Read efik EXODUS 22 Bible Online

EXODUS 22 - efik bible

EXODUS 22

¹EDIEKE owo oyipde mme enaŋ, mme erɔŋ, onyuŋ owotde wot, mme onyuŋ anyamde nyam; yak enye ɔnɔ enaŋ ition ke usiene enaŋ kiet, ye erɔŋ inaŋ ke usiene erɔŋ kiet.

²Edieke ekutde inɔ nte enye obuŋde (ufɔk), enyuŋ emiade enye ewot, ikɔ iyip ibiomke owo.

³Edieke eyo esierede enye, ikɔ iyip obiom owo; (inɔ) okposio usiene ama; minyeneke ŋkpɔ, yak enyam enye ebaŋa inɔ esie.

⁴Edieke ekutde ŋkpɔ inɔ ye uwem ke ubɔk esie, edide enaŋ, onyuŋ edide ass, onyuŋ edide erɔŋ; yak enye osio usiene utim ikaba.

⁵Edieke owo esinde ete eta iŋwaŋ mme iŋwaŋ vine, onyuŋ ebin ufene esie esin, aka akata ke iŋwaŋ owo efen; yak enye ada ŋkpɔ eke edide ata eti ke iŋwaŋ esie, ye ke iŋwaŋ vine esie ɔnɔ ke usiene.

⁶Edieke ikaŋ obuberede odomo ke ikɔt, onyuŋ atade otu ebek ibokpot, mme ibokpot eke adadeda, mme iŋwaŋ; owo eke okimde ikaŋ oro osio usiene.

⁷Edieke owo ɔnɔde mbɔhiduŋ esie silver mme ŋkpoduoho, ete ekpeme, ndien eyip enye ke ufɔk owo oro; edieke ekutde inɔ oro, yak enye osio usiene utim ikaba.

⁸Edi mikwe inɔ oro, yak enyene ufɔk etiene mme ebierikpe, ediŋwɔŋɔ ete ke imɔ ikesinke ubɔk imɔ ke inyene mbɔhiduŋ imɔ.

⁹Ke kpukpru ndudue ikɔ, edide ke enaŋ, onyuŋ edide ke ass, onyuŋ edide ke erɔŋ, mme ke edisine nkpɔ, mme ke ŋkpɔ ekededi eke osopde, eke owo ɔdɔhɔde ete, Ke edi emi, yak eda ikɔ mmɔ mbiba etiene mme ebierikpe; ndien yak owo eke mme ebierikpe ebiomde, osio usiene ɔnɔ mbɔhidɔŋ utim ikaba.

¹⁰Edieke owo emende ass, mme enaŋ, mme erɔŋ, mme unam ekededi ɔnɔ mbɔhiduŋ esie ekpeme, ndien enye akpa, mme abiara, mme eda enye efep, baba owo kiet minyuŋ ikwe:

¹¹yak uŋwɔŋɔ Jehovah esine ke ufɔt mmɔ mbiba, ete ke imɔ ikotukke ubɔk imɔ ke inyene mbɔhiduŋ imɔ, ndien andiyene enye edibɔ oro, enye eken okunyuŋ osio usiene.

¹²Ndien edieke eyipde ebɔ enye, yak enye osio usiene ɔnɔ andinyene enye.

¹³Edieke ewaide enye mbak-mbak, yak enye ada enye edi nte ntiense; enye okusio usiene ke se ewaide.

¹⁴Ndien edieke owo akade ɔkɔbuɔt mbɔhiduŋ esie ŋkpɔ, ndien ŋkpɔ oro abiara, mme akpakpa, ke andinyene enye miduhe do ye enye; enye eken enyene ndisio usiene.

¹⁵Edi edieke andinyene enye odude ye enye, enye okusio usiene: edieke enye anamde utom ɔbɔ utip, enye edi utip esie.

¹⁶Ndien edieke owo atapde eyen aŋwan eke mika-inimke inɔ owo, onyuŋ okot enye, yak enye edep eyenaŋwan oro ke idem esie ɔdɔ.

¹⁷Edieke ete esinde ndida eyen nnɔ enye, yak enye abat okuk nte ekɔm-urua nditɔ-iban asaŋade.

¹⁸Kuyak ebre-idiɔŋ aŋwan odu uwem.

¹⁹Owo ekededi anade ina ye unam, okutre ndikpa.

²⁰Yak esobo owo eke awade uwa ɔnɔ ndem, ke mibɔhɔke Jehovah ikpɔŋ-ikpɔŋ.

²¹Kufik esen owo, kunyuŋ utuk enye: koro mbufo ekedide isen owo ke isɔŋ Egypt.

²²Ekufik baba ebe-akpa, ye eyen-akpa.

²³Edieke afo efikde enye, enye onyuŋ eseme ɔnɔ mi, nditreke ndikop eseme esie;

²⁴Iyaresit mi eyenyuŋ obumere, ndien nyewot mbufo ke ofut; iban mbufo eyenyuŋ edi mme ebe-akpa, nditɔ mbufo, nditɔ-akpa.

²⁵Edieke afo adade inyene ɔbuɔt ubuene ikɔt mi eke odude ye afo, kunam ye enye ke ido owo eke ɔbuɔtde adia udori, kudia enye udori.

²⁶Edieke afo ɔbɔde ɔfɔŋidem mbɔhiduŋ fo ke ubiɔŋ, yak enye nɔ enye ke utin mikaisopke:

²⁷Koro oro edide ufuhɔ-ŋkpɔ esie ikpɔŋ-ikpɔŋ; enye edi ɔfɔŋ ikpɔhidem esie: enye edina ke nso ide? Ndien ama ekem, ke ini enye esemede ɔnɔ mi, nyekop; koro ami ndide esit mbɔm.

²⁸Kusuŋi Abasi, kunyuŋ usue ebierikpe ke otu mbio-obio mbufo.

²⁹Kubigi ndinɔ akpa mfri fo, ye wine fo. Afo edinɔ mi akpan fo.

³⁰Ntre ke afo edinam ye enaŋ fo, ye erɔŋ fo: yak etie ye eka esie ke usen itiaba; ke ɔyɔhɔ usen itiaita da enye nɔ mi.

³¹Mbufo enyuŋ edi edisana ikɔt mi; ekunyuŋ eta unam eke ewaide ke ikɔt; mbufo etop enye enɔ ebua.