Read efik EXODUS 8 Bible Online

EXODUS 8 - efik bible

EXODUS 8

¹NDIEN Jehovah ɔdɔhɔ Moses, ete, Ka ke ebiet Pharaoh, nyuŋ dɔhɔ enye ete, Ntem ke Jehovah ɔdɔhɔ ete, Sana ikɔt mi yak, man eka ekenam ŋkpɔ enɔ mi.

²Ndien ama edi nte afo munyimeke ndiyak mmɔ, sese, ami nyeda ikwɔt mmia ofuri adaŋa fo.

³Ndien ikwɔt eyeyɔhɔ ke akpa: eyenyuŋ edɔk eduk ke ufɔk fo, ye ke ubet nna fo, ye ke ufɔk ikɔt fo, ye ke idem mbio-obio fo, ye ke usaŋ-uyo fo, ye ke unuak-uyo fo:

⁴ntem ikwɔt oro eyedɔk fi, ye mbio-obio fo, ye ikɔt fo kpukpru ke idem.

⁵Ekem Jehovah ɔdɔhɔ Moses, ete, Dɔhɔ Aaron ete, Men esaŋ fo ke ubɔk fo, nyanare ke enyɔŋ mme idim, ye udiɔŋ mmɔŋ, ye mkpɔdiɔhɔ-mmɔŋ, nyuŋ nam ikwɔt edɔk ke isɔŋ Egypt.

⁶Ndien Aaron anyanare ubɔk esie ke enyɔŋ mmɔŋ Egypt; ndien ikwɔt eto edɔk efuk isɔŋ Egypt.

⁷Ndien mbia-idiɔŋ eda idiɔŋ mmɔ enam kpa ntre, enyuŋ esin ikwɔt eto edɔk ke isɔŋ Egypt.

⁸Ndien Pharaoh okot Moses ye Aaron edi, onyuŋ ɔdɔhɔ ete, mbufo ekpe Jehovah ubɔk, ete, Enye emen ikwɔt efep ɔbɔ mi, ye mbio-obio mi, ndien nyeyak mbio oro eka, man ekewa uwa enɔ Jehovah.

⁹Ndien Moses ɔdɔhɔ Pharaoh, ete, Da mi ubɔŋ ke idem: ini ewe ke ndinam mkpe-ubɔk nnɔ fi, ye ikɔt fo, ye mbio-obio fo, man esobo ikwɔt efep ke idem fo ye ke ufɔk fo, man mmɔ esuk etak ke akpa ikpɔŋ-ikpɔŋ?

¹⁰Ndien enye ete Moses, Mkpɔŋ. Ndien enye (Moses) ete, Yak edi ke uyo fo; man afo ɔfiɔk nte baba kiet mibietke Jehovah Abasi nnyin.

¹¹Ndien ikwɔt eyedaŋa ekpɔŋ fi, ye ebiet fo, ye ikɔt fo, ye mbio-obio fo; eyesuk etak ke akpa ikpɔŋ-ikpɔŋ.

¹²Ndien Moses ye Aaron ewɔŋɔ ekpɔŋ Pharaoh: Moses onyuŋ eseme ɔnɔ Jehovah abaŋa ikwɔt emi Enye okotimde ɔnɔ Pharaoh.

¹³Ndien Jehovah anam ke uyo Moses; ndien ikwɔt oro ekpaŋa ke ufɔk, ye ke mme okure, ye ke iŋwaŋ.

¹⁴Ndien etaŋ mmɔ ekubi otu; ndien isɔŋ etebe.

¹⁵Ekem adaŋemi Pharaoh okutde nte nduɔk-odudu odude, enye ɔsɔŋɔ esit esiemɔ, inyuŋ ikopke inɔ mmɔ; kpa nte emi Jehovah ɔkɔdɔhɔde.

¹⁶Ekem Jehovah ete Moses, Dɔhɔ Aaron, ete, Menere esaŋ fo, yibi ntan isɔŋ, ndien enye eyekabare edi idaŋ ke ofuri isɔŋ Egypt.

¹⁷Ndien mmɔ enam ntre; ndien Aaron emenere ubɔk esie ye esaŋ, oyibi ntan isɔŋ, ndien idaŋ ɔnyɔk owo ye ufene ke idem; ofuri ntan isɔŋ akabare edi idaŋ ke ofuri isɔŋ Egypt.

¹⁸Mbia-idiɔŋ enyuŋ eda idiɔŋ mmɔ enam ntre ete inam idaŋ ɔwɔrɔ, edi ikemeke; ndien idaŋ ofuk owo ye ufene ke idem.

¹⁹Ndien mbia-idiɔŋ edɔhɔ Pharaoh ete, Nnuenubɔk Abasi edi emi; edi esit Pharaoh osuk ɔsɔsɔŋ, enye inyuŋ ikopke inɔ mmɔ; kpa suk nte emi Jehovah ɔkɔdɔhɔde.

²⁰Ndien Jehovah ɔdɔhɔ Moses, ete, Babak ke usenubɔk daha ke enyɔŋ, kada ke iso Pharaoh; sese, enye ɔwɔrɔ aka mmɔŋ; nyuŋ dɔhɔ enye ete, Ntem ke Jehovah ɔdɔhɔ ete, Yak ikɔt mi eka ekenam ŋkpɔ enɔ mi:

²¹koro muyakke ikɔt mi eka, sese, ami nyedɔŋ nduyip utom ke ɔtɔ fo, ye eke ikɔt fo, ye eke mbio-obio fo, ye eke mme ufɔk fo; ndien nduyip eyeyɔhɔ ke ufɔk nditɔ Egypt, ye ke isɔŋ ŋko emi mmɔ edude ke esit.

²²Ndien ke usen oro nyedianare isɔŋ Goshen, emi ikɔt mi eduŋde ke esit, mfep, man nduyip ekudu do; man afo ɔfiɔk ete ke ami ndi Jehovah ke ufɔt ererimbot.

²³Nyenyuŋ mbahare ikɔt mi ye ikɔt fo: idiɔŋɔ emi eyesu mkpɔŋ.

²⁴Ndien Jehovah anam ntre; ndien nduyip ediyɔhɔ ke ufɔk Pharaoh, ye ke ufɔk ikɔt esie, ye ke ofuri isɔŋ Egypt idiɔk-idiɔk: nduyip oro esin isɔŋ abiara.

²⁵Ndien Pharaoh okot Moses ye Aaron edi, onyuŋ ɔdɔhɔ ete, Mbufo eka ekewa uwa enɔ Abasi mbufo ke isɔŋ emi.

²⁶Ndien Moses ɔdɔhɔ ete, Inenke ndinam ntre: koro nnyin iyewa mbubiam Egypt inɔ Jehovah Abasi nnyin: sese, edieke nnyin idiwade mbubiam Egypt ke iso Jehovah, nte mmɔ iditɔŋɔke nnyin ke itiat?

²⁷Nnyin iyeda isaŋ usen ita iduk ke wilderness, nnyin iwa inɔ Jehovah Abasi nnyin, kpa nte Enye edidɔhɔde nnyin.

²⁸Ndien Pharaoh ete, Ami nyeyak mbufo eka, man mbufo ewa uwa enɔ Jehovah Abasi mbufo ke wilderness; edi mbufo ekuka anyan usuŋ: enam mkpe-ubɔk enɔ mi.

²⁹Ndien Moses ɔdɔhɔ ete, Sese, mmɔŋ ŋwɔrɔ ŋkpɔŋ fi, nyeyuŋ ŋkpe Jehovah ubɔk, ndien nduyip eyedaŋa ekpɔŋ Pharaoh, ye ikɔt esie, ye mbio-obio esie, mkpɔŋ: edi yak Pharaoh okutɔŋɔ ntak anam abiaŋa, ke eritre ndiyak mbio emi eka ekewa uwa enɔ Jehovah.

³⁰Ndien Moses ɔkpɔŋ Pharaoh ɔwɔrɔ, aka ekekpe Jehovah ubɔk.

³¹Ndien Jehovah anam ke uyo Moses; ndien nduyip ekpɔŋ Pharaoh ye ikɔt esie, ye mbio-obio esie; isukke ndomo kiet.

³²Ndien Pharaoh ɔsɔŋɔ esit esiemɔ ke idem ini emi ŋko, inyuŋ iyakke mbon oro eka.