Read efik EXODUS 32 Bible Online

EXODUS 32 - efik bible

EXODUS 32

¹EDIKEM adaŋemi kpukpru owo ekutde nte Moses ebigide ndito ke enyɔŋ obot nsuhɔre, mmɔ esop idem ɔtɔ kiet etiene Aaron, enyuŋ edɔhɔ enye, ete, Daha ke enyɔŋ nam abasi kiet nɔ nnyin, eke edibemde nnyin iso aka: koro ama edi Moses, owo emi akadade nnyin ke isɔŋ Egypt, ɔdɔk edi, nnyin ifiɔkke se itibede ye enye.

²Ndien Aaron ɔdɔhɔ mmɔ ete, Mbufo esioŋo mkpanuen o-gold emi edude ke utɔŋ iban mbufo, ye ke eke nditɔ-iren mbufo, ye ke eke nditɔ-iban mbufo, eda esɔk mi.

³Ndien kpukpru owo esioŋo mkpanuen gold eke edude mmɔ ke utɔŋ,

⁴eda esɔk Aaron. Ndien enye onyuŋ ɔbɔ mmɔ ke ubɔk; ada usɔi-ŋkpɔ anam enye, onyuŋ atara enye anam eyen enaŋ; ndien mmɔ edɔhɔ ete, O Israel, mme mmɔ emi edi abasi fo emi akadade fi ke isɔŋ Egypt ɔdɔk edi.

⁵Ndien adaŋemi Aaron okutde, enye anam itie-uwa ke iso esie; ndien Aaron ɔtɔt ete, Mkpɔŋ edi usɔrɔ Jehovah.

⁶Ndien mkpɔŋ mmɔ ebak edemere, ekewa edifɔp uwa, enyuŋ eda uwa emen edi; ndien kpukpru owo esuhɔre etie, edia ŋkpɔ enyuŋ eŋwɔŋ, ndien edaha ke enyɔŋ ekebre mbre.

⁷Ndien Jehovah ɔdɔhɔ Moses, ete, Suhɔre, nyɔŋ: koro oruk fo, emi afo akadade ke isɔŋ Egypt ɔwɔrɔ, emebiara.

⁸Ibigike bigi, mmɔ ewaha ekpɔŋ usuŋ emi ŋketemede mmɔ; mmɔ emetara gold enam eyen enaŋ ke idem mmɔ, enyuŋ enuhɔ enɔ enye, enyuŋ ewa uwa enɔ enye, enyuŋ edɔhɔ ete, O Israel, Mme mmɔ emi edi abasi fo, emi akadade fi ke isɔŋ Egypt ɔdɔk edi.

⁹Jehovah onyuŋ ɔdɔhɔ Moses, ete, Mmokut mbio emi, ndien sese, mmɔ edi mbon nsɔŋ-ibuot:

¹⁰kam yak mi, ndien, man iyaresit mi asak nte ikaŋ ye mmɔ, man nnyuŋ nsobo mmɔ; ndien nyenam fi akabare edi akamba idut.

¹¹Ndien Moses ekpe Jehovah Abasi esie ubɔk, ete, O Jehovah, nsinam iyaresit fo asakde ntem ye ikɔt fo, emi afo okosiode mmɔ ke isɔŋ Egypt, ke akwa odudu, ye ke ɔkpɔsɔŋ ubɔk?

¹²Ke didie ke nditɔ Egypt edidɔhɔ ete, Enye okosio mmɔ ke ibak, ete iwot mmɔ ke otu ikpɔ ibot, inyuŋ isobo mmɔ ke iso isɔŋ ifep? Kabare kpɔŋ ikaŋ-ikaŋ iyaresit fo, nyuŋ dahado ke idiɔk-ŋkpɔ emi nɔ ikɔt fo.

¹³Ti Abraham, ye Isaac, ye Israel, ikɔt fo emi afo ɔkɔŋwɔŋɔde ma idem fo ɔnɔ mmɔ, okonyuŋ ɔdɔhɔde mmɔ ete, Nyenam ubon mbufo ewak nte ntantafiɔŋ enyɔŋ; nyenyuŋ nda ofuri isɔŋ emi ŋkɔdɔhɔde mbaŋa, nnɔ ubon mbufo, ndien mmɔ eyeda enye enyene ke nsinsi.

¹⁴Ntem ke Jehovah adahado ke idiɔk-ŋkpɔ emi enye ekekerede ndinam ikɔt esiemɔ.

¹⁵Ndien Moses akabare oto ke enyɔŋ obot ɔsuhɔre, ye itiat-ŋwed ntiense iba ke ubɔk; ekewet itiat-ŋwed ke edem mbiba; ekewet mmɔ ke edem emi ye ke edem eken.

¹⁶Ndien itiat-ŋwed oro edi ubɔk utom Abasi, ŋwet oro onyuŋ edi ubɔk-ŋwet Abasi, emi enye akakapde esin ke itiat oro.

¹⁷Edikem, ke adaŋemi Joshua okopde mkpo kpukpru owo, nte efioride, enye ɔdɔhɔ Moses, ete, Mkpo ekɔŋ ke nna!

¹⁸Ndien enye ɔbɔrɔ ete, Idige mkpo uko, inyuŋ idige mkpo ufep; edi ukube idara ke ŋkop.

¹⁹Edikem adaŋemi enye asaŋade ekpere nna, enye okut eyen enaŋ oro ye unek; ndien esit ɔbumere Moses, ndien enye ayak itiat-ŋwed oro ke ubɔk esie ɔduɔk, onyuŋ anuak mmɔ ke usuhɔre obot.

²⁰Ndien enye emen eyen enaŋ oro mmɔ ekenamde, ɔfɔp ke ikaŋ, onyuŋ ɔkɔk enye emem, ndien ada ɔduɔk ke enyɔŋ mmɔŋ, onyuŋ anam nditɔ Israel eŋwɔŋ.

²¹Ndien Moses ɔdɔhɔ Aaron, ete, Mbio emi ekenam fi nso ŋkpɔ, eke esinde fi ada akwa idiɔk-ŋkpɔ odori mmɔ?

²²Ndien Aaron ɔdɔhɔ ete, Esit okubumere ɔbɔŋ mi; afo ɔmɔfiɔk mbio emi, nte mmɔ esinde esit mmɔ ke ibak.

²³Ndien mmɔ ekedɔhɔ mi ete, Nam abasi eke edibemde nnyin iso, nɔ nnyin: koro ama edi Moses, owo emi akadade nnyin ke isɔŋ Egypt ɔdɔk edi, nnyin ifiɔkke se itibede ye enye.

²⁴Ndien ndɔhɔ mmɔ nte, Yak owo eke enyenede gold, okibi enye efep. Ndien mmɔ eda enye esɔk mi; ndien ami nnyuŋ nsin enye ke ikaŋ: ndien eyen enaŋ emi ɔwɔrɔ.

²⁵Ndien Moses okut nte mmɔ enamde otime-otime: koro Aaron akayakde mmɔ enam otime-otime, man edi se mme asua mmɔ esakde.

²⁶Ndien Moses ada ke usuŋ, onyuŋ ɔdɔhɔ ete, Anie owo ada ye Jehovah? yak etiene mi. Ndien kpukpru nditɔ Levi eka ekesobo idem ke ɔtɔ esie.

²⁷Ndien enye ɔdɔhɔ mmɔ ete, Ntem ke Jehovah Abasi Israel ɔdɔhɔ ete, Yak kpukpru owo etime ofut mmɔ ke ŋkaŋ mmɔ, ebe ke usuŋ nna eduk, ewɔrɔ ke usuŋ, yak kpukpru owo enyuŋ ewot eyen-eka mmɔ enyuŋ ewot ufan mmɔ, enyuŋ ewot mbɔhiduŋ mmɔ.

²⁸Ndien nditɔ Levi enam kpasuk ntre ke uyo Moses; ndien ke usen oro tɔsin owo ita eduɔŋɔ ke otu mmɔ.

²⁹Ndien Moses ɔdɔhɔ ete, Mbufo eyɔhɔ ubɔk mbufo mfin emi enɔ Jehovah, owo kiet ke idem eyen esiemɔ, owo kiet ke idem eyen-eka esie; ndien mbufo eyekut ufɔn mfin emi.

³⁰Edikem eyo esiere, ndien Moses ɔdɔhɔ kpukpru owo, ete, Mbufo emenam ata idiɔk ido, ndien ke emi, nyedɔk ntiene Jehovah; ndusuk nyekut nte nsiode isop idiɔk ido mbufo emi.

³¹Ndien Moses afiak etiene Jehovah, ɔkɔdɔhɔ ete, Mbɔk, mbɔk! mbio emi emenam ata idiɔk ido, emenyuŋ enam abasi gold ke idem mmɔ.

³²Afo akpakam efen idiɔk ido mmɔ ndien mmunyimeke, mbɔk, sɔhi mi fep ke ŋwed fo emi afo ewetde.

³³Ndien Jehovah ɔdɔhɔ Moses, ete, Owo eke eduede mi, enye ke nsɔhi ke ŋwed mi mfep,

³⁴Ka, ndien, kada mbon oro, ka ebiet emi ŋkɔdɔhɔde fi: sese, angel mi ɔmɔŋ ebem fi iso: ndien ke usen emi ndinɔde ufen, nyenɔ mmɔ ufen idiɔk ido mmɔ.

³⁵Ndien Jehovah ɔnɔ mbon oro ufen, koro mmɔ ekenamde eyen enaŋ emi Aaron akanamde.