Read efik EXODUS 9 Bible Online

EXODUS 9 - efik bible

EXODUS 9

¹NDIEN Jehovah ɔdɔhɔ Moses ete, Ka ke ɔtɔ Pharaoh, nyuŋ dɔhɔ enye ete, Ntem ke Jehovah Abasi mme Hebrew ɔdɔhɔ, ete, Yak ikɔt mi eka, man ekenam ŋkpɔ enɔ mi.

²Koro afo munyimeke ndiyak mmɔ, ama onyuŋ osuk omum mmɔ akama;

³sese ubɔk Jehovah odoro ufene fo emi edude ke iŋwaŋ, ye mme horse, ye mme ass, ye mme camel, ye mme enaŋ, ye mme erɔŋ: edidi ata idiɔk udɔŋɔ eti-eti.

⁴Jehovah eyenyuŋ adianare ufene Israel ke ufene Egypt: baba ŋkpɔ nditɔ Israel kiet idinyuŋ ikpaha.

⁵Jehovah onyuŋ onim ini ete, Mkpɔŋ Jehovah eyenam ŋkpɔ emi ke isɔŋ emi.

⁶Ndien Jehovah anam ŋkpɔ oro mkpɔŋ, ndien kpukpru ufene Egypt ekpaŋa: edi ufene Israel baba kiet ikpaha.

⁷Ndien Pharaoh ɔdɔŋ (ekese), ndien sese, baba ufene Israel kiet ikpaha. Edi esit Pharaoh osuk ɔsɔŋ, enye inyuŋ iyakke mbon oro eka.

⁸Ekem Jehovah ɔdɔhɔ Moses ye Aaron, ete, Mbufo ewobi ntɔŋ furnace ke eka-ubɔk mbufo, ndien yak Moses asuan enye ke enyɔŋ ke iso Pharaoh.

⁹Ndien enye eyedi ntɔŋ ke ofuri isɔŋ Egypt, eyenyuŋ odoro ke idem owo ye unam, edi oyo eke obumerede ndɔk ke ofuri isɔŋ Egypt.

¹⁰Ndien mmɔ ewobi ntɔŋ furnace, eka ekeda ke iso Pharaoh; ndien Moses asuan enye ke enyɔŋ; ndien enye akabare edi oyo eke obumerede ndɔk ke idem owo ye ufene.

¹¹Ndien oyo oro iyakke mbia-idiɔŋ eda ke iso Moses: koro oyo anamde mbia-idiɔŋ ye kpukpru nditɔ Egypt.

¹²Ndien Jehovah ɔsɔŋ Pharaoh esit, ndien enye ikopke inɔ mmɔ; kpa nte emi Jehovah ɔkɔdɔhɔde Moses.

¹³Edikem Jehovah ɔdɔhɔ Moses, ete, Bak ke usenubɔk demere, kada ke iso Pharaoh, nyuŋ dɔhɔ enye, ete, Ntem ke Jehovah Abasi mme Hebrew ɔdɔhɔ ete, Yak ikɔt mi eka, man ekenam ŋkpɔ enɔ mi.

¹⁴Koro isaŋ emi, ami nyenam kpukpru mme idiɔk-ŋkpɔ mi eduk fi ke esit, ye ikɔt fo, ye mbio-obio fo: man afo ɔfiɔk nte baba kiet mibietke mi ke ofuri ererimbot.

¹⁵Koro ke emi ke ŋkpanyanarede ubɔk mi mmia fi, ye ikɔt fo, ke idiɔk udɔŋɔ; ndien ekpesobo fi ke ererimbot efep.

¹⁶Edi ŋkɔm edi emi ekesin mi nnim fi, man ŋwut fi odudu mi; man enyuŋ ekwɔrɔ enyiŋ mi ke ofuri ererimbot.

¹⁷Afo ke osuk emen idem fo ɔbiɔŋɔ ikɔt mi, unyuŋ usanake mmɔ uyak.

¹⁸Se mi, ke adaŋa ini emi ntem mkpɔŋ, nyenam edim-itiat edep ɔkpɔsɔŋ eti-eti, eke akanam oruk emi miduhe ke Egypt, toto ke ini oro enye ɔkɔtɔŋɔde, tutu osim emi.

¹⁹Dɔŋ ndien eketaŋ ufene fo, ye kpukpru se afo enyenede ke iŋwaŋ; ama edi kpukpru owo, ye ufene eke ekutde ke iŋwaŋ, eke minyuŋ isopke ke ufɔk, edim-itiat eyesuhɔre mmɔ ke idem, ndien mmɔ eyekpaŋa.

²⁰Owo ikɔt Pharaoh eke abakde Jehovah, anam ikɔt esie ye ufene esie efeŋe eduk ke ufɔk:

²¹edi owo eke misinke esit esie ke ikɔ Jehovah, ɔkpɔŋ ikɔt esie ye ufene esie ke iŋwaŋ.

²²Ndien Jehovah ɔdɔhɔ Moses, ete, Menere ubɔk fo ke enyɔŋ, ndien edim-itiat eyedep ke ofuri isɔŋ Egypt, ɔbɔŋ owo, ye unam, ye kpukpru mbiet iŋwaŋ, ke isɔŋ Egypt.

²³Ndien Moses emenere esaŋ esie ke enyɔŋ; ndien Jehovah atuak enyɔŋ, onyuŋ anam edim-itiat ɔduɔt, ikaŋ onyuŋ asak asaŋa ke isɔŋ; Jehovah onyuŋ anam edim-itiat ɔduɔt ke isɔŋ Egypt.

²⁴Ndien edim-itiat ɔduɔt, ikaŋ onyuŋ asak abuaha ye edim-itiat, ɔsɔŋ eti-eti, eke oruk esie akanam miduhe ke ofuri isɔŋ Egypt, toto nte ekedi idut.

²⁵Ndien edim-itiat oro ɔduɔt ke ofuri isɔŋ Egypt, ɔbɔŋ kpukpru se idude ke iŋwaŋ, ɔtɔŋɔ ke owo osim unam; edim-itiat oro onyuŋ anuak kpukpru mbiet iŋwaŋ, onyuŋ obuŋ kpukpru eto iŋwaŋ.

²⁶Edi edim itiat oro ikoduhe ke isɔŋ Goshen, emi nditɔ Israel edude do.

²⁷Ndien Pharaoh ɔdɔŋ ekekot Moses ye Aaron edi; onyuŋ ɔdɔhɔ mmɔ ete, Mmanam idiɔk ke ini emi: Jehovah enenen; edi ami ye mbio mi imɔdiɔk.

²⁸Mbufo ekpe Jehovah ubɔk, ndien yak uyom Abasi ye edim - itiat ekem; ndien nyeyak mbufo eka, ndien mbufo idibigike aba. Ndien Moses ɔdɔhɔ enye, ete,

²⁹Ke adaŋemi nsuk ŋwɔwɔrɔ ŋkpɔŋ obio, nyemenere ubɔk mi nnɔ Jehovah; uyom eyedobo, edim-itiat idinyuŋ iduhe aba; man afo ɔfiɔk nte ererimbot enyenede Jehovah.

³⁰Edi ama edi afo ye ikɔt fo, mmɔfiɔk nte mbufo miteŋeke kaŋa Jehovah Abasi nnyin.

³¹Ndien flax ye barley enuaha: koro barley otopde idem, flax onyuŋ ɔtɔŋɔ nditop idem.

³²Edi wheat ye spelt inuahake: koro mmɔ mika-ikɔrike.

³³Ndien Moses ɔwɔrɔ ke obio ɔkpɔn Pharaoh, ekemenere ubɔk esie ɔnɔ Jehovah; ndien uyom ye edim-itiat odobo, edim onyuŋ etre ndiduɔt ke isɔŋ.

³⁴Ndien adaŋemi Pharaoh okutde nte edim, ye edim - itiat, ye uyom edobode, enye ɔdɔdiɔŋ ɔdiɔk, onyuŋ ɔsɔŋ esit esie, enye ye ikɔt esie.

³⁵Ndien esit Pharaoh osuk ɔsɔŋ, enye inyuŋ iyakke nditɔ Israel eka; kpa nte emi Jehovah ɔkɔdɔhɔde ke inua Moses.