Read efik EXODUS 36 Bible Online

EXODUS 36 - efik bible

EXODUS 36

¹NTEM ke Bezalel anam, ye Oholiab, ye kpukpru owo mbufiɔk, eke Jehovah esinde mmɔ mbufiɔk, ye asian ke idem, man efiɔk nte enamde kpukpru oruk ubɔk-usɔ ke edisana efe, kpa nte emi Jehovah eketemede kpukpru.

²Edikem Moses okot Bazalel ye Oholiab, ye kpukpru mbon eti ibuot, eke Jehovah ekesinde mmɔ eti ibuot ke idem, kpukpru owo eke esit mmɔ edemerede mmɔ ndisaŋa ŋkpere utom, nnyuŋ nsin ubɔk ke esit.

³Ndien mmɔ ebɔ Moses kpukpru enɔ emi nditɔ Israel ekedade esɔk ke utom edisana efe, man enam enye. Ndien mmɔ esuk ededa enɔ ima esɔk enye kpukpru usenubɔk.

⁴Ekem kpukpru mbon eti ibuot, emi enamde kpukpru utom edisana efe, kiet kiet ekpɔŋ utom mmɔ emi mmɔ enamde;

⁵eka ekedɔhɔ Moses, ete, Mbio emi eda ŋkpɔ ebe adaŋa nte ekemde, edinɔ ke erinam utom, emi Jehovah okowukde ete enam enye.

⁶Ndien Moses owuk ete etɔt ofuri nna ete, Yak iren ye iban ekunam aba utom eke enɔde edisana efe; ndien mmɔ etre ndida ŋkpɔ ndi.

⁷Ndien se mmɔ enamde ekem ndinam kpukpru utom oro, onyuŋ ɔsuhɔ.

⁸Ndien kpukpru owo mbufiɔk ke otu mmɔ emi enamde utom oro, enam ebiet-iduŋ oro ke ikpehe eti edifiak linen duop, ye awawa, ye purple, ye ididuot; cherubim ubɔk-usɔ ɔdɔk-ɔfɔŋ ke enam mmɔ

⁹Uniɔŋ ikpehe kiet edi ibio idomo-okuk inaŋ: kpukpru ikpehe esaŋa idomo kiet.

¹⁰Enye onyuŋ ɔkɔt ikpehe ition ke ɔtɔ kiet: onyuŋ ɔkɔt ikpehe ition efen ke ɔtɔ kiet.

¹¹Onyuŋ ada awawa anam ekpɔ esin ke mben ikpehe kiet, ke ibuŋ, ke ɔtɔ emi ekɔtde mmɔ: ntre ke enye anam ke mben akpatre ikpehe ke udiana-akpa ikɔt.

¹²Enye anam ekpɔ aba ye duop, esin ke ikpehe kiet, onyuŋ anam ekpɔ aba ye duop, esin ke ibuŋ ikpehe emi odude ke udiana-akpa ikɔt: ekpɔ kiet ekem ye eken.

¹³Enye onyuŋ anam ŋkɔp o-gold aba ye udop, ada ŋkɔp oro adian ikpehe kiet ye kiet: ndien enye akabare edi iduŋ kiet.

¹⁴Enye onyuŋ anam ikpehe idet ebot ke eke tent eke odorode ke enyɔŋ ebiet-iduŋ: anam ikpehe duopekiet.

¹⁵Uniɔŋ ikpehe kiet edi ibio idomo-okuk edip ye duop, ufot ikpehe kiet onyuŋ edi ibio idomo-okuk inaŋ: ikpehe duopekiet esaŋa idomo kiet.

¹⁶Ndien enye ɔkɔt ikpehe ition ke ɔtɔ kiet, onyuŋ ɔkɔt ikpehe itiokiet ke ɔtɔ kiet.

¹⁷Enye onyuŋ anam ekpɔ aba ye duop, esin ke mben akpatre ikpehe ke ikɔt kiet, onyuŋ anam ekpɔ aba ye duop, esin ke mben ikpehe udiana-akpa ikɔt.

¹⁸Onyuŋ anam ŋkɔp okpoho aba ye duop man eda edian tent oro, enam edi kiet.

¹⁹Ndien enye ada ikpa okukim erɔŋ eke etemde oyibe, anam ufuhɔ-ŋkpɔ tent; onyuŋ ada ikpa badger anam ufuhɔ-ŋkpɔ ke odoro enyɔŋ.

²⁰Ndien enye ada eto shittim anam obukpɔk ebiet-iduŋ, eneŋere eda.

²¹Uniɔŋ obukpɔk edi ibio idomo-okuk duop, ubara obukpɔk kiet onyuŋ edi ibio idomo-okuk kiet ye ubak.

²²Obukpɔk kiet enyene edet iba, kiet ekem ye kiet: ntem ke enye anam ye kpukpru obukpɔk ebiet-iduŋ.

²³Ndien enye anam mme obukpɔk ebiet-iduŋ; obukpɔk edip ke ŋkaŋ edem usuk:

²⁴enye onyuŋ anam socket silver aba, esin ke idak obukpɔk edip oro; socket iba ke idak obukpɔk kiet, ɔnɔ edet esie mbiba, ye socket iba ke idak obukpɔk kiet, ɔnɔ edet esie mbiba.

²⁵Enye onyuŋ anam obukpɔk edip ɔnɔ ŋkaŋ ebiet-iduŋ eken, ke edem edere:

²⁶ye socket silver mmɔ aba; socket iba ke idak obukpɔk kiet, ye socket iba ke idak obukpɔk kiet.

²⁷Ndien enye anam obukpɔk itiokiet ɔnɔ etak ebiet-iduŋ ke edem usop utin;

²⁸onyuŋ anam obukpɔk iba ɔnɔ inuk ebiet-iduŋ ke etak edem mbiba.

²⁹Ndien mmɔ edi ukem-ukem ke idak, ndien kpasuk ntre mmɔ edi ukem-ukem ke ibuot esie, ke ɔtɔ akpa mkpanuen: ntem ke enye anam mmɔ mbiba ɔnɔ inuk mbiba.

³⁰Ndien mmɔ edi obukpɔk itiaita; socket mmɔ efurekiet enyuŋ edi socket silver, socket iba iba ke idak obukpɔk kiet.

³¹Ndien enye ada eto shittim anam mme bar: anam ition ɔnɔ obukpɔk ŋkaŋ ebiet-iduŋ kiet;

³²onyuŋ anam bar ition ɔnɔ mme obukpɔk ŋkaŋ ebiet-iduŋ eken, ye bar ition ke eke obukpɔk ebiet-iduŋ ke etak edem usop-utin.

³³Enye onyuŋ anam ufɔt-ufɔt bar atuak ke ibuot emi ye ke ibuot oko ke ufɔt mme obukpɔk.

³⁴Onyuŋ ada gold ofuk obukpɔk: onyuŋ anam mkpanuen mmɔ ke gold, man edi itie mme bar; onyuŋ ofuk mme bar ke gold.

³⁵Ndien enye ada awawa, ye purple, ye ididuot, ye eti edifiak linen, anam ukara: anam enye cherubim cherubim ke ubɔk-usɔ ɔdɔk-ɔfɔŋ.

³⁶Ndien enye anam obukbɔk shittim inaŋ ɔnɔ enye, onyuŋ ofuk mmɔ ke gold; ntok mmɔ edi gold; onyuŋ atara silver anam socket inaŋ ɔnɔ mmɔ.

³⁷Enye onyuŋ anam ikpehe enyin-usuŋ efe oro ke awawa, ye purple, ye ididuot, ye eti edifiak linen, ke ubɔk-usɔ abiabon;

³⁸ye mme obubɔk esie ition, ye ntok mmɔ: ndien enye ada gold ofuk mbuot mmɔ, ye ibiɔŋ esaŋ mmɔ; edi socket mmɔ ition edi okpoho.