Read efik EXODUS 6 Bible Online

EXODUS 6 - efik bible

EXODUS 6

¹NDIEN Jehovah ɔdɔhɔ Moses, ete, Ke emi afo eyekut se ndinamde ye Pharaoh: Koro ɔkpɔsɔŋ ubɔk eyesin enye asana mmɔ ayak, ɔkpɔsɔŋ ubɔk eyenyuŋ esin enye ebin mmɔ ke isɔŋ esie efep.

²Ndien Abasi eneme ye Moses, onyuŋ ɔdɔhɔ enye ete, Ami ndi Jehovah:

³Ŋkonyuŋ ŋwut Abraham, ye Isaac, ye Jacob idem mi, nte Ata Ɔkpɔsɔŋ Abasi; edi mmɔ ikɔfiɔkke enyiŋ mi Jehovah.

⁴Mma nnyuŋ nnam ediomi mi ye mmɔ ada, nte nyenɔ mmɔ isɔŋ Canaan, isɔŋ idaŋ mmɔ, emi mmɔ ekedaŋde ke esit.

⁵Ami mmonyuŋ ŋkop eseme nditɔ Israel ŋko, emi Egypt enimde ke ifin: mmonyuŋ nti ediomi mi.

⁶Dɔhɔ ndien ye nditɔ Israel, ete, Ami ndi Jehovah, nyenyuŋ nnam mbufo ewɔŋɔ ke idak mbiomo Egypt, nnyuŋ nsio mbufo ke ufin mmɔ, nnyuŋ mfak mbufo ke edinyanare ubɔk, ye ke ikpɔ ufen:

⁷nyenyuŋ nda mbufo nnim ke ikɔt mi, nnyuŋ ndi Abasi mbufo; mbufo eyenyuŋ efiɔk ete ke ami ndi Jehovah Abasi mbufo, emi nsiode mbufo ke idak mbiomɔ Egypt mfep.

⁸Nyenyuŋ nda mbufo nduk ke isɔŋ oro ŋkɔŋwɔŋɔde mbaŋa, nte, Nyeda enye nnɔ Abraham, ye Isaac, ye Jacob; Nyenyuŋ mmen enye nnɔ mbufo nte eda enyene: ami ndi Jehovah.

⁹Ndien Moses ɔdɔhɔ ntem ye nditɔ Israel: edi iyaresit ye idiɔk ufin iyakke mmɔ ekop ikɔ Moses.

¹⁰Ndien Jehovah ɔdɔhɔ Moses,ete,

¹¹Ka kɔdɔhɔ Pharaoh edidem Egypt, ete enye ayak nditɔ Israel edaŋa ke isɔŋ esie.

¹²Ndien Moses ɔdɔhɔ ke iso Jehovah, ete, Sese, nditɔ Israel ikopke uyo mi; ndien Pharaoh edinam didie ikop uyo mi, emi ndide edut ke inua?

¹³Ndien Jehovah eneme ye Moses, ye Aaron, onyuŋ otobo mmɔ etop ke ɔtɔ nditɔ Israel, ye eke Pharaoh edidem Egypt, ete mmɔ esioŋo nditɔ Israel ke isɔŋ Egypt efep.

¹⁴Mme mmɔ emi edi mbuot ufɔk mme ete mmɔ nditɔ Reuben, akpan Israel; Hanoch, ye Pallu, ye Hezron, ye Carmi; mme mmɔ emi edi ubon Reuben.

¹⁵Nditɔ Simeon ŋko: Jemuel, ye Jamin, ye Ohad, ye Jachin, ye Zohar, ye Shaul eyen aŋwan a Canaan kiet; mme mmɔ emi edi ubon Simeon.

¹⁶Mme mmɔ emi ŋko edi nditɔ Levi, ke emana mmɔ; Gershon, ye Kohath, ye Merari. Ndien mme isua uwem Levi edi ikie ye edip ye efureba.

¹⁷Nditɔ Gershon: Libni, ye Shimei, nte ubon mmɔ esaŋada.

¹⁸Nditɔ Kohath ŋko; Amram, ye Izhar, ye Hebron, ye Uzziel. Ndien mme isua uwen Kohath edi ikie ye edip ye udopeta.

¹⁹Nditɔ Merari ŋko; Mahli, ye Mushi; mme mmɔ emi edi ubon Levi, nte mme emana mmɔ esaŋade.

²⁰Edikem Amram ada Jochebed eyen-eka ete esie ke idem esie ɔdɔ; ndien enye aman Aaron ye Moses ɔnɔ enye. Ndien mme isua uwem Amram edi isua ikie ye edip ye efureba.

²¹Nditɔ Izhar ŋko: Korah, ye Nepheg, ye Zichri.

²²Nditɔ Uzziel ŋko: Mishael, ye Elzaphan, ye Sithri.

²³Ndien Aaron ada Elisheba, eyen Amminadab, eyen-eka Nashon, ke idem esie ɔdɔ: ndien enye aman Nadab, ye Abihu, ye Eleazar, ye Ithamar ɔnɔ enye.

²⁴Nditɔ Korah ŋko: Assir, ye Elkanah, ye Abiasaph; mme mmɔ emi edi ubon mme Korahite.

²⁵Ekem Eleazaar eyen Aaron ada eyen Putiel aŋwan kiet ke idem esie ɔdɔ; ndien enye aman Phinehas ɔnɔ enye; mme mmɔ emi edi mbuot mme ete Levi, nte ubon mmɔ esaŋade.

²⁶Mme mmɔ emi edi Aaron ye Moses emi Jehovah ɔkɔdɔhɔde mmɔ, ete esioŋo nditɔ Israel efep ke isɔŋ Egypt, ke mme udim mmɔ.

²⁷Edi mme mmɔ emi ekedɔhɔ ye Pharaoh edidem Egypt, ete esioŋo nditɔ Israel ke Egypt: mme mmɔ emi edi Moses ye Aaron.

²⁸Ekem ke usen Jehovah ɔdɔhɔde ye Moses ke Egypt, ndien Jehovah ɔdɔhɔ Moses, ete,

²⁹Ami ndi Jehovah: men kpukpru se ami ntiŋde nnɔ fi, tiŋ nɔ Pharaoh edidem Egypt.

³⁰Ndien Moses ɔdɔhɔ ke iso Jehovah, ete, Sese ami ndi edut ke inua, ndien Pharaoh edinam didie okop ɔnɔ mi?