Read efik EXODUS 23 Bible Online

EXODUS 23 - efik bible

EXODUS 23

¹KUTIBI nsu-nsu ikɔ: kusin ubɔk fo ye idiɔk owo man edi ntiense nnama.

²Kutiene ediwak owo edem uka udiɔk; kunyuŋ ubɔrɔ ke ikpe uwaha utiene ediwak owo edem, man akwaŋa ikpe:

³kunyuŋ ukpe ikpe ubuene ke ufure.

⁴Edieke afo okutde enaŋ asua, mme ass esie oyode asaŋa, kutre ndimum enye mfiak nsɔk enye.

⁵Edieke afo okutde ass asua fo, nte enye anade ke idak mbiomo esie, tre ndikpɔŋ (ass) nnɔ enye: tiene enye tat (ass oro).

⁶Kukwaŋa ikpe ubuene fo ke ikɔ esie.

⁷Kubuana ke nsu-nsu ikɔ, kunyuŋ uwot owo eke miduehe isop, ye edinen owo: koro mmendiyakke ikpe etebe idiɔk owo.

⁸Kunyuŋ ubɔ enɔ: koro enɔ otibide mme okut-usuŋ enyin, onyuŋ ɔyurɔde ikɔ ndinen owo.

⁹Kunyuŋ ufik esen owo koro mbufo emefiɔk esit esen owo: koro mbufo ekedide isen ke isɔŋ Egypt.

¹⁰Ndien tɔ iŋwaŋ fo ke ofuri isua itiokiet, nyuŋ taŋ mbuŋwum esie:

¹¹edi ke ɔyɔhɔ isua itiaba yak enye ɔduɔk odudu, onyuŋ ana suŋ; kpaŋ mme ubuene obio mbufo ekpedia: ndien yak mme unam ikɔt eta se mmɔ esuhɔde. Nam kpa ntre ye iŋwaŋ vine fo, ye iŋwaŋ olive fo.

¹²Nam utom fo ke ofuri usen itiokiet, ndien ke ɔyɔhɔ itiaba dop; man enaŋ fo ye ass fo etie suŋ, man eyen ofin aŋwan fo ye esen owo enyuŋ eduɔk odudu.

¹³Mbufo enyuŋ ekpeme idem mbufo ke kpukpru se ndɔhɔde mbufo: ekunyuŋ ebaŋa enyiŋ Abasi efen: kuyak ekop enye ke inua fo.

¹⁴Nim usɔrɔ nɔ mi utim ikata ke isua.

¹⁵Nim usorɔ uyo eke leaven miduhe: ta uyo eke leaven miduhe ke usen itiaba, kpa nte emi ŋkowukde fi, ke ini emi odoride, ke ɔfiɔŋ Abib: koro ke esit ke afo ɔkɔwɔrɔ ke Egypt; ndien owo baba kiet okuwut mi idem ubɔk-ubɔk:

¹⁶ye usɔrɔ ukpeŋe ibokpot, akpan mbuŋwum utom fo, eke afo editɔde ke iŋwaŋ: ye usɔrɔ ubiom mbuŋwum ke utit isua, adaŋemi afo ataŋde utom fo ke iŋwaŋ ama.

¹⁷Yak kpukpru irenowo fo ewut Ɔbɔŋ Jehovah idem mmɔ utim ikata ke isua.

¹⁸Kuwa iyip uwa mi udian ke uyo eke leaven odude; kunyuŋ uyak ikpɔŋ unam usɔrɔ mi adaŋ esiere usen.

¹⁹Da akpa mbem-iso akpan mbuŋwum iŋwaŋ fo sɔk ke ufɔk Jehovah Abasi fo. Kutem eyen ebot ke mmɔŋ-eba eka esie.

²⁰Sese, ami mmɔŋ ndɔŋ angel ebem fi iso, nte ekpeme fi ke usuŋ, onyuŋ ada fi aka ke ebiet emi ŋkonimde.

²¹Kpeme idem fo bak enye, nyuŋ kop uyo esie, kuyat enye esit: koro enye midifenke mme idiɔk ido mbufo: koro enyiŋ mi odude enye ke idem.

²²Koro afo ama otim okop uyo esie, onyuŋ anam kpukpru se ndɔhɔde; ndien nyedi asua mme asua fo, nyenyuŋ ntɔhɔ utɔk ye mmɔ eke etɔhɔde ye afo.

²³Koro angel mi eyebem fi iso, eyenyuŋ ada fi aka ebiet mme Amorite, ye mme Hittite, ye mme Perizzite, ye mme Canaanite, ye mme Hivite, ye mme Jebusite;

²⁴nyenyuŋ nsobo mmɔ. Kunuhɔ unɔ abasi mmɔ, kunyuŋ unam ŋkpɔ mmɔ, kunyuŋ unam nte mmɔ enamde; edi tim sobo mmɔ fap-fap, nyuŋ bom mme adaha-itiat mmɔ mbak-mbak.

²⁵Mbufo enyuŋ enam ŋkpɔ Jehovah Abasi mbufo, ndien enye eyediɔŋ udia mbufo, ye mmɔŋ mbufo: ndien nyesioŋo udɔŋɔ ke otu mbufo mfep.

²⁶Ndien aman ukeŋ, ye ada ididuhe ke isɔŋ fo: nyenyuŋ nnam ibat usen fo ɔyɔhɔ.

²⁷Nyedɔŋ uteŋe mi ebem fi iso, nnyuŋ ntimere kpukpru owo emi afo edikade ebiet mmɔ; nnyuŋ nnam kpukpru mme asua fo ekpa edem enɔ fi.

²⁸Nyenyuŋ ndɔŋ atat ebem fi iso, man ebin mme Hivite, ye mme Canaanite, ye mme Hittite ke iso fo efep.

²⁹Ndibinke mmɔ mfep ke iso fo ke isua kiet; mbak isɔŋ edikabare ndon, mme mme unam ikɔt edinyuŋ ewak ekan fi.

³⁰Nyebin mmɔ nsit-nsit ke iso fo mfep, tutu afo editɔt, onyuŋ ada isɔŋ oro enyene

³¹Nyenyuŋ nnim mme adaŋa fo, ɔtɔŋɔde ke Ididuot Inyaŋ tutu atuak ke Inyaŋ mme Philistine, onyuŋ ɔtɔŋɔde ke wilderness tutu osim ke Akpa: koro ndidade mme andiduŋ isɔŋ oro nsin fi ke ubɔk; ndien afo eyebin mmɔ ke iso fo efep.

³²Kunam ediomi ye mmɔ, kunyuŋ unam ye mme abasi mmɔ. Kuyak mmɔ eduŋ ke isɔŋ fo, mbak mmɔ edisin fi edue mi:

³³afo ama anam ŋkpɔ mme abasi mmɔ, iditreke ndidi afia eke omumde fi.