Read efik EXODUS 34 Bible Online

EXODUS 34 - efik bible

EXODUS 34

¹NDIEN Jehovah ɔdɔhɔ Moses ete, Sɔi itiat ŋwed iba ke idem fo, ebiet eke akpa: ndien nyeda ikɔ emi ekedude ke akpa itiat-ŋwed emi afo okobomde, ŋwet nsin ke itiat-ŋwed oro.

²Nyuŋ tim ŋkpɔ beŋe usenubɔk, ndien dɔk ke obot Sinai ke usenubɔk, da do ye ami ke enyɔŋ obot.

³Ndien kuyak baba owo kiet etiene fi ɔdɔk, ekunyuŋ eyak ekut owo ndomo kiet ke ofuri obot; ekunyuŋ eyak ŋkpri ufene ye enaŋ eta mbiet ke iso obot oro.

⁴Ndien enye ɔsɔi itiat-ŋwed iba, ebiet eke akpa; ndien Moses abak edemere ke usenubɔk, ɔkɔdɔk obot Sinai, nte emi Jehovah ɔkɔdɔhɔde enye, onyuŋ obiom itiat-ŋwed iba oro ke ubɔk.

⁵Ndien Jehovah etie ke obubit enyɔŋ ɔsuhɔre, edida ye enye do, onyun ataŋa enyiŋ Jehovah.

⁶Ndien Jehovah ɔbiɔŋɔ enye ke iso, ataŋa ete, Jehovah, Jehovah, Abasi mbɔm, ye mfɔn, ye anyan ime,

⁷awak ima ye akpanikɔ, onim ima ɔnɔ ediwak tɔsin, efen mme ukwaŋ-ŋkpɔ, ye ndudue, ye idiɔk ido, edi iyakke mbon-isop ebɔhɔ; ada usiene mme ukwaŋkpɔ mme ete, osio ye nditɔ, ye nditɔ nditɔ, tutu osim ɔyɔhɔ emana ita ye inaŋ.

⁸Ndien Moses awara onuhɔ ke isɔŋ, onyuŋ owuk ibuot.

⁹Enye onyuŋ ɔdɔhɔ ete, Mbɔk, edieke afo enende iso ye ami, O Ɔbɔŋ, mbɔk, yak Ɔbɔŋ mi asaŋa ke otu nnyin; koro mmɔ edide mbon nsɔŋibuot; nyuŋ fen ukwaŋ-ŋkpɔ nnyin, ye idiɔk ido nnyin, nyuŋ da nnyin nim ke udeme fo.

¹⁰Ndien Enye ɔdɔhɔ ete, Sese, ami mmɔŋ ndiomi ediomi: ke iso kpukpru oruk fo ke ndinam mme utibe ŋkpɔ, eke akanam minamke ke ofuri ererimbot, akanam minyuŋ inamke ke baba idut kiet: ndien kpukpru owo emi afo odude ke otu mmɔ, eyekut se Jehovah edinamde: koro se ndinamde ye afo edide ŋkpɔ ndik.

¹¹Tim kpeme se ami mmɔŋ nteme fi mfin emi: sese, mmɔŋ mbin mme Amorite, ye mme Canaanite, ye mme Hittite, ye mme Perizzite, ye mme Hivite, ye mme Jebusite, ke iso fo mfep.

¹²Kpeme idem fo, mbak edidiomi ediomi ye mme andiduŋ edem emi afo akade do, mbak enye edikabare edi afia ke ufɔt fo.

¹³Edi mbufo ewuri mme itie uwa mmɔ, ebom mme adaha mmɔ, enyuŋ esiak mme eto-mkpe mmɔ:

¹⁴kunyuŋ utuak ibuot unɔ abasi efen baba kiet: koro Jehovah, emi enyiŋ esie ekerede Ufup, edi Abasi ufup:

¹⁵mbak afo edidiomi ediomi ye mme andiduŋ isɔŋ emi; ndien mmɔ etiene mme abasi mmɔ enam use, enyuŋ ewa uwa enɔ mme abasi mmɔ, ndien owo okot fi, afo onyuŋ aka adia ŋkpɔ uwa esie:

¹⁶onyuŋ ada nditɔ-iban mmɔ ɔnɔ nditɔ-iren fo, ndien nditɔ-iban mmɔ etiene mme abasi mmɔ enam use, enyuŋ eda mme nditɔ-iren fo etiene mme abasi mmɔ enam use.

¹⁷Kutara ŋkpɔ ubot abasi ke idem fo.

¹⁸Nim usɔrɔ uyo eke leaven miduhe. Ke usen itiaba ke afo edita uyo eke leaven miduhe, kpa nte ŋkowukde fi; ke ini ɔfiɔŋ Abib: koro ke ɔfiɔŋ Abib ke afo okoto ke Egypt ɔwɔrɔ.

¹⁹Kpukpru se isirerede itie-eyen edi okim; ye kpukpru akpa nyara nditɔ ufene fo, edide akpa eyen enaŋ, onyuŋ edide eke ŋkpri ufene.

²⁰Edi da eyen erɔŋ fak akpa eyen ass: ndien mufakke, buŋ enye itɔŋ. Fak kpukpru nditɔ-iren fo. Ndien owo baba kiet okusaŋa ubɔk-ubɔk edi ke iso mi.

²¹Nam utom ke ofuri usen itiokiet: ndien dop ke ɔyɔhɔ usen itiaba: dop ke ini utɔ, ye ke ini ukpeŋe.

²²Nyuŋ tim nim usɔrɔ mme urua, ke akpa obufa wheat eke ekpeŋede, ye usɔrɔ ubiom-ibokpot ke ukabare isua.

²³Yak kpukpru irenowo fo edi ke iso Ɔbɔŋ Jehovah Abasi Israel, utim ikata ke isua.

²⁴Koro nyebin mme idut ke iso fo mfep, nnyuŋ nnam mme adaŋa fo etara: ndien baba owo kiet idiyomke isɔŋ fo, ke ini afo edidɔkde ndiwut Jehovah Abasi fo idem, utim ikata ke isua.

²⁵Kuduɔk iyip uwa mi ubuak ye leaven: kunyuŋ uyak uwa usɔrɔ passover adaŋ esiere usen.

²⁶Da akpa obufa mbuŋwum isɔŋ fo sɔk ke ufɔk Jehovah Abasi fo. Kutem eyen ebot ke mmɔŋ eba eka esie.

²⁷Ndien Jehovah ɔdɔhɔ Moses ete, Wet mme ikɔ emi ke idem fo: koro ndade uyo ikɔ emi ndiomi ediomi ye afo, ye Israel ŋko.

²⁸Ndien enye odu do ye Jehovah ke uwemeyo aba ye okoneyo aba; itaha uyo, inyuŋ iŋwɔŋke mmɔŋ. Ndien Enye emen ikɔ ediomi emi, kpa mme ikɔ duop oro, ewet esin ke itiat-ŋwed oro.

²⁹Edikem, ke adaŋemi Moses otode ke obot Sinai ɔsuhɔre, ye itiat-ŋwed ntiense mbiba ke ubɔk Moses, ke ini enye otode ke obot ɔsuhɔre, Moses ifiɔkke ite ke ikpa iso imɔ esem, ke enemede nneme ye enye.

³⁰Ndien adaŋemi Aaron ye kpukpru nditɔ Israel ekutde Moses, sese, ikpa iso esie esem: ndien mmɔ edikhe ndisaŋa ŋkpere enye.

³¹Ndien Moses okot mmɔ edi; ndien Aaron ye kpukpru mbɔŋ esop efiak etiene enye: ndien Moses osioŋo nneme ye mmɔ.

³²Ekem, usuk-usuk, kpukpru nditɔ Israel esaŋa ekpere: ndien enye eteme mmɔ kpukpru se Jehovah ɔkɔdɔhɔde enye ke obot Sinai.

³³Ndien adaŋemi Moses etiŋde ɔnɔ mmɔ ama, enye ada ufuk-iso esiemɔ.

³⁴Edi adaŋemi Moses odukde ke iso Jehovah ndidɔhɔ ye enye, enye ɔfuhɔre ufuk-iso efep, tutu enye ɔwɔrɔ. Ndien enye ɔwɔrɔ edimen se eketemede enye, etiŋ ɔnɔ nditɔ Israel.

³⁵Ndien nditɔ Israel ekut iso Moses, nte ikpa iso Moses esemde: ndien Moses ɔtɔŋɔ ntak ada ufuk-iso ofuk iso esie, tutu edisim ini emi enye odukde ndidɔhɔ ye Enye.