Read efik EXODUS 27 Bible Online

EXODUS 27 - efik bible

EXODUS 27

¹NDIEN da eto shittim nam itie-uwa, uniɔŋ esie, ibio idomo-okuk ition, ye ubom esie, ibio idomo-okuk ition; uniɔŋ itie-uwa ye ubom esie edide ukem-ukem: ndien idaha esie edidi ibio idomo-okuk ita.

²Nyuŋ nam nduk esie sin inuk esie mbinaŋ, nduk esie esaŋa idem kiet ye enye: nyuŋ da okpoho fuk enye.

³Nyuŋ nam eso usin-ntɔŋ esie, ye mme uwobi ntɔŋ esie, ye mme bason esie, ye mme fork esie, ye uda-ikaŋ esie; nam kpukpru ŋkpɔ utom esie ke okpoho.

⁴Nyuŋ nam grating nɔ enye nte edidɔk iyire okpoho; nyuŋ da okpoho nam mkpanuen inaŋ, sin ke iyire oro ke inuk esie mbinaŋ.

⁵Ndien sin enye ke mben itie-uwa ke idak-idak, man iyire oro osim ufɔt itie-uwa.

⁶Ndien nam esaŋ itie-uwa, esaŋ eto shittim, nyuŋ fuk mmɔ ke okpoho.

⁷Ndien esaŋ oro edisine ke mkpanuen oro, esaŋ edinyuŋ edu itie-uwa ke ŋkaŋ mbiba, ke ini ebiomde enye.

⁸Da obukpɔk nam enye nte ekebe: nte emi ewutde fi ke obot, kpa ntre ke edinam enye.

⁹Ndien ŋko nam okure ebiet-iduŋ: ke eke ŋkaŋ edem usuk, nam ikpehe okure ke eti edifiak linen, ɔniɔŋ ibio idomo-okuk ikie ke ŋkaŋ kiet oro:

¹⁰ye mme obukpɔk esie edip, ye socket okpoho mmɔ edip; nam ntok obubɔk oro ye esaŋ mmɔ ke silver.

¹¹Kpa ntre ŋko ke eke uniɔŋ ŋkaŋ edem edere, ikpehe ɔniɔŋ ibio idomo-okuk ikie, ye mme obubɔk esie edip, ye socket okpoho mmɔ edip, nam ntok obubɔk oro ye esaŋ mmɔ ke silver.

¹²Ndien ŋko ke ubom okure, ke ŋkaŋ edem usop-utin, ikpehe ibio idomo-okuk aba ye duop: obubɔk mmɔ duop ye socket mmɔ duop.

¹³Ndien ubom okure ke ŋkaŋ edem usiaha-utin, edidi ibio idomo-okuk aba ye duop.

¹⁴Ikpehe ke ŋkaŋ enyin-usuŋ kiet, edidi ibio idomo-okuk efut; obubɔk mmɔ ita, ye socket mmɔ ita.

¹⁵Ndien ke ŋkaŋ eken ŋko edidi ikpehe ibio idomo-okuk efut; obubɔk mmɔ ita, ye socket mmɔ ita.

¹⁶Ndien ŋko ke enyin-usuŋ okure edidi ikpehe ibio idomo okuk edip (eke enamde) ke awawa, ye purple, ye ididuot, ye eti edifiak linen, ubɔk-usɔ ɔdɔk-ɔfɔŋ: obubɔk mmɔ inaŋ, ye socket mmɔ inaŋ.

¹⁷Kpukpru mme obubɔk okure ekanare ekuk, esobo ke esaŋ silver; (nam) ntok mmɔ ke silver, ye socket mmɔ ke okpoho.

¹⁸Uniɔŋ okure oro edidi ibio idomo-okuk ikie, ye ubom, aba ye duop, aba ye duop, ye idaha, ibio idomo-okuk eti edifiak linen ition, ye socket mmɔ okpoho.

¹⁹Da okpoho nam kpukpru ŋkpɔ ebiet-iduŋ, eke edade enam ofuri utom esie, ye kpukpru ɔkpɔhɔ esie, ye kpukpru ɔkpɔhɔ okure.

²⁰Ndien teme nditɔ Israel, ete, Eda edisana aran olive eke etimde tim, esɔk fi ke eke uŋwana, man edomo utuenikaŋ kpukpru ini.

²¹Ke tent esop ke iso ukara, emi odude ke iso ŋkpɔ-ntiense, yak Aaron ye nditɔ esie ediɔŋ enye, ɔtɔŋɔde ke mbubreyo, tutu eyo esiere, ke iso Jehovah: edidi nsinsi ewuhɔ ke otu nditɔ Israel ke ofuri emana mmɔ.