Read efik EXODUS 40 Bible Online

EXODUS 40 - efik bible

EXODUS 40

¹EKEM Jehovah ɔdɔhɔ Moses ete, Ke akpa usen akpa ɔfiɔŋ

²ke afo ediwuk ebiet iduŋ efe esop.

³Ndien sin ekebe ntiense do, nyuŋ kɔŋ ukara ke iso ekebe.

⁴Nyuŋ da okpokoro nim ke esit, nyuŋ tim dori se ekpedoride ke esit; nyuŋ men uwuk utuenikaŋ nim ke esit, nyuŋ dori enye mme utuenikaŋ ke enyɔŋ.

⁵Ndien da itie-ufɔp incense o-gold diɔk ke iso ekebe ntiense; nyuŋ kɔŋ ikpehe ke enyin-usuŋ ebiet-iduŋ.

⁶Ndien diɔk itie-ufɔp uwa ke iso enyin-usuŋ ebiet-iduŋ, kpa eke efep esop.

⁷Nyuŋ diɔk akpaŋkpaŋ uyere mmɔŋ ke ufɔt efe esop, ye itie-uwa, nyuŋ sin mmɔŋ ke esit.

⁸Ndien wuk okure kanade kuk, nyuŋ kɔŋ ikpehe ke enyin-usuŋ okure.

⁹Ndien da aran-nyere yet ebiet-iduŋ, ye kpukpru se iduhe enye ke esit, nyuŋ nim enye ke edisana, ye kpukpru ŋkpɔ-utom esie; ndien enye eyedi edisana.

¹⁰Ndien yet itie-ufɔp uwa, ye kpukpru ŋkpɔ esie, nyuŋ nam itie-uwa asana; ndien enye eyedi ata edisana itie-uwa.

¹¹Ndien yet akpaŋkpaŋ ye ukot esie; nyuŋ nam enye asana.

¹²Ndien da Aaron ye nditɔ esie, saŋa kpere enyin-usuŋ efe esop, keyet mmɔ mmɔŋ.

¹³Ndien sine Aaron edisana edisine-ŋkpɔ ke idem, nyuŋ yet enye aran, nyuŋ nim enye ke edisana; man enye ada oku mi.

¹⁴Da ndien nditɔ esie di kpere, nyuŋ sine mmɔ frock ke idem;

¹⁵nyuŋ yet mmɔ aran ke idem, nte emi eyetde ete mmɔ, man mmɔ eda oku mi: ndien eriyet emi afo eyetde mmɔ, iditreke ndidi eke itie oku, ke nsinsi, ke ofuri emana mmɔ.

¹⁶Ntem ke Moses anam: kpa nte Jehovah eketemede enye kpukpru ŋkpɔ, kpa ntre ke enye anam.

¹⁷Ndien edikem ke akpa ɔfiɔŋ udiana-akpa isua, ke akpa usen ɔfiɔŋ, mmɔ eneŋere ebiet-iduŋ oro ewuk.

¹⁸Ndien Moses owuk ebiet-iduŋ oro, ɔdiɔk mme socket esie, onyuŋ esin obukpɔk esie, onyuŋ akpaha mme bar esie, onyuŋ eneŋere obubɔk esie owuk.

¹⁹Enye onyuŋ ada tent ebri ke enyɔŋ ebiet-iduŋ, onyuŋ ada ufuhɔ-ŋkpɔ tent okubi enye ye enyɔŋ; kpa nte Jehovah eketemede Moses.

²⁰Enye onyuŋ emen ŋkpɔ-ntiense esin ke ekebe, onyuŋ adian esaŋ ke ekebe, onyuŋ ada itie usio-isop okubi ke ekebe.

²¹Ndien enye emen ekebe edisin ke ebiet-iduŋ, onyuŋ eneŋere ukara okui, eyiri enye ke iso ekebe ntiense: kpa nte emi Jehovah eketemede Moses.

²²Ndien enye ada okpokoro ɔdiɔk ke efe esop, ke ŋkaŋ ebiet-iduŋ edem edere, ke iso ukara.

²³Onyuŋ ɔdiɔŋ uyo odori ke esit, ke iso Jehovah; nte emi Jehovah eketemede Moses.

²⁴Ndien enye ada uwuk utueni-kaŋ ɔdiɔk ke efe esop, ekem, ye okpokoro, ke ŋkaŋ ebiet - iduŋ edem usuk.

²⁵Enye onyuŋ odori mme utuenikaŋ ke iso Jehovah; nte emi Jehovah eketemede Moses.

²⁶Ndien enye ada itie-uwa gold ɔdiɔk ke efe esop, ke iso ukara:

²⁷onyuŋ ɔfɔp edifuɔŋ incense ke esit; nte emi Jehovah eketemede Moses.

²⁸Ndien enye eyiri ikpehe enyin-usuŋ ebiet-iduŋ.

²⁹Onyuŋ ɔdiɔk itie-ufɔp uwa, ekpere enyin-usuŋ ebiet-iduŋ efe esop; ndien awa edifɔp uwa ye inuak-udia ke esit; nte emi Jehovah eketemede Moses.

³⁰Ndien enye ada akpaŋkpaŋ uyere mmɔŋ ɔdiɔk ke ufɔt efe esop ye itie-uwa, onyuŋ esin mmɔŋ uyere ke esit.

³¹Ndien Moses, ye Aaron, ye nditɔ esie, eyere ubɔk mmɔ, ye ukot mmɔ ke esit.

³²Ke ini mmɔ edukde ke efe esop, ye ke ini mmɔ esaŋade ekpere itie - uwa, mmɔ eyere; kpa nte Jehovah eketemede Moses.

³³Ndien enye eneŋere okure akan ebiet - iduŋ ye itie - uwa okuk, onyuŋ eyiri ikpehe inua - otop okure oro. Ntre ke Moses anam utom oro ama.

³⁴Ndien obubit enyɔŋ ofuk efe esop, ubɔŋ Jehovah onyuŋ ɔyɔhɔ ke ebiet-iduŋ.

³⁵Ndien Moses ikwe nte odukde ke efe esop; koro obubit enyɔŋ odorode ke esit, ubɔŋ Jehovah onyuŋ ɔyɔhɔ ke ebiet - iduŋ.

³⁶Ndien adaŋemi obubit enyɔŋ odororede ke ebiet-iduŋ efep, nditɔ Israel edaŋa eka ke kpukpru isaŋ mmɔ:

³⁷edi adaŋemi obubit enyɔŋ oro midorokede, mmɔ idaŋake, tutu osim usen emi enye odorode efep.

³⁸Koro obubit enyɔŋ Jehovah odorode ke ebiet-iduŋ ke uwem-eyo, ikaŋ onyuŋ odoro ke esit ke okoneyo, ke iso ofuri ufɔk Israel, ke ofuri isaŋ mmɔ.