Read efik EXODUS 7 Bible Online

EXODUS 7 - efik bible

EXODUS 7

¹NDIEN Jehovah ɔdɔhɔ Moses, ete, Sese, mmonim fi ke Abasi nnɔ Pharaoh: ndien Aaron eyen-uka eyedi prophet fo.

²Afo editiŋ kpukpru se ntemede fi: ndien Aaron eyen-uka etiŋ ɔnɔ Pharaoh, ete enye ayak nditɔ Israel edaŋa ke isɔŋ esie.

³Ndien ami nyenam esit Pharaoh ɔsɔŋ, nyenyuŋ nnam mme idiɔŋɔ mi ye mme utibe ŋkpɔ mi ewak ke isɔŋ Egypt.

⁴Edi Pharaoh idikopke inɔ mbufo, ndien nyemenere ubɔk mi ndori Egypt ke idem, nyenyuŋ nda ŋkpɔ ufen nsioŋo mme udim mi, ikɔt mi nditɔ Israel, mfep ke isɔŋ Egypt.

⁵Ndien nditɔ Egypt eyefiɔk ete ke ami ndi Jehovah, ke ini ami nnyanarede ubɔk mi ndori Egypt ke idem, nnyuŋ nsioŋode nditɔ Israel ke otu mmɔ mfep.

⁶Ndien Moses ye Aaron enam kpa nte emi Jehovah eketemede mmɔ, ntem ke mmɔ enam.

⁷Ndien Moses osim isua anaŋ, Aaron onyuŋ osim isua anaŋ ye ita, ke ini mmɔ edɔhɔde ye Pharaoh.

⁸Ekem Jehovah ɔdɔhɔ Moses ye Aaron, ete,

⁹Adaŋemi Pharaoh edidɔhɔde mbufo ete, Mbufo ewut mme utibe ŋkpɔ ke idem mbufo: ndien afo edidɔhɔ Aaron ete, Men esaŋ fo duɔk ke iso Pharaoh, ndien esaŋ eyekabare edi urukikɔt.

¹⁰Ndien Moses ye Aaron eka ke ebiet Pharaoh ekenam ntre, kpa nte emi Jehovah eketemede: ndien Aaron ada esaŋ esie ɔduɔk ke isɔŋ ke iso Pharaoh, ye ke iso ikɔt esie, ndien esaŋ akabare edi urukikɔt.

¹¹Ndien Pharaoh onyuŋ okot mme ɔfiɔkŋkpɔ owo ye mbiaidiɔŋ edi. Ndien idem mbia-idiɔŋ Egypt ŋko enyuŋ eda idiɔŋ mmɔ enam ntre.

¹²Kpukpru mmɔ enyuŋ emen esaŋ mmɔ eduɔk ke isɔŋ, ndien esaŋ ekabare edi urukikɔt: edi esaŋ Aaron emen esaŋ mmɔ esin ke idibi.

¹³Ndien esit Pharaoh osuk ɔsɔsɔŋ, ndien enye ikopke inɔ mmɔ; kpa nte Jehovah ɔkɔdɔhɔde.

¹⁴Ndien Jehovah ɔdɔhɔ Moses, ete, Esit Pharaoh ke ɔsɔsɔŋ, enye inyimeke ndiyak mbio emi eka.

¹⁵Ka ketiene Pharaoh ke usenubɔk; sese, enye ke ɔwɔrɔ aka mmɔŋ; ndien da ke mben akpa, man afo osobo ye enye; nyuŋ da esaŋ emi akabarede edi urukikɔt kama ke ubɔk fo.

¹⁶Afo edinyuŋ ɔdɔhɔ enye ete, Jehovah Abasi mme Hebrew ɔkɔdɔŋ mi ntiene fi, ete, Yak ikɔt imɔ eka, kpaŋ ekpenam ŋkpɔ enɔ imɔ ke wilderness: edi, sese, afo ukopke, tutu osim emi.

¹⁷Ntem ke Jehovah ɔdɔhɔ ete, Ŋkpɔ emi eyenam fi ɔfiɔk ete ke ami ndi Jehovah: sese, ami nyeda esaŋ ke ubɔk mi nyibi mmɔŋ emi odude ke akpa emi, ndien enye eyekabare edi iyip.

¹⁸Ndien iyak emi edude ke akpa eyekpaŋa, akpa eyenyuŋ etebe; ndien Egypt eyesua ndiŋwɔŋ mmɔŋ ke akpa.

¹⁹Ndien Jehovah ɔdɔhɔ Moses, ete, Dɔhɔ Aaron ete, Men esaŋ fo nyuŋ nyan ubɔk fo ke enyɔŋ mmɔŋ Egypt, ye ke enyɔŋ mme idim mmɔ, ye ke enyɔŋ mme udiɔŋ mmɔŋ mmɔ, ye ke enyɔŋ mkpɔdiɔhɔ-mmɔŋ mmɔ, ye kpukpru ɔtɔ eke mmɔŋ ɔdiɔhɔde, ndien mmɔ eyekabare iyip; man iyip odu ke ofuri isɔŋ Egypt, ye ke udiɔk mmɔŋ eto, ye ke udiɔk mmɔŋ itiat.

²⁰Ekem Moses ye Aaron enam kpa ntre, nte emi Jehovah okowukde: ndien enye emenere esaŋ oro ke enyɔŋ, oyibi mmɔŋ emi odude ke akpa, ke iso Pharaoh, ye ke iso ikɔt esie; ndien ofuri mmɔŋ emi odude ke akpa akabare edi iyip.

²¹Ndien iyak emi edude ke akpa ekpaŋa; akpa onyuŋ aŋwaha, ndien nditɔ Egypt ikwe nte enwɔŋde mmɔŋ ke akpa; iyip onyuŋ odu ke ofuri isɔŋ Egypt.

²²Mbia-idiɔŋ Egypt enyuŋ enam kpa ntre ke idiɔŋ mmɔ: ndien esit Pharaoh ɔsɔŋ, enye inyuŋ ikopke uyo mmɔ; nte emi Jehovah ɔkɔdɔhɔde.

²³Ndien Pharaoh akabare ɔnyɔŋ ke ufɔk esie, inyuŋ isinke esit ke ŋkpɔ emi ŋko.

²⁴Ndien kpukpru nditɔ Egypt etibi isɔŋ ekan akpa ekuk, eyom ndiŋwɔŋ mmɔŋ: koro mmɔ mikwe nte eŋwɔŋde mmɔŋ akpa.

²⁵Ekem ɔyɔhɔ usen itiaba nte Jehovah akamia akpa.