Read efik EXODUS 21 Bible Online

EXODUS 21 - efik bible

EXODUS 21

¹NDIEN da mme ewuhɔ emi nim ke iso mmɔ.

²Ke afo edidepde Hebrew ofin, enye edinam utom ke isua itiokiet; ndien ke ɔyɔhɔ itiaba, yak enye ɔwɔrɔ ufin ke ikpikpu.

³Edieke enye odukde ikpɔŋ, yak ɔwɔrɔ ikpɔŋ: ama edi ɔdɔ ŋwan, yak ŋwan esie onyuŋ asaŋa ye enye ɔwɔrɔ.

⁴Edieke ete esie ɔnɔde enye ŋwan, ndien ŋwan aman nditɔ-iren mme nditɔ-iban ɔnɔ enye; ŋwan ye nditɔ esie enyene ete esie, ndien enye eyewɔrɔ ikpɔŋ.

⁵Ndien edieke ofin oro ɔdɔhɔde ke akpanikɔ ete, Mmama ete mi, ye ŋwan mi, ye nditɔ mi; nyomke ndiwɔrɔ ufin:

⁶ndien ete esie ada enye ɔsɔk mme ebierikpe; onyuŋ ada enye aka ke itim, mme obubɔk enyin-usuŋ; ndien ete esie ada utibi-ŋkpɔ otibi enye utɔŋ; ndien enye edidi ofin esie ke nsinsi.

⁷Ndien ke owo edinyamde eyen esie aŋwan ke ofin aŋwan, enye okuwɔrɔ nte ifin iren ewɔŋɔde.

⁸Edieke enye ɔdiɔkde ke enyin ete esie, eke onimde enye ɔnɔ idem esie, enye eyeyak efak enye: enye okukeme ndinyam ŋwan oro nnɔ esen idut, koro abiaŋade enye.

⁹Ndien edieke enye adade ŋwan oro ɔnɔ eyen esie, yak anam ye enye nte ete ye nditɔ-iban.

¹⁰Enye ama ada ŋwan efen ɔnɔ enye (eyen); yak enye okusuhɔre udia esie, ye edisine-ŋkpɔ esie, ye se ebe akam anamde ye ŋwan.

¹¹Ndien enye minamke ŋkpɔ ita emi inɔ ŋwan, yak ŋwan ɔwɔrɔ ndien ke ikpikpu, okunɔ inyene.

¹²Owo eke oyibide owo owot, okutre ndikpa.

¹³Ndien edieke enye minaŋa ibet, edi Abasi esin ɔduɔ enye ke ubɔk; ndien nyeda ebiet eke enye edifehede ika do nnim nnɔ fi.

¹⁴Edi owo ama ofut esit etiene mbɔhiduŋ esie, onyuŋ owot enye ke ŋkari; sio enye ke itie-uwa mi fep, man enye akpa.

¹⁵Ndien owo eke oyibide ete esie mme eka esie, okutre ndikpa.

¹⁶Ndien oyip owo, anyamde nyam, ekpenyuŋ ekut enye ke ubɔk esie, okutre ndikpa.

¹⁷Ndien owo eke osuŋide ete esie mme eka esie, okutre ndikpa.

¹⁸Ndien ke owo eŋwanade eŋwan, kiet onyuŋ ɔtɔ kiet ke itiat, mme ke ita, ndien enye mikpaha, edi ana ke bed esie;

¹⁹enye ama adaha ke enyɔŋ asaŋa ke esien ɔkɔk ke eto esie, owo oro ɔtɔde enye eyebɔhɔ ndien; yak enye ɔnɔ ŋkpɔ eridop utom esie, onyuŋ anam nte ekɔkde enye ema.

²⁰Ndien ke owo adade eto amia ofin eren esie, mme ofin aŋwan esie, ofin onyuŋ akpa enye ke ubɔk; ekutre ndisio usiene ye enye.

²¹Edi enye ama ebigi edide usen kiet, onyuŋ edide usen iba, ekusio usiene: koro enye edide inyene esie.

²²Edieke owo eŋwanade eŋwan, enyuŋ enukde ŋwan idibi, ndien idibi ɔbuŋɔ enye, edi ŋkpɔ efen minamke enye: eyesio isop nte emi ebe ŋwan ɔkɔmde ɔnɔ enye; ndien ɔnɔ ke uyo mme ebierikpe.

²³Edi idiɔk ŋkpɔ ama odoro, ndien afo edinɔ uwem ke uwem,

²⁴enyin ke enyin, edet ke edet, ubɔk

²⁵ke ubɔk, ukot ke ukot, erifɔp ke erifɔp, unan ke unan, ufen ke ufen.

²⁶Ndien edieke owo amiade ofin eren esie, mme ofin aŋwan esie otibi enyin; ete ediyak enye ɔwɔrɔ ufin abaŋa enyin esie.

²⁷Ama onyuŋ amia ofin eren esie, mme ofin aŋwan esie, osio edet: enye ediyak enye ɔwɔrɔ ufin abaŋa edet esie.

²⁸Ndien edieke ayara enaŋ adade nnuk atuak eren mme ŋwan owot: ekutre nditɔŋɔ enaŋ oro ke itiat ŋwot, edi ekuta unam esie; edi andinyene enaŋ oro inyeneke ikɔ.

²⁹Edi edieke enaŋ oro akam atuakde akpa, enyuŋ etiŋ enɔ andinyene enye, edi enye mikpemeke enaŋ, ndien enaŋ owot eren mme ŋwan; yak etɔŋɔ enaŋ ke itiat, enyuŋ ewot andinyene enye.

³⁰Ema ekɔm ufak ibuot enɔ enye; yak enye ɔnɔ ndien ufak ibuot esie,

³¹adaŋa nte ekɔmde enɔ enye. Ama edi eyen eren ke enye atuak, onyuŋ edi eyen-aŋwan ke enye atuak, yak enam enye ke ewuhɔ emi.

³²Edieke enaŋ oro atuakde ofin eren mme ofin aŋwan; yak (andinyene) ɔnɔ ete ofin shekel silver edip ye udop, yak enyuŋ etɔŋɔ enaŋ ke itiat ewot.

³³Ndien edieke owo asiakde obube, mme owo otibi ukpe, edi mifukke enye, ndien mme enaŋ mme ass eduɔ ke esit;

³⁴andinyene obube oro edisio usiene; onyuŋ ada okuk ɔnɔ andinyene unam, ndien okpo enyene enye.

³⁵Ndien edieke enaŋ owo kiet atuakde enaŋ owo efen owot; yak mmɔ enyam enaŋ uwem, enyuŋ edeme okuk esie ukem-ukem; enyuŋ ebahare okpo ukem-ukem.

³⁶Edi edieke efiɔkde ete enaŋ oro akam atatuak akpa, edi andinyene enye mikpemeke enye; yak enye okutre ndinɔ enaŋ ke enaŋ; ndien okpo enyene enye.