsuhɔre ke esit: nsuŋikaŋ esie onyuŋ ɔwɔrɔ ɔdɔk nte nsuŋikaŋ furnace, ofuri obot onyuŋ enyek eti-eti.

¹⁹Ekem ke uyo ukorowo ɔdiɔŋde ɔsɔŋ eti eti, Moses ɔdɔhɔ, ndien Abasi ada uyo ɔbɔrɔ enye.

²⁰Ekem Jehovah ɔsuhɔre ke obot Sinai, ke enyɔŋ obot; ndien Jehovah okot Moses edi ke ibuot obot; ndien Moses ɔdɔk.

²¹Ndien Jehovah ɔdɔhɔ Moses, ete, Suhɔre, kowuk kpukpru owo, mbak mmɔ edibe edi ndise Jehovah, ndien ediwak mmɔ ekpaŋa.

²²Yak mme oku ŋko emi esaŋade ekpere Jehovah, enyuŋ enam idem mmɔ esana, mbak Jehovah edibumere anam mmɔ.

²³Ndien Moses ɔdɔhɔ Jehovah, ete, Mbio oro ikwe nte edɔkde edi ke obot Sinai; koro afo okowukde nnyin, ete, Nim adaŋa nɔ obot, nyuŋ nim obot ke edisana ŋkpɔ.

²⁴Ndien Jehovah ɔdɔhɔ enye ete, Ka kɔsuhɔre; ndien dɔk di ken, afo ye Aaron ŋko: yak mme oku ye mbio oro ekube adaŋa edɔk edi ke ɔtɔ Jehovah, mbak enye edibumere anam mmɔ.

²⁵Ndien Moses ɔsuhɔre aka ke ɔtɔ mbio oro ɔkɔdɔhɔ ye mmɔ.