Read efik EXODUS 39 Bible Online

EXODUS 39 - efik bible

EXODUS 39

¹NDIEN mmɔ enyuŋ eda awawa, ye purple, ye ididuot, enam edisine-ŋkpɔ utom, man enam ŋkpɔ ke edisana ubet; enyuŋ enam edisana edisine-ŋkpɔ Aaron; kpa nte Jehovah eketemede Moses.

²Enye onyuŋ ada gold, ye awawa, ye purple, ye ididuot, ye eti edifiak linen, anam ephod.

³Ndien mmɔ edom gold oro efere, enyuŋ esibe enye ndidi-ndidi, enyuŋ eda ebuak ye awawa ye purple, ye ididuot, ye eti linen,

⁴ke ubɔk-usɔ ɔdɔk-ɔfɔŋ. Mmɔ enam afara esie emi ekɔtde ɔtɔ kiet: mmɔ ekɔt enye ke utit mbiba.

⁵Ndien ubɔp-ephod esie emi odude enye ke esit, asaŋa idem kiet ye enye, ebiet ubɔk-utom esie, gold, ye awawa, ye purple, ye ididuot, ye eti edifiak linen; kpa nte Jehovah eketemede Moses.

⁶Mmɔ enyuŋ enam itiat onyx oro, esine socket o-gold, enyuŋ ekap mmɔ, nte ekapde seal, nte enyiŋ nditɔ Israel edide.

⁷Ndien enye esin mmɔ ke afara ephod, ete edi itiat eriti ndito Israel: nte emi Jehovah okowukde Moses.

⁸Enye onyuŋ anam mbana ikpanesit utom-ubɔk ɔdɔk-ɔfɔŋ, ebiet ubɔk-utom ephod; ke gold, ye awawa, ye purple, ye ididuot, ye eti edifiak linen.

⁹Mbuot esie edi ukukem: enam mbana-ikpanesit, efut enye iba:

¹⁰ndien mmɔ esin enye udim itiat inaŋ ke esit: udim sardius, ye topaz, ye carbuncle, edi akpa udim.

¹¹Ndien udiana akpa udim edi emerald, ye sapphire, ye diamond.

¹²Ye ɔyɔhɔ udim ita, jacinth, ye agate ye, amethyst.

¹³Ye ɔyɔhɔ udim inaŋ, beryl, ye onyx, ye jasper: mmɔ esine ke socket o-gold ke ɔtɔ emi esinde mmɔ.

¹⁴Ndien mme itiat emi esaŋa ye enyiŋ nditɔ Israel duopeba, nte enyiŋ mmɔ edide, nte ekapde seal, kpukpru mme esien duopeba nte enyiŋ mmɔ edide.

¹⁵Ndien mmɔ eda ata eti gold enam mfiaha-mfiaha ŋkpɔkɔbi, nte enamde uruk, esin ke mbana-ikpanesit.

¹⁶Mmɔ enyuŋ enam socket o-gold iba, ye mkpanuen o-gold iba, enyuŋ edian mkpanuen iba ke mbuot mbana-ikpanesit iba.

¹⁷Enyuŋ eda mfiaha-mfiaha ŋkpɔkɔbi gold mbiba oro, esin ke mkpanuen mbiba ke mbuot mbana-ikpanesit.

¹⁸Enyuŋ eda mbuot mfiaha-mfiaha ŋkpɔkɔbi iba (eken), etebe ke socket iba oro, edian ke afara ephod ke iso esie.

¹⁹Ndien mmɔ enam mkpanuen gold iba, edian ke mbuot mbana-ikpanesit mbiba, ke mben esie, emi edude ke edem ephod ke esit.

²⁰Mmɔ enyuŋ enam mkpanuen iba (efen), edian ke afara ephod mbiba ke isɔŋ, ke iso esie, ekpere itie isobo esie, ke enyɔŋ ubɔp-ephod.

²¹Ndien mmɔ eda awawa erebin, etebe mkpanuen mbana-ikpanesit ke mkpanuen ephod, man ana ke enyɔŋ ubɔp-ephod, man owo okutat mbana-ikpanesit ke ephod efep; kpa nte emi Jehovah eketemede Moses.

²²Enye onyuŋ anam ekura ephod ke ubɔk-usɔ ɔdɔk-ɔfɔŋ; ofuri edi awawa.

²³Ndien itɔŋ ekura odu enye ke ufɔt, ebiet itɔŋ ufuhɔ-ikpanesit ekɔŋ, enyene ibuŋ akan itɔŋ esie okuk, man enye okusiaha.

²⁴Mmɔ enyuŋ eda awawa, ye purple, ye ididuot, ye eti edifiak linen, enam pomegranate esin ke ibuŋ ekura.

²⁵Ndien mmɔ eda ata eti gold enam ŋkanika, esin ŋkanika ke ufɔt mme pomegranate, ke ibuŋ ekura ekanade ekuk, ke ufɔt mme pomegranate:

²⁶ŋkanika kiet ye pomegranate kiet, ŋkanika kiet ye pomegranate kiet, ke ibuŋ ekura ekan ekuk, man esine enye enam ŋkpɔ: nte emi Jehovah eketemede Moses.

²⁷Ndien mmɔ eda eti linen enam frock ke ubɔk-usɔ ɔdɔk-ɔfɔŋ, enɔ Aaron ye nditɔ esie,

²⁸ye mitre eti linen, ye ndiye uyaribuot eti linen, ye ɔfɔŋukot linen, ke eti edifiak linen;

²⁹ye ubɔp-isin ke eti edifiak linen, ye awawa, ye purple, ye ididuot, ubɔk-utom ɔdɔk-ɔfɔŋ; kpa nte Jehovah eketemede Moses.

³⁰Ndien mmɔ enam ubak ata eti gold ke eke edisana anyanya, enyuŋ ekap ŋwed esin ke esit, nte ekapde seal, EDISANA ŊKPƆ JEHOVAH.

³¹Ndien mmɔ eda awawa erebin etebe enye, man edian enye ke mitre ke enyɔŋ; kpa nte Jehovah okowukde Moses.

³²Ntem ke mmɔ ema ofuri utom ebiet-iduŋ efe esop: nditɔ Israel enyuŋ enam kpukpru se Jehovah okowukde Moses, ntem ke mmɔ enam.

³³Ndien mmɔ eda ebiet iduŋ oro esɔk Moses, kpa tent, ye kpukpru ŋkpoduoho esie, ye ŋkɔp esie, ye obukpɔk esie, ye mme bar esie, ye mme obubɔk esie, ye mme socket esie:

³⁴ye ufuhɔ-ŋkpɔ ikpa okukim eke etemde oyibe, ye ufuhɔ-ŋkpɔ ikpa badger, ye ukara eke okuide;

³⁵ye ekebe ntiense, ye esaŋ esie, ye itie usio-isop:

³⁶ye okpokoro, ye kpukpru nkpɔ esie, ye uyo iso;

³⁷ye edisana uwuk utuenikan, ye mme utuenikaŋ esie, ye mme utuenikaŋ eke ediɔŋde edori ke itie ke itie, ye kpukpru ŋkpɔ esie,

³⁸ye aran ke eke uŋwana; ye itie-uwa gold, ye aran-nyere, ye incense eti utebe, ye ikpehe enyin-usuŋ efe;

³⁹ye itie-uwa okpoho, ye grating okpoho esie, ye esaŋ esie, ye kpukpru ŋkpɔ-utom esie, ye akpaŋkpaŋ,

⁴⁰ye ukot esie; ye mme ikpehe okure, ye obubɔk esie, ye mme socket esie, ye ikpehe ŋkpɔ-utom ebiet-iduŋ efe esop;

⁴¹ye edisine-ŋkpɔ utom, man enam ŋkpɔ ke edisana ubet, kpa edisana edisine-ŋkpɔ Aaron oku, ye edisine-ŋkpɔ nditɔ esie, man eda oku.

⁴²Kpa nte Jehovah eketemede Moses kpukpru, kpa ntre ke nditɔ Israel enam ofuri utom.

⁴³Ndien Moses ese kpukpru utom oro, ndien, sese, ema ekenam enye, kpa nte emi Jehovah eketemede, kpa ntre ke mmɔ ema ekenam enye. Ndien Moses ɔkɔm mmɔ.