Read efik EXODUS 4 Bible Online

EXODUS 4 - efik bible

EXODUS 4

¹NDIEN Moses ɔbɔrɔ ete, Edi, sese, mmɔ idibuɔtke idem ye ami, idinyuŋ ikopke uyo mi: koro mmɔ eyedɔhɔ, ete, Jehovah ikowutke fi idem.

²Ndien Jehovah obup enye ete, Nsidi oro ke ubɔk fo?

³Ndien enye ete, Esaŋ. Ndien Enye ete, Men enye duɔk ke isɔŋ. Ndien enye emen esaŋ ɔduɔk ke isɔŋ, ndien esaŋ akabare edi urukikɔt; ndien Moses efehe ɔkpɔŋ enye.

⁴Ndien Jehovah ɔdɔhɔ Moses, ete Nyan ubɔk fo mum enye isim. Ndien enye anyan ubɔk esie omum urukikɔt, ndien urukikɔt akabare enye esaŋ ke ubɔk;

⁵man mmɔ enim ke akpanikɔ, ete ke Jehovah Abasi ete mmɔ, Abasi Abraham, ye Abasi Isaac, ye Abasi Jacob ama owut fi idem.

⁶Ndien Jehovah ɔtɔnɔ ntak ɔdɔhɔ enye, ete, Sin ndien ubɔk fo ke ikpanesit fo. Ndien enye esin ubɔk esie ke ikpanesit: ndien adaŋemi osiode enye, sese, ubɔk akabare enye akpa afia nte snow.

⁷Ndien enye ɔdɔhɔ ete, Tɔŋɔ ntak sin ubɔk fo ke ikpanesit fo. Ndien enye ɔtɔŋɔ ntak esin ubɔk ke ikpanesit esie; onyuŋ osio enye ke ikpanesit ŋko, ndien, sese, enye amakabare nte obukidem esie.

⁸Ama ekem, edieke mmɔ midibuɔtke idem ye afo, midinyuŋ ikopke uyo mbemiso idiɔnɔ oro, mmɔ eyebuɔt idem ye uyo udiana akpa idiɔŋɔ.

⁹Ndien ama ekem, edieke midibuɔtke idem ye uyo idem idiɔnɔ mbiba emi, minyuŋ ikopke uyo fo, ndien afo edida mmɔŋ ke akpa ɔduɔk ke obot: ndien mmɔŋ emi afo edidade ke akpa, eyekabare iyip ke obot.

¹⁰Ndien Moses ɔdɔhɔ Jehovah, ete, Mbɔk, Ɔbɔŋ mi, ami ndige owo udɔn-ikɔ, akananam, ye idem ini emi afo ɔdɔhɔde ye owo fo: koro ami ndobide inua, nnyuŋ ndobide edeme.

¹¹Ndien Jehovah ɔdɔhɔ enye ete, Anie ɔnɔ owo inua? anie onyuŋ anam imum, ye inan, ye okut usuŋ, ye nnan?

¹²Nte idige ami Jehovah? Ka ndien, ami nyenyuŋ ndu ye inua fo, nnyuŋ nteme fi se afo edidɔhɔde.

¹³Ndien enye ete, Mbɔk, Ɔbɔŋ mi, da ubɔk owo eke afo edidɔŋde, dɔŋ utom.

¹⁴Ndien Jehovah ayat esit ye Moses, onyuŋ ɔdɔhɔ ete, Nte Aaron Levite idige eyen-uka? mmɔfiɔk nte enye otimde nditiŋ ikɔ. Ndien ŋko, sese, enye ɔmɔŋ owɔrɔ edi ndisobo ye afo: ndien, ke ini edikutde fi, enye eyedat esit.

¹⁵Ndien afo editiŋ ɔnɔ enye, onyuŋ ada ikɔ oro esin enye ke inua: ami nyenyuŋ ndu ye inua fo, ye inua esie, nnyuŋ nteme mbufo se mbufo edinamde.

¹⁶Enye eyenyuŋ ɔdɔhɔ ye mbio oro ɔnɔ fi: ke ntre ke enye editie nte inua fo, afo edinyuŋ etie nte Abasi ɔnɔ enye.

¹⁷Nyuŋ da esaŋ emi afo edidade anam mme idiɔŋɔ oro, kama ke ubɔk fo.

¹⁸Ndien Moses ɔnyɔŋ ke ebiet Jethro ete aŋwan esie, onyuŋ ɔdɔhɔ ete, Mbɔk, yak mi nnyɔŋ ntiene nditɔ-ete mi emi edude ke Egypt, nnyuŋ nse mme mmɔ esuk ededu uwem. Ndien Jethro ɔdɔhɔ Moses, ete, Ka ke ifure.

¹⁹Jehovah onyuŋ ɔdɔdɔ Moses ke Midian, ete, Fiak ka ke Egypt: koro kpukpru mmɔ oro ekeyomde uwem fo, emekpaŋa.

²⁰Ndien Moses ada ŋwan esie ye nditɔ iren esie, odori ke ass, onyuŋ afiak aka ke isɔŋ Egypt. Moses onyuŋ akama esaŋ Abasi ke ubɔk esie.

²¹Jehovah onyuŋ ɔdɔhɔ Moses ete, Ke ini afo afiakde aka ke Egypt, tiŋ enyin ke kpukpru mme utibe ŋkpɔ emi nsinde fi ke ubɔk, nnyuŋ nnam mmɔ ke iso Pharaoh: edi ami nyesɔŋ enye esit, ndien enye idisanake mbon oro iyak.

²²Ndien afo edidɔhɔ Pharaoh, ete, Ntem ke Jehovah ɔdɔhɔ, ete, Israel edi eyen mi, ye akpan mi:

²³ndien ndɔhɔ fi, nte, Sana eyen mi yak, man enye anam ŋkpɔ ɔnɔ mi: ndien munyimeke enye ndiyak, sese, ami nyewot eyen fo, kpa akpan fo.

²⁴Edikem ke usuŋ ke ebiet idaŋ ke okoneyo, Jehovah osobo ye enye, onyuŋ oyom enye ndiwot.

²⁵Ndien Zipporah ada ikwa itiat, osibe eyen esie edut efep, ada onim enye ke ikpat, ete, Afo edi owo-ndɔ iyip mi,

²⁶Ndien enye asana enye ayak: ndien enye (ŋwan) ɔdɔhɔ, ete, Owo-ndɔ iyip, kabaŋa mbobi.

²⁷Ekem Jehovah ɔdɔhɔ Aaron ete, Ka kosobo ye Moses ke wilderness. Ndien enye aka okosobo ye enye ke obot Abasi onyuŋ otim enye inua.

²⁸Ndien Moses emen kpukpru ikɔ Jehovah emi Enye ɔkɔdɔŋde enye utom, ye kpukpru mme idiɔŋɔ emi Enye eketemede enye, etiŋ ɔnɔ Aaron.

²⁹Ndien Moses ye Aaron eka ekesop ye kpukpru mme ebio-owo nditɔ Israel:

³⁰ndien Aaron etiŋ kpukpru ikɔ oro Jehovah ama ɔkɔdɔhɔ Moses, onyuŋ anam mme idiɔŋɔ oro ke iso kpukpru owo.

³¹Ndien kpukpru owo enim ke akpanikɔ: ndien adaŋemi mmɔ ekopde, ete ke Jehovah ɔmɔŋ ekere nditɔ Israel, onyuŋ ese ukut mmɔ, mmɔ enuhɔ, enyuŋ etuak ibuot.